I'y eut du brit l'aut'e jour entre Laïesse Ernon et Maît'e Cliément d'Caen au "Show" des bêtes dans lus pâraisse.
Et l'affaithe vint si sérieuse que sinon que deustrais vaisins empoignirent Laïesse, je crai qu'i' s'en allait tapper sus l'bouonhomme.
Et tout chenna par la faute des juges qu'avaient soi-disant fait des bêtises.
I'y a dêjà tchique temps que Maît'e Cliément d'Caen se vantait qu'il avait une bête siez li qu'i' s'en allait mettre au "Show" dans la classe des jeunes vaques et qu'ou s'en allait brosser tout ch'qu'i' y avait dans la pâraisse, sans pâler de ch'qu'ou s'en allait faithe à l'Exposition d'la Sociêté à Springfield.
Laïesse, li qui l'avait examinée deus-trais feis par sus l'fossé, s'en motchait, car selon li ou n'avait pas à deux sous d'piécho, les trans d'driéthe li pitchaient et oulle avait la croupe en ravaillard.
Il en avait iune siez li qui valait bain mus qu'chenna et sans faithe mîne de rain i' s'décidi d'la soigni un mio et d'la montrer au "Show" afin d'bâlli une surprinse au bouonhomme et l'faithe enragi en l'battant, comme nou dit, hand over fist.
Joseph Le Boutillyi en eut l'vent, et en fit part à san maître, mais Maît'e Cliém. dit comme chenna, "Jamais Laïesse Ernon n'a breedé aut'e chose que des charouognes, et ch'n'est dame pas li qui s'en va m'faithe peux."
Tout ch'la 'tait bouan à dithe, mais l'aut'e jour quand Maît'e Cliément arrivi au Show avec sa vaque et que l'sécrétaithe li montri ouest qu'i' fallait l'amather, le bouonhomme en aperchu iune qu'était là tout près sus la même ligne, qui pathaissait djantrement bain faite et qu'était pus grande que la sienne.
I' d'mandi à Joseph Le Boutillyi s'i' connaissait chute bête-là, et quand Joseph li dit, "Mais oui, ch'est là la sienne que j'vos disais, ch'est là la vaque à Mess Ernon. "Aïe, aïe," s'fit l'bouonhomme, oulle est miyeuthe que j'n'aithais creu, mais ou n'battre pas la nôtre quand même!"
Enfin tréjours, quand vint l'temps pour dêhaller la classe des jeunes vaques, v'la tout l'monde à bringi lus bêtes pour les mettre aussi belles que possiblye.
Les juges étaient dans l'ring à l's attendre, en en v'la neuf ou dgix d'montrées dans chute classe-là.
Laïesse Ernon menait la sienne li-même tandis qu'Joseph menait la sienne à Mess de Caen.
Le bouonhomme était d'but parmi d'autres fermiers en d'hors de la corde, à cratchi sa vaque à tous les siens qui voulaient l'êcouter. Opprès les aver faites marchi attouo du "ring" une fais ou deux, un des juges criyi "Touânez-les d'bord!" "Là!" s'fit Maîte Cliém, ès siens qu'étaient auprès d'li, "tch'est qu'j'vos avais dit? Ou viyiz bain qu'la sienne à laïesse Ernon n'a pas l'piécho si bouan d'chu bord ichin!"
Au même instant les juges firent signe à Laïesse d'amener sa vaque au mitan.
Le bouonhomme touâni blianc comme une chique et ne r'dit pas un mot. Une minute opprès iun d'ieux s'appréchi d'la vaque au vi, li passi sa main sus la croupe li pinchi la couenne, comme tout bouan juge dait faithe, et dit à Joseph "Mets-la à côté d'l'autre."
Quand Maît'e Cliém vit chenna i'r'dévint tout joyeux.
Opprès qu'les juges en eurent chouaisi quatre ou chînq, i's'en r'vinrent examiner les siennes qu'étaient au mitan. Laïesse Ernon laissait la sienne paître pour tâchi qu'les juges ne vissent pas qu'oulle avait l'rein souplye.
Joseph, li, à la pliaiche de tender sa vaque ne dêclyinnetait pas de sus les juges. Le bouonhomme de Caën avait biau li faithe des signes que sa vaque n'était poas bain pliaichie, Joe n'en viyait rain. Au but d'un quart d'heuthe les juges étaient évidemment arrivés à une décision et i'prinrent les numéthos. I' c'menchithent par la naithe vaque à la veuve à Manuel Desperques, et pis la sienne à Laïesse Ernon, prinrent lé numétho d'une petite jaune qu'était au but et finirent par la sienne à Cliément d'Caen!
Un fermi li dit, "Je n'crai pas qu'ous êtes prumi, Maît'e Cliém."
"Bah, bah," s'fit l'bouonhomme, "nou n'peut pas s'fier là-d'sus, j'ai veu les juges faithe chenna bain des feis d'vant qu'annièt."
Et i' s'en fut vaie tch'est qu'était mertchi sus la board.
I' s'en r'vint tout content.
Sa vaque était prumiéthe, la jaune deuxième, Mrs. Desperques treisième et Laïesse Ernon avait tchaît quatrième.
"J'savais bain," s'fit l'bouonhomme.
Quand toutes les classes furent jugies, le Sécrétaithe erfit dêhaller toutes les siennes qu'avaient ieu des prix pour saver tch'est qui s'en allait gagni l'Championnat, comme ch'est la règl'ye dans à peu près touos les clobes.
Nou s'en fut cherchi treis autres juges qu'avaient 'té tout l'temps à jouer ès dominos dans la tente, et qui n'taient pas supposés de saver rain de ch'qui s'etait passé quant ès prix dans les difféthentes classes. I'y avait pus d'deux chents personnes attouo du "ring."
Mêmes procéduthe et les mêmes tactiques comme dévant, de la part des juges.
Mais chute feis i' n'en hallithent que deux au mitan, iune qu'avait prins le deuxième prix dans les vieilles vaques, et la sienne à Laïesse Ernon!
Sus un signe de Mess de Caen, Joseph Le Boutillyi êprouvi à amener sa vaque souos l'nez des juges, mais iun d'ieux li dit de s'en r'aller tout-d'suite le long d'la corde.
I'minrent alors touos les treis à compather les deux vaques avec la pur minutieuse attention. I'lus m'usuthithent la coue, lus pinchithent oquo la couenne, et lus r'gardithent en d'dans d's ouotheilles.
Je n'sais pas tch'est qu'i li virent, mais iun d'ieux chuchotti tchiquechose ès deux autres, qui firent un p'tit signe de tête comme pour dithe "Vaithe," le prumi fit v'nin l'Sécrétaithe qui portait à sa main un biau riban tricolore, et avec le but d'sa cigare i'pointi à la vaque à Laïesse Ernon. Oulle avait gâgni l'Championnat!
Le vier de Caen vint comme un fo. I' dit comme chenna "Je n'sais pas comment que l'Comité vaint à chouaisi des gens comme chenna à servir d'juges! I' faudrait au mains nommer d's hommes qui savent tch'est qu'ch'est qu'une vaque!"
Deux des officiers du clobe emmenirent le bouonhomme à baithe une feis pour le trantchiliser, mais il eut l'malheur d'y rencontrer Laïesse Ernon qu'était à célébrer sa victouaithe avec deustrais d'ses amins et pis ch'tait là que l'brit c'menchit.
Comme se fit Maîte Cliém. "Une carne qu'a bain d'la peine à faithe le quatrième prix dans sa classe et pis qui gagne le Championnat?"
Et Laïesse Ernon raîponnit "Ch'que je n'comprends pas, ch'est comment qu'les juges dans la classe ont peut mettre votre bricole prumièthe, les juges du Championnat n'lont seulent pas r'gardée, gasdéouelle!"
Une pathole ménit à l'autre et les deux vaisins s'entre traitirent de tout, dans un langage qui n'peut pas s'imprimer dans les Chroniques, (not'e typo, est un homme qui, pus ou mains, s'respecte)
Eh bain, pour en fini pus court, i'y eut une longue distchussion parmi les fermiers quant à la capacité des juges, quant ès mérites des deux vaques etc. Les uns disaient que la vaque à Mess Ernon était trop basse comme quatrième dans la classe mais qu'ou n'aithait pas deu aver ieu le Championnat, qu'la jaune valait mus qu'lui. D'autres trouvaient que Mess de Caen avait ieu la chance de v'nin prumi avec des trans comme sa vaque avait, enfin tout l'monde avait une difféthente opinion. Ches jugements là, comme bain d'autres qu'ont 'té donné chute semaine, restethont tréjous un mystéthe bain difficile à résoudre.
Enfin tréjous, Cliément d'Caen et Laïesse Ernon sont comme nou dit, "à gorge copper."
Cahouain
Les Chroniques de Jersey 17/5/1919
Viyiz étout: