Au Portinfé,
Saint Ou,
Vendredi au sé.
Moussieu l'Editeu,
Ch'est sûs l'tard que j'vos écris assêsé. Mais n'y'a pas longtemps que j'sis r'venu du show, et j'n'avais pas yeu l'temps dans la s'maine.
Chês'que je n'sis pas content; ah damme ben seûx. Et j'm'en vais vos dithe pourtchi.
Comme ou l'savez, j'avais entré ma g'niche r'nouv'lée pour le show. Touos les matins et touos les siers por le dernié mais j'ai pâssé une bouonne heuthe à la brîngy et à l'êcrédé, et quand j'la mettais au clios ch'tait tréjous avec une couvertuthe pour faithe seûx qu'ou n'prendrait pas fraid.
A matin j'me sis l'vé d'bouonne heuthe pour l'y dêmêslé la coue et y'arrangi ses cônes, et quand j'm'en sis allé la m'né au show je m'sis dit que j'tais seûx d'au mains une coupe et p't'être le championnat. J'ai même emprunté tchiques ch'lins d'la Merrienne por convié m's'amins.
"Et prend bouon soin de r'venin tout drait," ou s'fit. "Ne veint pas m'dithe à djais heuthe et di'mie qu'les juges v'naie justement d'fini, car dans chu cas-là y'etha du brit.
"Ne t'gêne pon," j'l'y dit. "Je s'sait r'venue pour les tais avec ma g'niche et ses ribands, sans pâslé d'autre chose. Mais dis-mé, Merrienne, si j'ai une offre pour, combain tchi faut qu'j'en d'mande?"
"Ch'est accordant chen qu'ou fait," ou raiponnit, "mais au tout mains chinq chents louis. N'faut pas la donné, tu sait ben, épis chais Améthichains-là sont pliens d'sous. D'mande huit chents à qu'menchi. Tu pouôrras tréjous rabattre un mio."
Eh ben, Moussieu le moment vint pour allé dans l'ring et bétôt nos y v'la a faithe le tou por djais minutes tandis qu'les juges faisaient la mine d'examiné nos bêtes. Après chonna y fallut les touôné d'bord pour montré, sans doute qu'y'avait étout deux trans d'chu côté-la. Pour dithe vrai Moussieu j'qu'menchais à m'en engnié, et ma gniche étout. Nou viyait chonna par la maniéthe qu'ou châtchait la coue.
Epis la grande surprînze. Yun des juges s'en veint et fait un signe à un gâs tchi m'nait une vraie bricole, d'la m'né dans l'mitan. Une minute après n'en v'la un autre tch'y s'y'en va épis une trâisième et une quatrième. Pour en finit dans p'tit d'temps, y'en avait neuf en rang, tandis qu'mé et ma g'niche taient restés l'long des cordes. Y n'en voulaient pas d'la pûs belle gniche que l'Portinfé a jamais veu.
N'y'avait rain à faithe, et fallait s'contenté, mais, la classe finie, j'empoignit yun des juges et j'voulit savé tchêsque il avait veu dans ma bête tchi n'y'avait pas pliu et pourtchi qu'ou n'avait pas yeu l'preumié prix.
"Eh ben, man Ph'lip" y'm'dit, "si ta g'niche n'avait pas une tête comme un mâillot, et si oulle avait l'co un mio pu fin et l's'êpaules mains grossiéthes, et si oulle avait pûs l'bathi et une miyeu croupe, et si ses trans n'pointaient pas l's'uns à l'êst et l's'autres au ouêst, et s'ou n'avait pas un dos comme un chameau, et la coue crotchie, je n'dis pas qu'nou néthait pas yeu un riband. M'n'avis à té ch'est d'la r'couvri tout de suite et d'la r'mettre à l'êtablye au pûs tot.
Et don, Moussieu, ne v'la chen qu'j'en eut. Et d'pîs qu'ch'est d'même, et qu'je n'gâgne rain d'la m'né en ville, avec des juges tch'y n'y connaissent rain, je sis prêt à vendre ma g'niche à bouon marchi. J'en ai pâslé à la Merrienne, et ach'teu j'n'en d'mandons pas pûs d'trais chents louis argents comptant. La voulous?"
Ph'lip
Morning News 10/5/1947
Viyiz étout: