Moussieu l'Editeu,
Y faut que j'vos diche en qu'menchant que je n's'y pas tout-à-fait dans mé canettes assêsé, car pour dithe vrai je s'y ocquo bein lâssé après hier, et j'n'ai pas idée d'resté à-bas trop tard.
La Merrienne, tch'a monté à-haut tout-d'suite après l'tais, est ocquo pièthe, et Moussieu, ch'est d'sa faute. Oulle éthait peut v'nin ôv mé à Springfield, mais oulle avait décidé d'être sûs la cauchie Albert pour vais la Reine et l'Prince arrivé. Pour être là en temps oulle eut un taxi tchi m'couôtit bétôt un louis, et ch'fut la même chose en r'venant. Ach'teu, Moussieu, ou comprendrez que ma p'tite balanche à la banque a diminué considéthablement.
Par chein qu'ou m'a dit, y'avait tant d'monde là d'vant l'y, qu'ou vit prèsque rain d'la Reine. Ou fit un salut avec sa main en passant, mais la bouonnefemme ne crait pas qu'ou la r'connut. Après chonna, ou s'en fut à la Place Royale, mais là étout ou n'eut pas grand'chance, car y'avait eune foule de monde, et ou fut boustchulée d'un bord et d'l'autre par des gens tch'y n'avaient autchun réspect pour la Dame du Portinfé, et la Reine avait tant d'gens autoud'l'y qu'nou n'pouvait à peine vais même san p'tit chapé.
Enfin, la Merrienne, ocquo dêterminée d'la vais d'pûs près, marchi au Robin Hood, ouèsque, comme ou savez, Moussieu, y'a deux aubèrges, et là ou s'mint en d'vant, avec l'aide de san parapluie et vit toute la procêssion pâssé. Ou veur dithe que la Reine souôrit quand ou la vit, mais j'peux craithe chonna si j'veur. La Merrienne n'a pas grand'chose à dithe de l'arlevée, sinon qu'ou s'en fut en ville pour une tâsse de tais, et qu'oulle eut une djobbe à trouvé un réstaurant, car prèsque tout 'tait freummé. Quant j'l'y d'mande combain qu'ou péyit ou fit une grimache et dit qu'en ville ch'n'est qu'des fripons et des voleurs.
Quant à mé, Moussieu, avec man blieu bilyét j'n'eut autchune peine à trouvé un siège à Springfield, car j'arrivit là en tout-plien d'temps, une bouonne heuthe dévant l'entrée des bêtes.
Y m'semblye que ch'éthait 'tait une bouonne chose d'avé un mio d'musique pour donné d'l'animation à la scène, mais p't'être tch'ils avaient yeu peux d'êffrité les boeux, et qu'y'éthait tchique accident. et y s'peut étout tch'ils avaient raison, sus un sens, car le boeu de deux ans, à Clifford Pallot, n'voulaient pas s't'nin trantchille, et les deux garçons tch'y l't'naient avaient tout ch't'chy voulaient à faithe.
La vaque au Basil le Brun pathaissait raide bein, et nou viyait qu'la Reine et l'Prince d'admithaient hardi. Je n'crais pas que l'Comité éthaient peut faithe un miyeu chouaix. Mais de toutes les bêtes que y'avait là, la sienne que j'éthais chouaîsi pour ram'né siez mé, ch'tait la charmante p'tite génisse au Sieur Carson tch'avait fait l'preumié prix au Show du mais d'Mai. Y m'sembliait que l'boeu au Jack A'Court éthait peut allé pûs haut, et dans les g'niches de deux ans, y'en avait pûs d'yunne tchi 'tait trop haute. Le Clifford Pallot r'chut sa coupe comme un vrai Moussieu.
Quant au réstant, le Fraînque Le Boutillyi, habillyi dans tout san dîmanche, fit sa djobbe admithablyement et y n'y'avait là autchune damme mûs habillyie qu'sa femme. Parmi l'réstant, le Sieur Shephard, comme de couôtume, était tréjous ouèsque y d'vait être, et je n'vais vraiement pas ouèsque la Sociêté s'sait sans l'y.
Y y'avait d'autres choses, Moussieu, que je r'merchit. Les belles flieurs 'taient un crédit à la Sociêté, et les chapiaux des dames n'avaient pas 'tait accatés à bouan marchi. Si y'en avait yun ou deux ichin et là tchi n'embéllisaient pas trop les vîsages, ch'tait p't'être aussi la faute des vîsages comme des chapiaux. Quant ès arrangements, y n'éthaient pas peut être miyeu.
Ach'teu, Moussieu, pour le mauvais moment tchi vint quand tout étant fini, je m'trouvit au Robin Hood, et vit la bouonnefemme et san parapluie drait en d'vant d'mé. Une autre bordée j'vos dithait comment que j'peut me muchi driéthe un grand balloque, et entré sans être veu dans une pièche ouèsque y'avait du raffraîchissement pour un homme tch'avait grand sé.
Ph'lip
3/8/1957
Viyiz étout: