Nou dit qu'iun des présents les pus populaithes pouor la Saint Valentîn, ch'est eune pathe dé drâses. Bein seu, les galants et les hommes mathiés aiment vaie lus douoches habilyies dans des drâses bein belles – et bein p'tites – auve d'la dentelle et toutes en rouoge ou nièr.
Les femmes, ieux, donnent des boxeurs à lus tchoeurs, l'pus souvent, nou dit et chenna bein à propos, auve des tchoeurs împrinmés sus.
Mais y'a du nouvé ch't' année siez Marks et Spencer: l'êtchivalent mastchulîn d'la “brâssiéthe dé mèrvelle”. Véthe-dgia, mêssieux, des drâses tchi vos offrent la pôssibilité d' “amender” vot' profil là-bas auve l'aîgue dé Lycra.
Mais mêfi'-ous mesdanmes et mesd'mouaîselles, pa'ce qué même si né v'là eune opporteunité d'aver vot' èrvange pouor un présent d' brâssiéthe dé mèrvelle, vos galants né vos r'mèrciéthont dgéthe pouor la suggestchion qu'lus drâses né sembl'yent pon plieinnes comme un oeu.
Nos grand'méthes éthaient r'connu ches sortes d'habits comme chein qu'nou pouôrrait app'ler des cors modèrnes même si ach'teu nou fait sèrvi la technologie du Lycra à la pliaiche des baleines du temps pâssé – mais i' n'y'a rein d'nouvé souos l'solé!
Geraint Jennings
Viyiz étout: