L'idée d'avé des faites de bétail ichin n'est pas mauvaise, et ch'en est y'une qui dev'thait être prinse au sérieux par les fermiers s'i veulent la vée minse en pratique; car bein q'j'ayons une Société d'Agritchultuthe et un herd Book, les messieurs qu'en forment partie ne lus interraissent, i semb'yethait quasi, dans not' bestchâ, qu;en des occasions périodiques, - quant i lus trouvent rassemb'liés à tchique Hôtel pour disposé d'lus diné annuel: - i savent bein t'chi faithe d'la viande. Autrement les bêtes ne l's'intérressent pas fort, et si les fermiers veulent avé une faithe pour vendre lus vacques ès êtrangiers faudra qui lus en d'mentent yeux-mêmes. Et ch'n'est pas difficile; i' n'ont qu'à décidé entre yeux le temps qui lus s'ra l'pus convenab'ye et au jour décidé, filé, sé ès Landes où à la C'mmune de Guoray, avec lus boeu, vacques, vieaux, cuocons, biches, ch'vaux, canards, poules, etc., etc.;- car la faithe ne s'sait pas seulement pour les êtrangiers, mais ètou pour les Jerriais qui puorraient accaté, vendre ou êchangi lus animaux comme bon lus semblietait, et l'argent cirtchull'ait d'main en main et d'paute en paute. Ché s'sait là une miyeu manièthe de réaliser d'hauts prix pour ses bêtes que l'système actuel. Achteu i veint un commerçant ou deux à la fais et ils ont l'choix d'tou Jerri et i font lus prix yeaux mêmes, - en prenant bouan soin de n'pas l'mettre trop haut. - A une faithe centrale les conditions s'saient changies. Les êleveurs Améthitchains, Angliais, Norvégiens et Suèdoës, s'aient là tuous ensembl'ye et le pus payant éthai les pus belles bêtes. en un mot i lus netre f'thaient la barbe au profit des fermiers!
Quant à la suggestion que toute transaction es'sait payie argent-comptant ch'est une autre affaithe. Chèst à craindre qu'aussitôt que chu fait là s'sait connu i n'arrive ichin un grand nombre de messieurs exerçant la profession lucrative de pickpockets. Pensez à la happe qu'yuj f'thai s'i pouvait pliummé Mousieu Gorgen Larsen dès qu'il arriv'thai sus l'champ d'la faithe. T'chi boursée! au prix qui donne des vacques de quatre ans! I lis faudrait un porteux ou deux à lis trainé san capital de fermi à fermi. Ou pâlez d'avé une faithe deux fais par an, mais pour ma part je crai quasi qu'une seule faithe par an essait assez, car si n'ous' en avait deux, d'ouaique le bétail veindrait au but d'deux-treis ans? - Jerri vieddait.
P't'être que y'a oquo t'chique vièr campagnard qui peut s'rapp'lé la faithe de St.-Jean qu'avait lieu tuous l'z'ans y'a une chentaine d'années. Ch't'ai une diverse grand' fête que chutte faithe, et les marchands d'litcheu y faisaient des sous - et des sousous - mais les fermiers en faisaient ètou. Les bêtes à cônes réalisaient d'bouans prix y'a chent ans, et ch'la payethai d'résuscittai la "Faithe de St.-Jean."
Ph'lip d'la Golarde.
Viyiz étout: