Fallbrook, California, USA.
Lé 7 dé mai, 1983.
M'èrvélà en Califournie, et siez mes bouans anmîns, lé Sieur Sidney Triggs et sa danme, née Eva M. Carré à St Ouën, en Jèrri. Dépis l'décès d'man chièr fréthe Fraînque lé 14 dé dézembre pâssé j'n'avais pon ieu la chance dé pâler l'Jèrriais, et ch'est mangnifique dé pouver l'pâler à man tchèr content auve Madanme Triggs à ch't heu. Sans s'n encouothagement, j'n'éthais probabliément pon entréprîns lé viage dé San Antonio, Texas, ichîn dans m'n êtat d'santé actuel, ouaithe tchi n'prend qu'trais heuthes par avion à faithe les tchînze chents milles à Los Angeles. M's anmîns m'attendaient là atout lus moto, et j'finnissînmes lé restant du viage, eune affaithe dé chentvîngt milles, à Fallbrook en moto.
J'eus la chance d'èrchéver la gâzette dé Jèrri du 28 d'avri justément d'vant monter à bord dé l'avion à San Antonio, et v'là tchi m'donnit la chance dé l'aver à liéthe duthant lé viage à Los Angeles. En l'ouvrant, j'vis, auve grand r'gret, l'announce du décès du Député O'Connor, un charmant moussieu tch'a tréjous ieu l'même souôri - n'împorte dans tchi circonstance qué nou-savait la chance dé l'rencontrer.
J'aime hardi à vaie dans la gâzette les portraits d'gens qué j'connais et j'tais content d'vaie l'chein du Sénateu John Le Mèrquand entre deux belles nosses à l'Hôpita. J'connais la nosse à sa gauche, Mdlle. Denise Barr, tout-à-fait bein, car oulle 'tait ieune des nosses tchi m'souangnit quand j'tais dans "Le Quesne Ward" à l'Hôpita mé-même l'année pâssée, et j'peux la r' quémander comme étant eune bouanne méd'cinne pour touos malades. Ch'est sans doute ses bouans soins et les soins des aut's nosses souos la direction dé "Sister" Le Mèrquand tch'ont aîdgi au Sénateu à se r'faithe si vite dé ses deux opéthâtions, et j'lî souhaite eune bouanne èrmînse en parfaite santé pour lé restant d'ses jours.
Dans la partie d'la gâzette tchi nouos donne un accompte des discours des membres d's Êtats au sujet du pèrmîns d'travailli, j'vai l'bieau portrait dé m'n anmîn et Protchuleux, lé Député Edgar John Bétchet. Né v'là un moussieu qué j'ai tréjous estinmé, et j'sis bein content tch'il est dans L's Êtats. Sa profonde connaîssance dé la louai et san bouan sens daivent aîdgi à balanchi les divèrses idées trop avanchies ou trop împrudentes qué nou peut s'attendre à trouver parmi eune chînquantaine dé pèrsonnes dans eune assembliée.
Un aut' portrait qué j'ai r'mèrtchi pus liain dans la gâzette est l'chein du Sieur Louis Bihet, tchi fait d'si bouan travas pouor La Société Jersiaise à La Hougue Bie. Un raide bouan travailleux, lé Sieur Bihet, et chein tch'est admithabl'ye est tch'il a du goût dans san travas et tch'i' garde l'întéthêt d'La Société en veue tout l'temps.
Acouo un p'tit pus liain dans la gâzette, je v'nons à chein tch'est, pour mé, "la pièce de résistance" Ch'est l'annonce dé la restauration et les portraits d'l'aubèrge appelée "The Grapes" dans La Rue Mulcaster en Ville. Lé "Turnkey Giffard" tchi stchulptit les grappes 'tait man grand-péthe matèrnel John Philippe Giffard, tchi stchulptit un tas d'objets dans l'bel dé la Prison. L'almonas d"'La Chronique de Jersey" dé 1859 lé mentionne comme "Gardien" dé La Maîson dé Correction, et sa femme Mary Giffard comme Matrone. I' sont acouo là en 1865 et 1867 mais chutte fais Papa Giffard est mentionné comme "Guichetier" dé la Prison.
John Philippe Giffard mouothit en 1892 et fut entèrré dans l'chînm'tchiéthe dé l'églyise parouaîssiale dé St Pièrre. Né en Jèrri, il 'tait provenu dé ieune des fanmil'yes Giffard d'Angliétèrre. Ma m'mèe m'disait dans san vivant tch'il avait deux fréthes tch'étaient architectes à Londres. Il 'tait bein connu comme stchulpteux en Jèrri dans san temps et ch'tait li tch'avait stchulpté la grand' partie d's objets tch'ornaient les Caves dé Champion (mênommées "Troglodyte Caves") à La Crouaix d'Bouais.
Viyiz étout: