Ervelà les "shows" erquémenchis, garçons. Dans chute saison ichin, chest mé qu'en fais du trajet. Je sis obligi d'allé partout et d'n'en mantchi pas iun, car le Chef veur tréjous vos dounné une acconte de tout chenna et même mettre les portraits d'vos boeus dans sa gâzette. Y m'est bain difficile de vos dounné autchunne chose de nouvé sus chu sujet là, ch'est tréjous la maîme vieille histouèthe. Le matin du "show," le bouanhomme, qui n'a pas quasi dormi d'nièt, fait tout l'monde se l'vé à d's'heuthes abominables. Y faout qu'les hardelles caouffent de l'yiau la prumié chose pour erlavé les tchèsses à "Cream Pot's Interested Noble Boy" qui s'est crotté un mio duthant la nièt. Si sa coue s'es dêplaittée, y faut tout d'suite la rarrangi et la r'env'loppé dans une fraîche chitchète; daeux des garçons se mettent à lis r'gratté les cônes avec du verre et du sand-paper et opprès chenna, il' les frotte avec une chitchète huilée. Quand tout chenna est fini, le bouanhomme esprouve à lis faithe prendre une bouq'tée d'êcaoudeuthes, et ou savez bain comment que v'là tchi fait généthalement le matin du "show," le maoudit boeu n'veur pas seulement la r'gardé. V'là tchi met le bouanhomme de maouvaise humeur et il est comme un satan tout l'temps qu'nous est à dêjunné.
Le grand des garçons, qui n'veur pas avé l'embarras du j'va et d'la vainne, propose que nou marche le boeiu jusqu'au terrain de l'exposition, mais le bouanhomme ne veur pas en ouï pâlé, li, car y dit que les boeus jibent sus le qu'min et lus excitent et quand nou les présente devant mêssieux les juges, y sont fliâts comme des âtelles (les boeus, pas les juges, car ieux, au contraithe, y soignent tréjous de lunchi bain devant que d'lus mettre en travâs). Eh bain, opprès une longue dispute, ch'est le vieux qu'en gagne, et quand veint l'temps nou met la vainne en pliaiche et nou dêhalle le toré pour le chergi.
La bouannefemme et les filles sortent dans l'bel pour le fliatté et l'admithe occouo une feis et deustreis des vaîsin lus trouvent là ettou, et comme nou proumène l'anima attouo du bel y disent au bouanhomme que ch'est l'miyeu boeu qu'y ait en Jêrri.
Dans bain des temps, dès qu'nous à le dos touânné ches mêmes gens là s'entre disent "Tchest-qu'y gâgne de montrer un patheille quédole?"
Ch'la vos êtonne, est-che pas garçons, que l'Caouain sait toutes ches p'tites choses là mais ou savez, tout-de-même que je sis à vos dithe la vethité.
Eh bain pour ervenin à notre boeu. Dès que la vainne est baitchie en pliaiche nous êprouve à faithe le boeu marchi dedans, mais il a peux li et y met un pid sus l'driéthe de la vainne mais r'fuse d'aller pus liain. Nous a biau haller et pousser, nou ne peut pas l'faithe bouogi un pouce, à la fin le bouanhomme se mârrie, et y crie "Hue, don!"
La jument crait vue ch'est à yi qu'nou pâle et oulle avanche deustrais pas, yun des garçons est élingi dans la route avec le boeu quasiment par sus li, et v'là pus dispute que jamais. Le bouanhomme en est tout blianc, li, de penser qu'san boeu a quasiment 'tai trébutchi, et il ordonne que nou dêlye la vainne et qu'nous y marche, au fichu "show."
Quant à la routine de ches expositions-là chest tréjous à peu près la même chose.
Toutes les bêtes sont sus l'terrain pour djais heuthes et d'mie, les juges arrivent de vier onze heuthes et à la pliaiche de les mettre à lus bésogne, nou lus dit "Passez par ichin messieux," et nou lus offre un "lunch" somptueux. Tchiquefais y en a d'entre yeux qui viennent justement de dêjeuner mais ch'la ne les empêche pas de faithe oquo un bouan fricot quand-même.
Dans unne demi-heuthe, les r'velo qui sortent avec châtchun lus grosse cigare à la bèque, et v'là tout d'suite les exhibiteurs à dêcouvri lus animaux et à lus dounné le coup d'bringe final devant que d'les présenté d'vant les juges. Les spectateurs forment un grand "ring" et les juges se pliantent dans l'mitan et nou fait les compétiteurs marchi tout attouo. Les juges les r'gardent de travers en maoulant lus cigares, et ch'est dans chu moment-là que nou ouait des r'merques qui sont faites à vouaix basse par tchiqu'uns des spectateurs.
Joe dit à Ph'lip: "Comment que not'e comité est v'nu à noummé un tel comme juge? Il' ont roublié les bêtises qu'y fit l'année passée quand y dounnit la "sweep" à un treisième prix"
Et Ph'lip lis raîpond peut-être: "Che n'est pas tant li que j'crains, mais ch'est le sien qu'est avec li. Tu t'en vas vaie qu'y s'en va donné l'prumi au boeu à Charles."
- Pourtchi ch'la?
- Parce qu'il est fait du vièr boeu à s'n onclye!
Par chu temps-là, les juges ont mint les boeus en ligne et sont à lus pinchi la couenne et à lus m'zuthé la cone, et à la fin, le sien qui tchaint la "board" demande les numéthos ès difféthents hommes qui les mènent et les envie à les ramathé.
Selon le résultat, la critique erquemenche comme de pus bé.
Opprès que toutes les classes sont jugies, nou fait sortir les gagnants des prix dans les difféthentes pârraisses et nou va ramassé les juges des "sweeps" qui sont trantchillement a joué ès dominos pardedans.
Lus job à ieux ch'est de décerné un biau riban à la miyeu bête dans chaque classe. San doute, y n'savent pas les tchelles qu'ont yeu les prumiers prix avec les aoutres juges; alors y s'arrive tchiques feis que des jugement sont renversés.
Mais je n'gagne pas rain de m'êtendre sus chu sujet-là, ous-y counnaissiz tous pus qu'mé.
Caouain
La Chronique de Jersey 5/4/1913
Viyiz étout: