Moussieu l'Editeu,
Hier matin, j'tiomes à dêjeuné, la Merrienne et mé, quand ou dit comme chonna. J'ai tait êpié la bordeuse, Ph'lip, et les patates ne bouogent pas. Y sont comme êtranglies, et j'voudrais savé pourtchi. Ne v'la bétôt neuf s'maines tchi sont en têtrre et y dé'vthaient être au mains houettées."
"Vèthe," j'l'y dit, "et y n'sont pas ocquo grapinées, et ch'n'est pas êtonnant, car ils ont sé, et y n'veint pas une goutte d'iau. Y restéthont à maintchi mortes en attendant une bouonne achie."
"Mais nous éthait creu quand-même que y'éthait yeu ocquo un mio d'mouoilliêtuthe dans la têrre," ou dit, "et ne v'la pûs d'tchinze jours que j'vais l's'arrôsé avec les iaux que j'fais sèrvi pour lavé la vaisselle et les cannes à lait."
J'eut à rithe, Moussieu, car j'trouvais la Merrienne bein drôle. "Ma pouôre fille," je l'y dit, "ch'est comme si, quand tu veur une grande tâsse de tais, nous t'en donnait la maintchi d'une tchulliée. Nânin, y faut attendre jusqu'à chein qu'la Providence nos enviêtha un bouon jour ou une bouonne niet d'plyie."
"Nou m'a dit," ou s'fit, "que si nou s'était à tithé des coups d'canon du haut du fort ou du Mont-ès-Pendus, v'la tchi pouorrait faithe du bein. Y pathait qu'chonna a réussi en Améthique et en Australie. Pourtchi, qu'tu n'en pâsle pas à notre Député, l'y tch'a tait si longtemps soudard et tch'y sait chein qu'ch'est qu'un canon? Et sans doute le Connêtablye de Saint-Piêrre ne dithait pas nânin si nou l'y d'mandait d'prêté chu canon à Biaumont."
"Tu r'dote, Merrienne," j'l'y dit. "N'y'a pas un homme dans l'ouest tch'y n'éthait pas peux d'méttre chu vier canon-là en action. Mais pâslons de tchiquechose d'importance. As-tu caltchulé, par exemplye, que ch'est l'show des boeus, Vendredi tchi veint?"
"Nânin," ou dit, "je n'y'ai pas seulement pensé. Mais j'pense bein que, comme de couôtume, tu s'sas à couôre ichin et là pour deux ou trais s'maines pour vais chais saccétins shows, me laissant ichin toute-seule à faithe tout. Mais j'te dgérnis que chutte fais j'ne f'thai pas un coup d'travas en d'hors. J'réstethai dans ma tchuîsine, sinon pour allé soigni les poules et les lapins. Quant au réstat tu peux trouvé du monde à l'faithe."
"Eh bein, si ch'est d'même, Merrienne," j'l'y dit, "et qu'tu'ès bein décidée, y faudra qu'je m'graie de tchique manièthe, car nou n'peut pas laissi les béstiaux crevé d'faim. Ach'teu, y faut qu'j'aille baillyi un coup d'êcrède à man p'tit boeu, car il a ocquo du vier pé, l'balloque, et je n'voudrais pas l'montré d'même."
La bouonnefemme se r'dréchit dans sa tchaise. "Mais absolûme nt, Ph'lip, tu n't'en vas pas montré chutte quédolle-là!"
"Si-fait," j'l'y dit, "j'm'en vais l'montré. Si j'veur en faithe trais mille louis pûs tard, il est temps qu'les gens l'vaient, et j's'y bein seux tch'une fais tch'y l'éthont veu y n'le r'oubliethont pas. Tchèsqu'il a don chu boeu qu'tu l'apélle une quédolle.?"
"A qu'menchi," ou dit, "il est bein trop p'tit. Avec chonna il a l'mûsé d'travers, la coue crotchie, le dos ranç'lé et une tête de chameau, chein tchi l'y faut à ch't'anima-là, ch'est un bouon coup d'maillot et un creux dans l'gardin à pommiers."
J'me l'vit, Moussieu, car je n'voulais pas m'mârri, mais en sortant j'freunmit la porte si raide que toute la maison en tremblyit. Ch'est une habitude que j'ai quand j'veur dêmontré à la Merrienne qu'ou m'a hardi dêpliut. Mais quand je m'trouvit dans l'êtablye, et qu'j'éxaminit man boeu du haut en bas, comme nou dis, je m'grattit la tête, et j'rentrit pour téléphôné au bouochi. La Merrienne souôrit et m'dit d'm'assièthe et qu'ou m'donn'nait un lermin de chein qu'une femme offre à s'n'homme quand il a tait un bouon garçon.
Pour changi l'sujet, Moussieu, nou m'a dit qu'à Saint-Piêrre les gens sont ocquo à lièthe le papi d'Sam'di pâssé. Y pathait qu'y'avait tchiquechose tchi l's'intérrêsit hardi. Savous, par chance si ch'tait Ph'lip et Merrienne?
Ph'lip
Les Chroniques de Jersey 23/4/1955
Viyiz étout: