Mister Pain Betrays Herd Book Secrets

Ch'est eune vaque Jèrriaise

Ou m'dithez que v'la tchi n'me r'garde pas, et ch'est un mio vrai; mais tout d'même, y faut qu'j'en dîse tchiq' chose. A'ch't'heu que j'sis villais, et quaziment éditeu d'la pus importante gazette de l'Ile. A bon d'gens prédendent que l'Post vend pus d'gazettes que nous. J'n'en disconvains pas! Châtchun san gout coumme disait la bouonne femme qui mangeait san héthan ov eunne beurrée d'glée; mais pour eunne gazette séthieuse ov les dernié nouvelles de la dgèrre, l'prix des fonds Portungaies, les chares qui faut pliéchi ses sous quand nous a yeu d'la rente remboursée, et coumment va la santé du Roué d'Russie; ch'est nous qui soummes IT, coumme disent les Amethitchiens.

Mais r'pâlons d'nos moutons, coumme disent les Avocats quand y sont a faithe le compte de lus clients; j'voulais vos dithe deustrès mots sus la Société d'Agritchultuthe. J'en savais dêja long dans l'temps que j'forgais a Saint Jean. Nou oué le d'vis des campagnards tout en liment des bigornes et en êsmoulant des scies; et j'savais quazi tréjous tches-qui-fait qu'la pus belle g'niche du Show n'avait yeu qu'Rêserve, et pourtchi que Coopeur né v'nait jommais siez man vaîsin.

J'en ai oui bin d'autes dépis! L'gardin du Bos que j'sis a foui - j'en fis très pérques la s'maine passée - ch'attendant qu'l'odeu d'ielle s'en s'ait allée au vent, est le long d'la grande route; chaque fais qu'un fermi passe, j'crie Hai! et j'tcheur contre le fossé d'èspinnes. Y'en a qui sont prèssis et n'veulent pon arrêté; d'autres qui m'envient eunne lache de fouét, et d'autre qui m'disent d'allé m'faithe quatorze. Mais y'en a yun qui ma dit un tas d'sécrets en m'faisant juthé sus la crouéx d'ma bêque d'n'en soufflié mot a persounne. Ch'est-tan-tchi, j'vos raconte tout.

Tout vieau devtha etre photographé a sa naissance, ès frais du fermi. S'il a du blianc, nou le r'counaîtra tréjous bin après; si na pon, nou lis pas'a un cadnas travérs la lévre; l'fermi paietha l'cadnas, et la clié s'a gardée au Board Room.

Quand eunne bete itha au boeu, y faudra en prévnin l'Chantnyi qui sin'na un affidavit coumme par le tchél il a vérifié l'cas. L'fermi lis doun'na a dîné (du boeu rôti). S'ou r'touône, les témoins n'éthont qu'eune fais a béthe; et s'ou r'touône oquo, l'propriétaithe du boeu s'a amné d'vant l'Coumité du H.B. et mins a l'amende pour avé un tait faillyi boeu. L'Boeu s'a abattu.

Dvant que d'vendre eunne bète, y faudra consulté l'Coumité pour savé tchi prix en d'mandé. Y'étha ching du chent pour la Société, et l'jour qu'ou s'a "shippée," touos les membres du Coumité du H.B. ithont sus la cauchie vérifié si tout est en règlye, dèsjeun'na en ville ès frais du vendeur.

Quand yétha un Examen du H.B., che s'a les fermiers qui dithont si veulent que lus bête sait C. ou H.C et si les juges r'fusent, nou halla a la courte-paille. Les C. paiethont un êstchu; les H.C. sept sh'lings et d'mi; et les siennes qui ne s'on pon approuvés du tout s'ront mins a l'amende pour avé èslvé eunne telle quédolle. Touôs les Highly éthont eunne fais a béthe ès frais d'Mess Nicholson.

Eunne fais l'an, tchiq' un du Coumité itha siez l'fermi compté ses bêtes a cône; si y'en a pus que ch'qui y'est alloué par les Régliéments - yetha du bri! Ch'qui yetha d'surpus s'a vendu dans la Féthe pour le benefice d'la Société.

Y s'en va fallé m'suthé l'lait d'chaque vaque touôs les jours. Eunne fais la s'maine, Nicholson itha pesé les vaques pour cartchullé l'èstchipolan pour l'année. Y portétha ses balanches avec li.

Touôs ches renseignements ichin m'ont 'té fournis par un membre de la Société qui passe souvent l'long d'man fossé. Y'a oquo eunne raccachie d'régliéments touôs frais pounnus: mais j'n'ai pon d'run anniét pour vos en dithe pus long.

J'entends dithe que touôs les fermiers sont dans la jouée.

Piteur Pain
Morning News 15/1/1913