Jé fînmes un viage en Russie au mais d'août, mil neuf chent septante-tch'ieune, un viage èrmèrquabl'ye sus bein des sens. Car, preunmiéthement, i' n' y'a danme pon hardi d'gens d'Jèrri tchi y'ont 'té, ni même ofûche tchi sont en veue d' y'aller. Et nou vit bein d'tchi à vouos ouvri l's ièrs, étant sustout surprîns du grand progrès tch'a 'té fait dans ch't înmense pays dépis la dreine dgèrre. Nou fut êmèrvilyis dé chein qu' nou-s-y vit, comme trésors, des monuments historiques si bein présèrvés et dé tout chein tch'est "culturel". J'ét'tchions lé Sieur Ph'lippe dé Veûlle, Député dans l's Êtats, le Sieur George L'Feuvre (Jèrriais d'Améthique) tch'est tout à fait bein connu étout, et mé, et pis en pus la p'tite-fil'ye du Sieur Lé Feuvre, la d'mouaîselle Carole Voigt, tchi s'en'tait v'nue à l'exprès d's Êtats-Unis et nouos rencontrit à Londres pouor voler en avion à Leningrad. J'ét'tchions eune quarantaine dans un parti organnisé et tout fut comme sus rouelles, comme nou dit, du c'menchement jusqu'à la fîn.
Lé paysage à bein des bords en Russie est supèrbe et les grand's villes qué j'allînmes vaie étout. Et chein tchi nouos frappit l'pus, pe't-étre, est qué d'faithe un viage dans chu pays-là - patrie du Commeunisme - est la même chose comme dé viagi autchun bord par ailleurs dans l's aut's pays du monde. Nou nouos fit la beinv'nue et jé feûnmes souongnis hardi bein d'allant et dé v'nant. I' fallit bein seux s'protchuther un visa d'entrée atout l'pàsseport, comme i' l'faut pouor entrer dans l's aut's pays à l'êtrangi, et i' fallit siéthe les formalités normales dé la douanne - choses bein sîmpl'yes si tout est en ordre. Nou-s-avait changi ses sou, sans doute, en roubl'yes et kopecks Russes; et don nouos v'là à tèrre à Leningrad auprès rein qu'trais heuthes et d'mie d'vol dans un avion Aeroflot. Là j'trouvînmes eune janne Angliaîche à nouos attendre, comme èrprésentante dé l'agence dé viage "Horizons " dé Londres, diplômée d' l'unnivèrsité et pâlant l'Russe, et r'présentant étout l'agence Intourist. Sa tâche était d'nouos faithe condithe, par avion et autrément, d'eune ville à l'autre et des extchursions en ville et en campangne, dé nouos pliaichi en hôtel à châque bord et d'souongni d'nous sus touos les sens. J'avions des dgides Russes étout, tchi pâlaient l'Angliais, touos les jours auve nous.
Lé pays, lé pus grand au monde, comprend tchînze républyiques individuelles couvrant eune étendue dé huit millions d'milles cârrés, un siexième du tèrrain habité du monde entchi, atout eune populâtion dé deux chent quarante millions. Dé chu nombre-là quatorze millions seulement appartcheinnent au parti commeuniste. Ch'est considéthé un grand honneu d'en êt' membre, car ch' n'est qu' les pus dévoués du régînme tchi sont acceptés. Tout l'monde sont empliyés par l'Êtat, jusqu'à l'âge dé souaixante, quand il' ont eune pension. Les gages sont dé 70 à 700 roubl'yes par mais, deux roubl'yes et tchînze kopecks valant un louis stèrling. Les femmes travâlent à bein prés comme les hommes. L'êducâtion est libre pouor tout l'monde, et l'Unnivérsité à Moscou, comme exempl'ye, a souaixante mille êtudiants.
Nou n'vit qu' trais ou quat' souards duthant tout nouot' viage, et bein p'tit d'feunmeurs, Et ch'la n'est pon viyant qu' lé p'tun est trop chi. Les dgides nouos dîdrent qué les gens en général né criyaient pon qu' la feunm'thie 'tait d'tchi nécessaithe. Hé, ma fé, y'a-t-î' pus logique comme réponse? Nou sait bein, sustout d'nouos jours, qué la feunm'thie n'vaut rein à pérsonne point d'veue d'santé. Et pis, tchi mange-sou! I' pathaît beîn évident qué les Russes concentrent sus la production des choses essentielles à la vie quôtidienne, et les articl'yes d'luxe sont chiéthes, souvent même bein chîéthes,. Mais, en général, les nécessités d'la vie, lé pain, la viande, les lédgeunmes, et cétéra, couôtent à bein prés l'méme prix comme en Jérri.
Y'a hardî d'bâtithie en allant, des grands bâtisses cârrés tchi contcheinnent un tas dé louages, et dans iun d's alentours dé Kiev, dans l'Ukraine, par exempl'ye, il' en ont bâti iun assez pouor louogi 102,000 pérsonnes. I' pathaît qu' ches louages né sont pon chiérs. Et les gages qué les gens gângnent pathaissent suffisants pouor ieux à vivre confortabliément.
D'aut's choses, agriabl'yes, qué nou s'avisit sont qué nou n'vait pon dé longs g'veux parmi les jannes, néglyigis, et l'monde pathaissent tous assez bein habilyis. Les belles grand's rues et av'nues sont gardées hardi propres, et les cheins tch'en ont l'soin sont tréjous à les tremper et laver atout d' l'ieau.
A ch't heu, tch'est qué j'vînmes autrément? Eh bein, j'en vînmes tant qué nou n'peut s'rappeler d'tout. Mais, des supèrbes palais (et y'en a par la douzaine tch'ont 'té prêsèrvés), des mangnifiques musées (et tchi trésors!) et des cathédrales et églyises tchi sont fanmeûthes à vaie. Tout si bein gardé! J'vînmes iun des pus grands palais au monde où'est qu' entr'aut's choses, y'a l's oeuvres des fanmeux peintres Léonard de Vinci, Titian, Rembrandt et Rubens, et i' s'y trouve pus d'deux millions d'objets comme exhibits. La grandiose Cathédrale Orthodoxe dé St. Isaac, tch'est un musée d'nouos jours, pouvait prendre tchînze mille pèrsonnes en même temps ès sérvices aut'fais. À Leningrad j'vînmes comme tchi qué tout r'a 'té r'construit auprès aver 'té saccagi et ravagi dans l'temps d'la dreine dgèrre. Mais, tchil êffort! Et, en pâlant d'chenna - quand nou pense qué pus d'vîngt millions Russes fûdrent tués dans chutte dgérre... Tchi tchérnage! Et tchi mînséthe pouor un peupl'ye à surmonter! Nou vit étout lé supérbe par dé Petrodvorets (lé Versaîlles dé la Russie) tch'est en êffet eune ville dé pavillons, gardîns et fontaines. I' faut vaie ch'la pouor lé craîthe ! Les Allemands fîdrent d'lus mus pouor en dêtruithe eune bouonne partie en 1941. Mais tout a 'té restauré mèrveilleûthement.À Moscou, où'est tch'i' faithait grand caud, j'restînmes dans la pus grande hôtel au monde, l'Hôtel Rossiya. Oulle est absolûment modèrne, sans doute, et a trais mille chambres et prend siex mille pèrsonnes en même temps. Nou fut, bein des fais, dans La Place Rouge ( Kpachbin Skbep en Russe), ou, comme dîthent les Angliais, "Red Square", et nou-s-y vit lé corps embaûmé du fanmeux Lénine dans l"'mausolée". Et dans l'Kremlin y'a tant d'tchi à vaie et visiter tch'i' faudrait des douzaines dé fielles dé papi pouor en décrithe tchiquechose.
Dans l'Ukraine lé paysage est des pus bieaux qué nou piêsse vaie, et j'feûnmes visiter, à chent kilomètres ou d'méme dé Kiev eune înmense férme collective, empliyant des mille pérsonnes atout machinn'nies modèrnes et tout l'bataclian. Dans la mangnifique ville dé Kiev et à l'entou nou vit tant d'tchi étout qué nou n'peut pon entrer en dêtails sans allouongni trop ch't accompte.
A Odessa et au bord dé la Mé Néthe (la Mer Noire) i' faîthait eune arsion et nou-s-avait d'la peine à duther, et à dormi la niet. Un jour méme lé thèrmomètre montit jusqu'à 96° F. à l'ombre. Lé temps 'taît si pouffre et mo qué nou-s-en'tait quàsi à l'êvanni. Eh bein, qué y'en a, des touristes sus les gréves dé la Mé Néthe - des mille et des mille et des mille! Odessa est supèrbe étout et, dans l's alentours, nou-s-en vit, dèrché, des choses mèrveilleûthes. J'peûnmes nouos bat'ler, dans l'couothant d'nouos viages, sus la Néva, riviéthe tchi pâsse lé travèrs dé Leningrad, sus la Moskova a Moscou, lé Dniéper à Kiev, et sus la Mé Néthe.
Enfîn, nouot' viage en Russie fut des pus întérêssants et instructifs tch'i' piêsse y'aver, et v'là tchi nouos prouvit acouothe eune fais tch'i' faut sans doute aller dans un pays sé-même pouor en aver tchique idée. L'Union Soviétique dé nouos jours a fait un progrès quâsi încriyabl'ye dépis la Révolution d'mil neuf chent dgiex-sept, et pis d'pis la dreine dgèrre acouo pus. Oulle a des grand's ressources et ses résèrves dé minnéra, tchèrbon, bouais et cétéra sont les pus grandes au monde. San peupl'ye travâle, et i' n'dait pon y'aver d'pièrcheurs. Lé pays des Czars d'aut'fais est bein difféthent à ch't heu, bein seux, tch'i' n'était, mais ch'est acouothe un pays tchi vouos fascinne et tchi vouos êtonne et, pouor mé, man viage en Russie restétha lé pus r'mèrquabl'ye qué j'piêsse faithe.
Né v'là don un p'tit résumé, mais Lé Sieur George L'Feuvre en donnit dé raides bouons r'cits, et bein pus compliets qu' chennechîn, dans les gâzettes du sé des dates du 4, 11 et 29 dé septembre et du 7 et 13 d'octobre, 1971.
Viyiz étout: