Les Pages Jèrriaises

La Vîsite d'la Reine, not' Duc, en 2001

 

Lé 13 dé Juilet 2001, la Reine, not' Duc, nos vîsitit en Jèrri. Oulle arrivit en hélicoptéthe tch'attèrrit sus l'People's Park à St. Hélyi.

I' n'y'avait pon d'rouoge tapis - à la pliaiche y'avait des nattes d'sînfectantes pouor protégi l'Île contre l'attaque dé fièvre aphteuse tch'avait tapé l'Rouoyaume Unni bein dû ch't' année.

Y'avait un tas d'gens dans l'Par pouor atchilyi Sa Majesté, tchi 'tait habilyie en jaune. Ou 'tait arrivée dé Dgèrnésy où'est qu'oulle avait mîns un vèrt fro - nou dîsait qué ch'tait pa'ce qué l'vèrt est la couleu Dgèrnésiaise, et nou sé d'mandait s'ou s'en ithait mett' un rouoge fro pouor Jèrri. Mais l'jaune 'tait bein c'mode pa'ce qué nou pouvait distîndgi Sa Majesté dé bein liain.

 

La Reine, not' Duc, lé 13 dé Juilet 2001

La Reine, not' Duc, à èrchéver les deux maillards du Seigneur d'La Trinn'té dans l'Par Howard Davis, lé 13 dé Juilet 2001.

 

Dans l'Par Howard Davis y'avait eune ênorme assembliée d'gens pouor la séance des Êtats, la cérémonie d'l'honmage des Seigneurs et la dêvouail'lie d'eune longue pièrre pouor mèrtchi l'occâsion.

Eune strade avait 'té construite dans l'par, et les tchaîses des membres d's Êtats 'taient pliaichies sus la bliête d'vant. Les Juges 'taient là, et les Seigneurs à côté étout.

La procêssion fut m'née par la mâsse rouoyale et la bannièthe dé d'ssus l'siège du Bailli dans la Chambre d's Êtats - et né v'là deux bouonnes ramémouaith'thies d'vîsites du temps pâssé: la vîsite du Prînce Charles, procliâmé Rouai en Jèrri auprès l'exétchution d'san péthe, l'Rouai Charles I, au dgiêx-septième siècl'ye, et la vîsite du Rouai George V en 1921 pouor tchi la banniéthe fut faite.

Et en êffet, ch'tait eune bouonne chose qu'Sa Majesté avait dêcidé dé s'habilyi en jaune viyant qu'les Mêssieux d'Couronne et les Juges 'taient dans lus rouoges robes et nou-s'éthait ieu d'la peine à distîndgi la Reine entré touos ches gens-là s'oulle avait mîns du rouoge.

Lé monde avait eune assez bouonne veue d'la Reine et du Prînce Ph'lip sus la strade duthant la liéthie d'l'Adrèche Louoyale par l'Bailli. I' mentionnit lé dêv'loppement d'la démocratie en l'Île avaû les siècl'yes - quâsi huit chents ans d'pis la pèrte d'la grand'tèrre par l'Rouai Jean et not' preunmié Constitution d'tchi l'annivèrsaithe es'sa en 2004. Ch'fut înmportant dé mentionner not' système démocratique, sustout viyant qu'i' y'avait un tas d'êtchipes dé quéméreu d'la télévîsion pouor filmer la vielle cérémonie d'honmage - et i' pouôrraient bein présenter Jèrri coumme tchique bizarre carre Ruritannienne.

Pis la Reine, not' Duc, rêponnit auve tchiques patholes.

Ch'fut l'tou ès Juges d'avanchi pouor êt' des têmoins d'l'honmage des Seigneurs tchi lus pliaichîtent d'vant la strade, montîtent, lus agenouoillîtent pouor prononcer les patholes d'honmage et d'vallîtent - tout bein douochement. L'Seigneur d'la Trinn'té montit eune deuxième fais à seule fîn d'présenter deux maillards sus un sèrveux d'argent. Et né v'là d'tchi à exciter les journalistes! Ch'fut sus les nouvelles chutte séthée à la télévîsion - l'êtrange présent à la Reine!

 

La Reine, not' Duc, à èrchéver l'honmage des Seigneurs dans l'Par Howard Davis, lé 13 dé Juilet 2001.

La Reine, not' Duc, à èrchéver l'honmage des Seigneurs dans l'Par Howard Davis, lé 13 dé Juilet 2001.

 

Pis Sa Majesté fut învitée par l'Bailli d'aller dêvouailer eune longue pièrre dans l'par tchi mèrquétha à janmais chutte vîsite. Chennechîn fait, lé coupl'ye rouoya pâlit ès gens dans l'audienche en lus prom'nant d'èrtou à l'entrée du par vèrs lus vaituthes officielles.

Eune mûsique dé pouques à vent Êcossaise jouait duthant chu temps-chîn. Et la couleu rouoyale fliottait sus l'Par.

 

La couleu rouoyale

La couleu rouoyale sus l'mât dans l'Par Howard Davis

 

La Reine s'en fut au Collège Victoria d'tchi oulle est Vîsiteur pouor présenter les médâles traditionnelles et pis au Collège des Fil'yes pouor ouvri officiellement l'neu bâtisse, où'est ou' r'gardit eune pièche dé thiâtre.

Lé Prînce Ph'lip, lî, s'en fut à la Cauchie pouor rencontrer des gens des Sèrvices d'Urgence et d'aut's gens étout - sustout les dgaîngues dé jannèche. I' vîsitit étout l'Musée Maritînme.

Y'eut un dînner au Collège Highlands pouor la Reine et l'Prînce (et eune racachie d'grôsses têtes). La Reine eut un podîn spécialement fait sans frâses - n'en v'là-t-i' un détail d'întéthêt!

L'arlévée fut pâssée à La Trinn'té. La Reine ouvrit l'neu bâtisse d'la Sociêté Rouoyale. Nou-s'avait plianné un show d'vaques - mais il avait 'té annulé à la siette d'la fièvre aphteuse et chenna voulait dithe étout qu'lé présent traditionnel d'eune vaque Jèrriaise n'tait pon pôssibl'ye nitout. Mais Sa Majesté r'chut un portrait d'eune vaque fait par eune p'tite fil'ye - et la promêsse d'eune vaque à v'nîn auprès l'risque d'la fièvre aphteuse.

Ou vît eune aut' vaque étout - la preunmié des stchulptuthes dé vaques faite pouor l'Annee d'la Vaque Jèrriaise tch'est à êt' înstâllée à Wests Centre pus tard dans l'année. Ou pâlit auve lé stchulpteux, et l'Prînce Ph'lip eut du fanne en dîsant qu'il espéthait qu'la vaque à v'nîn n'es'sait pon en bronze!

 

Viyiz étout:

 

Les Pages Jèrriaises