La visite de lus Majestés
Il y en a tant qui l'sont et qui n'l'savent pon, qui faut bein que j'dise que j'sais que j'n'sis qu'une pouorre bête et n'v'la pourtchi j'comprends les d'vis de touotes les bêtes!
L'grand jour j'tais jutchie dans un bouais à veir chein qu'nou faisait dans la paraisse de Grouville pouor la visite de lus Majestés quand sièz l'ammin Brée, de la Sente, j'oui de drôles de d'vis.
Meuh! meuh!! Pourtchi touot chu fuss annièth, car ch'nest pon l'temps des shows achteu. Notre valet a mins du temps à netti ma belle robe et l'boss est v'nu ly même ver si j'paraissais bein. tchès que chunna veur dithe? Une ride dans l'van? Pouor seur ch'n'est pon encouore la dernièthe d'pis que j'fais mon d'vé couome touote buanne vacque de Jerri - nou peux l'saver par les milk records - ch'nest pon pouor m'conduithe à la boucherie qu'n'ou s'donnerait tant de ma à me faire paraître belle!
Et touot en ruminant, Miss Bronzemine monte dans l'van, et cache, la v'la hors de chutte "sente" qui d'vait la conduithe dans l'quemin de la célébrité!
A Springfield ieut des meuh! meuh!! de touot l'troupé des pus belles bêtes de Jerri. Les génisses et les vacques s'faisaient: N'v'chin Miss Bronzemine qui f'ra buanne mine dans les étables de Sa Majesté et f'ra l'orgui de touote la race jerriaise.
Les taureaux s'ergardaient tristement mais iuen d'eux qu'est un miot philosophe s'fit: Meuh! meuh!! nous éttout j'avons un grand honneu puisque Sa Majesté est v'nu tout drait nou vèr oprès aver veu nos grands Messieux des Etats et de la Cour!!
Et Miss Bronzemine ieut l'grand honneu d'être fliattée un miot par Sa Majesté, chein qu'aurait fliatté hardi l'amour-propre des siens au tour du ring s'ils avaient ieu pareil honneur.
Tandis que l'Caouain attend tréjous a être décoré... d'la médaille du rein qui vaille, Miss Bronzemine est achteu dans les dépendances d'un chaté royal.
* * *
Roueroue! roueroue!! Touot est fini achteu mais tchi misèthe. Pas moyen de fermer de l'yil la nièth, viyant qu'nou voulait nous les frumer pouor tréjous! Nous n'cherchera pus à nous happer avec des dranets couomme du paisson. Nennin, touot chunna est du temps passé.
Mais tchi affront touot d'même.
Ch'n'est pon parce que tchicques fais nous laisse tchès d'notre niche un oeuf ou... autre chose qui faut craithe qu'nous n'sait pon couomment nous comporter.
L'sien qui eut chute idée d'nous condamner à mort viyant qu'nous pouorrait p't'être décorer trop de Messieux ou de grandes dames... de l'ordre du pigeon, chut oisé là mériterait qu'nous ly présente, avec nos compliements, une cruque d'oeuf sus l'haut de san chapé touos les matins. Ch'est un affronté.
* * *
Quack! quack!! j'sommes pon des "quacks" anglais pour vos guérir de touotes sortes de maladies, non, j'sommes deux maillards, celébres dans l'histouèthe de Jerri.
J'fumes tithé par un grand Seigneur et oprès aver ieu la becque dorée et aver été amathé avec de biaux ribans, sus un serveur en argent - pas rein de plated, touot en argent s'il vous pliaît - j'eumes l'honneu d'être présentés à Sa Majesté.
N'v'la tchi fit ma au tchoeur à Moussieu l'Receveur-Général, y faut craithe, car y s'empressi bé vite d'nous mettre à la garde de Billy Gough. Chounna n'fait rein car pouor seur Moussieu l'Receveur se rappellera d'nous pour tchique temps!
Ch'est sus le "Duke" que nous embarquîmes pouor s'rendre sur le royal yacht mais là ètouot il y avait des jaloux car au lieu d'une pliaiche d'honneur sus l'menu de Sa Majesté ch'est aux paissons que j'fîmes chut honneur!!
* * *
S'il y a ieut bein des d'sappointements quand nous apprins les noms des siens sus tchi que Sa Majesté avait conféré d's'honneurs touot chein que l'sieur Caouain mint, à l'entouor de mé, dans la gazette de Samedi passé, est autant de menteries car jamais je n'ai ieu dans l'idée que chut oisé, de malheur pour mé, s'rait décoré. Et pourtchi donc qu'nous l'y ferait un tel honneur?
Marie Hibou
23/7/1921
Les Chroniques de Jersey
Viyiz étout: