Eune niet quand j'd'meuthaîmes à L'Abri à St. Martîn not' grise catte qué j'app'laîmes "Smokey" avait ieu chînq p'tits. J'taimes touos excités, man p'tit fréthe et mé, et j'pâssîmes lé lendemain au matîn à les dgetter. Etout, touos les mousses du vaîsinné vîntent les vaie chu matîn-là. À châque fais qué j'fus les môtrer à mes anmîns, j'mettais du lait frais bas pour la catte à béthe.
Dévièrs trais heuthes et d'mie, né v'chîn ma tante Eveline qu'arrive auvec lé Minnistre dé La Chapelle d'Êden. Ma méthe les avait învités pour eune tâsse dé thée chu jour-là, et oulle avait fait des p'tites gâches et des toutes pétites beurrées. Bein seux, j'voulais qu'i' vînssent vaie les p'tits cats étout.
I' fûtent lus assiéthe dans l'bouân parleux. Un p'tit brîn auprès, ma m'mée èrvînt dans la tchuîsinne pour faithe lé thee et ramâsser les gâches et les beurrées. Ou fit sèrvi les bouannes tâsses et assiettes, mais quand ou dêhalit sa bouanne canne à lait dé d'dans l'armouaithe ou 'tait viede! Eh bein, ou pâlez qu'ou m'en contit. Jé n'savais pas qué l'Minnistre s'en allait v'nîn, et j'avais donné tout l'lait à la catte!
Nos vaques 'taient déhors dans un clios liain dé la maîson et man péthe 'tait hors à eune vendue siez Hedley Maillard. Ou pâlez qué M'mée 'tait dans un êtat! Tch'est qu'ou s'n allait dithe au Minnistre? Ou l'vait ses bras en l'air comme pour prier au Bouân Dgieu dé l'aîdgi!
Tout d'un coup né v'la un train dehors. Ch'tait ieune des vaques à not' vaîsîn Jack Mêssèrvy qui v'nait ava l'bel au pliein galop traînant sa chaîne auvec lé paîsson sus l'but. J'couothînmes déhors. "Atrappe la", M'mée m'criyit. "N'la laîsse pas sé sauver". D'même j'tîns bouan la chaîne tandis qué M'mée, sa belle pétite canne en porcelaine à la main, sé baîssit et s'mînt à traithe la vaque, lé lait coulant dans la canne. "Là", ou m'dit, "amathe la à la muthâle et va dithe à Jack Mêssèrvy qué sa vaque est à banon".
Quand j'pâssis en d'vant d'la f'nêtre du parleux, j'viyais qué par un mithacl'ye ma tante et l'Minnistre bevaient lus tâssées d'thée et que M'mée avait sa canne à lait en main et un souôri sus sa fache qu'allait d'ouothelle en ouothelle!
Ursula Taylor
Viyiz étout: