Jamais au grand jamais, nou n-avait veu une vaque laitière qui fut meilleure laitière qu'la vaque à maît'e Phlip des envithons du mont d'la Grève-de-Lecq.
Je n'vais pon vous dithe combein qu'oulle baillait d'lait, d'beurre ou de crême, d'abord parce que vous n'm'crairez pon et pis viyant que je n'en sais rein. Mais pouor une buanne vaque ch'tait une raide buanne vaque.
I' arrivi qu'un bieau matin nous la trouvi malade dans l'pré. Du coup n'v'là maît'e Phlip dans touos ses états.
- Y a pon à dithe, la vaque est malade et bein malade, qu'i' disait à sa buanne femme.
- Eh bein, tch'est que t'attend pouor faithe v'nir le vet? qu'oulle li dit. Tu sais bein que Mess Dolphus a guéri la jument à not' vaisin. Y déshallera la vaque.
- T'as raison, mais y pathaît qui s'fait payi boustrement chi.
- Pathaît qu'oui, qu'dit la buanne femme, mais y a p't'être moyen de s'arrangi!
- J'vais tachi, réponnit Phlip. Et l'v'la l'buanhomme hors pour téléphoner de sièz san vaisin a Dolphus, l'médecin des bête.
- Quand le vet fut siez li, Phlip li d'mandi si ch'est qu'i' allait soigni sa vaque et la sauver.
- J'vais essayer d'la sauver , li réponni le vet, mais oulle est bein malade.
- Et combein qu'vous allez m'prendre?
- N' v'la qui dépendra des visites que j'ferai.
- Ch'n'est pon tout chunna, r'prit maît'e Phlip: voulous faithe un marchi avec mé?
- Et, tchi sorte de marchi, maît'e Phlip?
- J'ai ichin, dans l'tireur de chutte armouaithe, une bille de chinq louis d'ma saison d'patates et si ch'est qu'ou voulez che s'ra pouor vous que vous tuiez ou sauviez ma vaque. Chunna ira t'y d'même ?
- Entendu, réponnnit le vet.
- L'docteu' ès bêtes r'vint avec des remèdes, deux ou trais fais mais la pouorre vaque ne s'en r'mint pon et mouothi.
- Tchicques s'maines pus tard, l'vet arrêti son moto à la hêche du clios de maît'e Phlip. L'buanhomme 'tait grapiner des patates.
- Etes-vous d'charme à matin, Mess Phlip? s'fit le vet.
- L'buanhomme d'li r'pondre: Faut pon trop s'plaindre, mais n'v'la qui pouorrait être mus.
- Viyant que j'tais dans le vaisiné avec mon moto , j'ai cachi jusqu'ichin pour settler pour la vaque.
- Ah! oui, ch'est juste. J'sis prêt à settler si ch'est vot' buan pliaisi. J'avions fait un marchi, J'vos avais dit: que vous tuiez ou bein que vous sauviez ma vaque, pour vous che s'ra une bille de chinq louis.
- Vèthe, ch'est d'même que j'fîmes marchi.
- Eh bein, r'prit l'buanhomme Phlip, l'a vous tuée ma vaque ?
- Vous n'voudriez pon touot d'même ....
- L'a vous guérie?
- J'y ai éprouvé.
- Eh bein, tchès que vous réclamez ? Je n'vous dais rein!
Almanach des Chroniques de Jersey 1947
Viyiz étout: