|
Ma pouôrre vieille vaque oulle a crévé. Ou fut saisie d'une fièvre d'lait; Le Vet, la viyant, châque la tête: "Oulle est fichue, man Ph'lip, ta bête." A l'âge d'un an j'ai veu miyeu. Ou tait grossièthe et tête de boeu. La Merrienne dit: "Vend-la, bouonhomme, Ou vaud ocquo tchique petite somme." Mais j'dis: "Nouffé, j'la gardethai; En craissant ou peut raffiné, Oulle est de yunne des miyeu vaques; De sa grand'mèthe j'en vait des traces. Tu me r'dithas, ma vieille, bétôt, Quand j'la dêhall'lai pour le show." Ou s'mint à rithe: "pouôrre imbécile; Tu'ès pûs achocre que ta belle-fille. J'ai ouï pâslé de juges de bêtes, Etout d'juges qu'ont pérdu la tête, Mais un prix pour chutte quédolle-là? Nânin, man Ph'lip, ah nânin-dgia!" "Ecoute," j'l'y dit, "tu n'y gâgne rain, J'vait déja l'riban dans ma main, R'venant du show des Trais Pâraisses, Mais j'avons l'temps; n'y' rain tchi prêsse." Et, ma fé! comme le temps pâssait, J'viyais ma g'niche se raffiné. Touos les matins j'vos la bringeais, Et d'temps en temps j'vos l'êcredais. A trente mais ou donnit un boeu, La Merrienne avait mal au tchoeu, Ou voulait l'envié sûs la maie, Mais j'dis: "dame, nânin, pas chutte fais." Et j'démontri hardi d'bouon-sens, Car bétôt ne v'la un marchand, Tch'examinit san pedigree, Et l'accatit pour chinquante louis. Ach'teu, trais jours après l'vêlage, J'dêshalle ma g'niche - tchi bel image. J'dis à Merrienne - "laisse tan travas, Dêpêche-té, et mets chonnas bas." Nos v'la dans l'bel. "R'garde ben Chen tu'éthais vendu pour un rain. Examine-la, épis dis-mé Si j'n'ai pas raison d'm'en vanté. R'garde s'oulle a l'piéchot ben fait, Si ben lanchi et ramonté, Les trans si draits et ben pitchis, Et des veines au pliaîsi d'la vie. Sa tête, et ses êpaules si fines, San front creusé, sa noblye mine, San breûchet et la ligne parfaite, Sa coue longue et comme une badguette." La Merrienne n'avait mot à dithe. Chutte fais ou n'se mint pas à rithe, Mais j'viyais ben qu'oulle tait surprinse Quand ou s'en r'fut féthé ma qu'minse. Djais jours après, l'temps étant biau, Me v'la tch'y mène ma g'niche au show. Ou tait parfaite; j'n'avaie pas d'gène, Car ou s'comportait comme une reine. Y'en avait djais-huit dans la clâsse, Et l'tout du ring du monde en mâsse. Un gros moussieu, fumant sa pipe, Dit - "Il en a une bouonne, le Ph'lip." Pour un quart-d'heuthe je cirtchutîmes: Quarante-chinq fais le tou je fîmes; Les juges, les mains dans lûs pouchéttes, Et l'air sérieux, chaque g'niche y dguéttent. Et comme je marchais, je m'dîsais: "Nos deux Mêssieux n'peuvent pas y vais. Sans autchune doute, j'ai la pûs fine, Mais p't'être que ch'est tch'y font la mine." Et j'n'éthais pas deu avé d'peux, Car tout d'un coup, n'en v'la yun d'yeux Tch'y m'fait un signe avec sa main, Une chose que j'comprenais raide ben. Y vintes l'y hallé sûs la coue, Vais si l'piéchot tait à lûs gout, Inspecté le d'vant et l'driéthe Comme tout bouon juge dait tréjous faithe. La fin en fut que chu jour-là, Ma g'niche remportit l'championnat, Parmi de grands applaudissments, Et sans doute des raffraichissement. Rentrant dans l'bel, ôv mes rubans, et tout-à-fait dans man bouon-sens, J'dis à Merrienne - "r'garde ma pie, chen qu'tu'éthais vendu pour chinq louis." Comme tout l'monde sait, pour des années, Ma vaque à tréjous tait montrée. J'avons des coupes et des tchuliers Assez pour vos êbloui l's'iers. J'l'éthais vendue y'a ben longtemps, Mais quand y nos v'nait un marchand, La Merrienne s'y'opposant, dîsait: "Touos vos sous n'peuvent pas l'accaté." Si y'a un ciel - après tout pourtchi pas? Pour les vaques tch'ont fais lûs d'vé ichin bas, Dites mé, garçons, criyous pon, avec mé, Qu'nou trouv'tha là Nancy du Portinfé? E.L.B. |
Viyiz étout: