|
J'ai r'mèrtchi aniet dans ta minne eune hardi triste iliade et coumme tchi qu'tes dés tcheinnent tes g'nouors atout eune bein tenvre gaffe. Êcoute, au liain, bein au liain là-bas ès bords d'la mathe Tchad, toutes les vailes d'hors, piann'te eune girafe. Oulle a l'don d'êlégance, habilyie d'grâce jusqu'à la heune, auve sa belle pé toute taqu'tée du griffouoillîn d'un tchéthaûd, auve tchi qu'oulle ôs'sait êgailli raîque ses cratéthes, chutte leune tchi s'droque dans la mucreu des mathes et tch'êcliaque dans lus ieaux. D'un but, nou craithait vaie les vailes bigathées d'un navithe; sa couôrrie ligiéthe coumme eune brise dans tchi qu'du ouaîth'lîn fliotte, et j'crai qu'lé monde n'en vèrra janmais eune pus grande pâssemithe qué quand ou s'muche à tchête dé jeu au tchoeu d'la marbe d'eune cotte. J'connais les contes à l'entou d'l'âtre des pays d'grand mystéthe entouor la jouaie d'eune néthe hardelle et d'un janne haut jutchi; tu'as 'té trop longtemps embliâsée et tu n'peux d'aut' y craithe, tu n'as pon d'soûffl'ye pouor autcheune chose, sénon craithe à la plyie. Coumme tchi t'raconter les gardîns tropiques où'est qu'nou pathade, les pitchets d'palmes, et l's aûtchies d'hèrbîn dé tchi qu'nou s'empaffe? Ch'est-i' qu'tu plieuthe? Êcoute... bein au liain ès bords d'la mathe Tchad, toutes les vailes d'hors, piann'te eune girafe. Nikolaï Goumilev Vèrsion Jèrriaise dé Geraint Jennings |
Viyiz étout: