San Antonio,
Lé 19 dé mar, 1983.
Moussieu l'Rédacteu,
Lé fait qué j'sommes dans l'mais d'mar mé fait penser au vièr diton Jèrriais tchi nouos dit "Quand mar entre comme un angné, i' sort comme un touauthé". Nouos anciens faisaient sèrvi deux mots pour distîndgi entre l'chein tch'était appelé touauthé quand san destîn 'tait d'êt' l'homme à la vaque eune fais capabl'ye d'entréprendre les fonctions d'mathiage, et l'chein tch'était appelé un boeu quand il 'tait fait sèrvi pour lier entre les limons d'un tchéthiot ou à la haie d'eune tchéthue, et tch' était généralement bête dé somme sus la fèrme. Mais ch'est dans l'tout pâssé, chenna, car lé nom d'boeu en avait dêjà gângni contre touauthé quand j'tais p'tchiot y'a pus d'nénante ans.
V'là tchi n'm'empêche pon quand même dé ravigoter l'vièr nom d'touauthé, sustout quand j'vai, dans la gâzette du dgix d'mar tch'est tchi s'pâssit à san sujet dans L's Êtats. Ch'est eune fichue bouanne chose qué chu fanmeux touauthé n'peut pon liéthe, car ché s'sait assez pour lé faithe affoler quand i' vèrrait qué même L's Êtats d'l'Île sont à êprouver à décider tchi faithe dé sa graine, tchiquechose tchi lî'appartcheint tout partitchuliéthement. Il a la réputâtion d'pouver faithe des d'gâts abomminnabl'yes dans eune boutique dé faïence, et jé n'voudrais pon l'vaie s'èrbînfrer contre les Membres tchi souôtcheinnent les cheins tchi sont en faveur dé faithe vénîn d'la graine, et entrer dans la Chambre et les corner comme i' faut. Ch'est seux tch'i' trouve qu' ch'es'sait eune însulte dé faithe sèrvi autcheune graine qué la sienne. Et nou peut-i' l'bliaûmer?
Et la pouôrre vaque, lyi, tch'est qu' oulle en dithait s'ou pouvait liéthe la gâzette? Dé s'vaie forchie d'accepter mathiage par "insémination" pour donner pus d'lait et du beurre acouo pus riche dans sa lîngne lî sembliéthait probabliément riditchule. Oulle a dêjà assez d'mînséthes à supporter.
I' n'y'a qu'à liéthe "La compliainte d'eune vaque" par man bouan vièr anmîn défunt "Élie" (Edwin John Luce), dans l' almonâs d"'La Nouvelle Chronique" dé 1914, pour vaie un accompte dé ses mînséthes. Par exempl'ye, à sa naîssance oulle est s'pathée d'sa m'mèe et ou n'est même pon pèrmînse dé s'nouôrri en chuchant les trans de san piéchot. I' faut qu' ou s'accouôteunme à chuchi l'dé du vachi en apprannant à baithe. Quand ou d'veint g'niche ou vaque, i' faut subithe l'îndîngnité d'et' embellie pour l'exposition, et pis oulle est forchie d'mathier un gros touauthé qu' ou n'avait janmais veu d'vant.
Ouaithe qu'ou n'est pon coupabl'ye d'aver fait autchun ma, oulle est tchiquefais forbannie dans un aut' monde auprès aver 'té s'pathée d'ses pathents, êfants et anmîns. Nou lî hale tréjous san lait, et finalement quand oulle est vielle et n'en donne pus assez pour pliaithe à san maître, oulle est m'née à l'abattoir et mînse à mort et mangie!
Ch'est bein întérêssant d'liéthe lé d'bat dans L's Êtats au sujet d'l'ûsage dé la graine, et d'vaie qué nouos fèrmièrs sont divîsés à bein près maintchi par maintchi dans lus opinnions. Et ch'est mèrveilleux d'vaie les longs discours des Députés d'la campangne. V'là tchi montre que tout l'talent oratouaithe n'est pon en ville. Ch'est danmage tch'i' n'sé mâtent pon sus lus pids d'driéthe à opposer ou tchestchionner les dêpenseurs dé sou ouaithe qué l'Sénateu Ralph Vibert lus ramémouaithe tch'i' faut aller douochement.
Ch'est r'mèrquabl'ye dé vaie tch'il est acouo pôssibl'ye dé trouver des candidats pour lé poste d'Chent'nyi dans nouot' méthitouaithe Police Honorifique. Ch'est cèrtainement l'Chent'nyi d'autcheune pâraisse tch'a la tâche la pus exigente dans l'tinné d'touos les jours dé tâchi d'dêcouvri la cause dé collisions et accidents d'motos, et d'garder la paix parmi tout l'monde. En aut's mots, nou peut dithe qué l'Chent'nyi est l'bras drouaite dé san Connêtabl'ye.
Et j'vai des noms Angliais parmi les Chent'niers êlus dreinement. Ch'n'est pon ravissant quand nou vait les noms des nouvieaux-nés dans la gâzette. Dans la cheinne du 10 d'mar, sus 20 naîssances i' n'y'en à qué quat' ou chînq tch'ont des vrais noms Jèrriais. Mais ch'est bouân sîngne dé vaie qu' assez d' Angliais, nés en Jèrri ou en Angliétèrre, montrent assez d'întéthêt dans l's institutions d'l'Île, et la vie d'touos les jours dédans, pour prendre part dans la fanmeuse Police Honorifique tch'a tréjous sèrvi l'publyi admithabliément.
Viyiz étout: