La rêunion mensuelle d'l'Assembliée d'Jèrriais eut lieu vendrédi, l'25 dé mars 1966, dans la Salle Parouaissiale dé La Trin'té, et au mains 170 membres y étaient pour vaie les portraits et ouï l's explyications par lé Sieur Harold Le Druillenec dé quand il avait 'té en Russie au mais d'mai l'année passée.Ches portraits en couleur 'taient divèrsément bouans et bein intéressants. Eune chose si r'merquabl'ye 'tait la propreté des routes et d's alentours des grands bâtisses.
A Moscou, au Kremlin, i'y a "Palais des Soviets" qui tcheint à bein près 8,000 mille personnes, iou qu'à m'suthe qu'un discours est fait, il est traduit en 13 langues, et peut être entendu dans autchunnes dé ches langues en touonnant eune pétite pliaque à côté d'san siége au numétho qu'y correspond. Nou' vit étout l'Embassade Angliaiche; l'Univèrsité avec ses 17,000 appartein'ments; la Chathédrale St. Basil, qu'est servie d'musée à ch't heu'; la grand' boutique dé "Gum", qu'est immense; la tombe à Lenin, et bein d'autres portraits si bein prints et explyitchis qué nou's y éthait rester acouo pus longtemps.
A fini la séthée, l'Sieur Le Druillenec montrit un court film dé la parade militaithe du mais d'mai, qui 'tait bein difficile à prendre, car tous lus buttés pour vaie et pour en prendre des portraits ieux-mêmes. Ch'tait 'chin qu'nou-s-en vit d'accoutréments militaithes, bein trop pour en donner des détails!
Lé Sieur Le Druillenec avait 'té à Moscou auve lé Sieur Norman Lé Bro au mais d'Mai 1965 pouor èrchéver d's honneurs du gouvèrnément Soviétique pouor aver aîdgi ès prisonnièrs Russes pendant l'Otchupâtion.
Viyiz étout: