Bouônjour bouonnes gens. Ch'est Anne Herrod tch'a l'pliaîsi dé vos presenter la lettre Jèrriaise, aniet lé six d'Janvyi.
Ch'est bein connu qu'les Jèrriais du temps pâssé 'taient des fanmeurs naviguants, mais tch'est qu'un Jèrriais 'tait à faithe en Russie, à la Cour d'l' Împératrice Cath'rinne la Grande, li'avisant au sujet d'êducâtion?
Parmi les papièrs d'man péthe, jé dêcouvris eune articl'ye tch'il avait êcrit pouor lé Bulletîn dé la Société Jèrriaise, souos l' titre 'Jersey International'. Il êcrivit entouor les histouaithes dé plusieurs Jèrriais du temps pâssé. Iun dé ches'-chîn et pouor mé l'pus întérêssant est Dannié Dumathés. I fut né en mille sept chents douze à la Trinn'té, l'chîntchième d'onze êfants du Juge Élie Dumathés, Seigneur d'Augrès et Élîzabé, la fil'ye dé Jean dé Cart'ret dé Vînchelez d'Haut. I' c'menchit s'n êducâtion à St Mannelier et pus tard i allit à l'êcole Abingdon en Angliétèrre et finnalement à l'unnivèrsité d'Oxford. I sembliait tch'i d'veindrait eon professeur dé théologie.
Mais, auprès siex ans à l'Oxford i viagit en Russie et fut nommé lé minnistre dé la mannifactuthe Angliaîche à St Petersburg. Ichîn, y'avait quarante ans, l'Empéreur, Pierre lé Grand, avait êtablyi la Capitale à l'entrée dé la riviéthe Neva. Quouaiqu' à chu temps là, St Pétersbourg 'tait acouo eune ville dé plusieurs huttes en bouais, les marchands dé Londres réalîsîtent qué chutte pliaiche d'veindrait hardi împortante pouor lé conmèrce.
Eune chentaine dé marchands Angliais d'meuthaient en d'ssus d'un ênorme storre en bouais, et Dannié Dumathés les jouaîngnit coumme minnistre. Pus tard i' d'vînt lé minnistre dé l'Ambassadeur Britannique, et duthant chu temps là, i' rencontrit la Grande Duchesse Cath'rinne et bein des gens, les pus importants à la Cour Rouoyale dé la Russie. I' restit à St Petersburg duthant dgiêx-sept années et pouvait pâler l'Russe couothamment. Duthant chu temps là étout, Dumathés continnuait ses êtudes èrligieuses et accomplyit, par correspondance, lé dégré dé Docteu dé Théologie dé l'Unnivèrsité d'Oxford.
Dumathés èrtouônnit en Angliétèrre et fut nommé Recteu dé la p'tite ville dé Yeovilton en Somerset. Tchi difféthence! Mais chutte calme vie né duthit pon longtemps. Auprès qu' la Grande Duchesse Cath'rinne dévînt Împératrice dé la Russie, ou décidit d'êtablyi les êcoles prînmaithes et s'gondaithes lé travèrs dé la nâtion, et ou d'mandit à Dannié Dumathés dé v'nîn à St Pétersbourg à l' aîdgi. Auprès san travas en Russie fut finni, Stanislaus, lé Rouai dé la Polongne l' învitit dé réorgannîser l'êducâtion dans san pays étout.
En mille sept chents souaixante-six, Dumathés èrtouônnit à sa pâraisse en Angliétèrre, mais i' continnuait dé s'associer auve des gens fanmeux. Ichîn, s'n anmîn, Dgilliaume Pitt, lé politicien, soulait rester souvent siez li. I' rencontrit étout lé Rouai George Trais, tchi soulait visiter Ouêmue, pa'ce i 'tait bein connue qué l'air dé la mé et les bangnoles, 'taient hardi bouons pouor la santé.
Pitt voulait qué Dumathés devînsse un êvêque, mais i' r'fusit. En mille sept chents nénante huit, à l'âge dé quatre-vîngt siêx ans, i s'èrtithit, et èrmuit à Bath où'est tch' i mouothit à l'âge dé nénante trais ans. I né s'mathyit janmais.
Dé temps en temps i' visitait Jèrri, sa pliaiche dé naissance, et en mille chents huit i' présentit sa tchête dé livres à la Bibliothèque Publyique en St Hélyi. Tchil houmme èrmerquabl'ye et un vrai Jèrriais.
Finnalement jé voudrais souhaiter eune bouonne et paisibl'ye année à tout lé monde.
A bétôt, et mèrcie pouor m'aver êcoutée.
Anne Herrod
Viyiz étout: