Bouônjour, bouonnes gens. Ch'est Geraint Jennings tch'a l'pliaîsi d'vos présenter la Lettre Jèrriaise chutte sémaine.
Nos v'chîn en 2009, et belle dêbâte à 2008, eune année tchi fut hôrribl'ye pouor mé. I' faut vivre en espéthance, et j'm'en vais espéther l'mus pouor ch't' année. Ouaithe qu'la vie sait duthe pouor des gens, i' faut dithe, s'nou-s'est à compather l'jour d'aniet d'auve lé temps pâssé, tout coumme, y'a ieu d's amendements.
La technologie avanche, lé Jèrriais avanche dans l's êcoles et, ch'est à espéther étout, dans la vie dé touos les jours. Sus l'Ithangnie, Les Pages Jèrriaises ont pâssé les trais mille trais chents pages en Jèrriais accessibl'yes partout l'monde pouor les cheins tch'ont l'întèrnet siez ieux ou par l'mouoyen des bibliothèques, êcoles, collèges ou unnivèrsités. Ieune des pages ajouôtées dêjà en 2009, ch'est eune articl'ye dé Ph'lip et Mêrrienne tchi fut publiée dans la gâzette du sé l'trais d'Novembre 1962, tchiques jours auprès la fîn d'la crise entouor les fîsées en Cuba. Né v'chîn chein qu'Douard L'Bro êcrivit dans s'n articl'ye:
"La s'maine pâssée nou-s-avait craint que y'éthait bétôt une dguêrre entre les Russes et l's Améthitchains, et que toutes les nations s'saient en grand dangi d'extermination. Jêrri, i' pathaissait, n'existéthait pas longtemps, et ch'tait inutile de bâti des souostêrrains, car i' n'y éthait autchune seûzeté sûs la têrre ou en d'sous. Mais à ch'teu', grâce à la Providence, lé dangi est pâssé et il est à espéther que bétôt toutes les nâtions civilisées veindront à vaie que dans une dguêrre i' n'y a pas d'gâgnants, mais que les vaintcheurs sont perdants étout."
Mé, j'pâssis Noué et l'Nouvel An à Londres, car y'avait tant d'exhibitions împortantes qué j'voulais vaie: l'Art Byzantîn à l'Académie Rouoyale, Francis Bacon à la Tate, Babylonne au Musée Britannique, et l'design dans la Fraide Dgèrre 1945-1970 au Musée Victoria et Albèrt.
L'exhibition entouor la Fraide Dgèrre 'tait hardi întérêssante et nou pouvait compather coumme tchi qu'les gouvèrnéments du Vouêt et d'l'Êst faîthaient d'la compétition entre ieux, pas sèl'ment atout des fîsées et des m'niches d'extèrminnâtion atonmique, mais étout atout la bâtithie d'louogements, l'architectuthe, les vaituthes et les transports publyics, et même la technologie dans les tchuîsinnes. En 1959 duthant eune bordée d'dêgelage auprès la mort dé Stalinne, les Améthitchains présentîtent eune exhibition à Moscou à seule fîn d'explyitchi la manniéthe dé vivre en Améthique ès Russes et mouontrer l'avanchement technologique. Y'a quat' tchuîsinnes modèrnes et, nou dithait, futuristiques dans l'exhibition et ch'fut dans ieune d'ches tchuîsinnes qué l'vice-Président Richard Nixon et lé S'grétaithe-Génétha du Parti Commeuniste Nikita Khrouchtchov lus d'batîtent entouor les beinfaits d'la production capitaliste.
Les cheins tch'ont liu m'n articl'ye dans Les Nouvelles Chroniques du Don Balleine d'la Saint Miché 2008 entouor l'nièr marchi dans l'Unnion Soviétique n'éthont pon ofûche oublié qué j'avais d'l'expéthience d'la vie souos l'Commeunisme.
Iun d'mes jannes êtudgiants dans eune clâsse du Jèrriais dans eune cèrtaine êcole liut m'n articl'ye et fut ravi qu'j'avais connu l'Commeunisme - car pouor dé li, la Fraide Dgèrre et la s'pathâtion d'l'Ûrope 'taient d'l'histouaithe d'l'antitchité. Mais, quand j'tais à l'êcole, mé, la S'gonde Dgèrre Mondiale et l'Otchupâtion 'taient raîque d'la vielle histouaithe dé bein au liain dans l'pâssé. Tou coumme, i' sembliéthait qu'lé Preunmié Minnistre d'la Russie, lé Sieur Putin, a acouo d's espéthances dé ravigoter la Fraide Dgèrre, viyant toute la hèrtchîngn'nie qu'nou-s'a veu à ches drein entouor la cop'thie d'gaz dans l'tchuyau tchi crouaîse l'Ukraîne.
Duthant la Fraide Dgèrre, John F. Kennedy battit Richard Nixon pouor la présidence des Êtats Unnis. Et y'en avait tch'avaient d's espéthances en li pouor la paix à l'av'nîn. Mais coumme j'avons ouï Ph'lip et Mèrrienne eûtent à têmouongni la crise la pus m'nichante d'la Fraide Dgèrre souos chutte présidence-là. Nou n'peut pon c'mander les mathées.
Chutte sémaine, les Améthitchains lus en vont înnaudguther un nouvieau Président. Y'a-t-i' d'l'espéthance là-d'dans? Au mains, j'peux dithe acouo eune fais, belle dêbâte à 2008, et à la fîn - belle dêbâte à George W. Bush!
Mèrcie bein des fais pouor m'aver êcouté, et séyiz au mains r'mèrciants, coumme Ph'lip et Mèrrienne, qu'i' n'y'a d'aut' dé peux d'extèrminnâtion atonmique en 2009.
Geraint Jennings
Viyiz étout: