St.-Où, 24 Sept. 1872
Moussieu,
Je fu Vendredi passèt, le 20 d'chu mais, à chain qu'ils appellent un minting de Teetotallers, qui se t'nait dans la vielle Chapelle de St.-Où. Je fu bain content d'y'avé tè, mais y'avait eune chose que j'n'aimais pas. I'y'eut eune quillette de faite, et je r'merquais deux ou trais de chès messieurs qui v'naient d'nos faire des spiches, qu'avaient l'air d'attendre pour conter les sous, et y z'avaient raison, mais y s'trouvit eun p'tit nier-mitron, (nou nos dit qui s'app'lait Judas), y t'nait eune pouque, tappe la collecte dedans, fouôrre dans sa paute et cache le v'la allé; ses camarades n'en paraissaient pas trop contents, et ch'n'est pas êtonnant. J'lus r'quémande à l'avnin d'avé pus d'fermetèt et d'exigi qu'les sous saient contès en lûs présence, âutrement quant à mé, jène donn'rai pûs ès collectes. Espérant qu'en mettant chès dèux ou trais lignes ichin sûs votre estimablle journal, ché s'ra eune léçon pour nos emmins.
Criyis mé, Moussieu l'Éditeu,
Votre humblle serviteu,
Eun Vièr Campengnard
Viyiz étout:
Viyiz étout: