Les Pages Jèrriaises

Changement d'pâtuthe

Fort Lauderdale,
Florida,
USA

Lé 17 dé dézembre, 1977

Moussieu l'Rédacteu,

Eh bein, bouannes gens, m'èrvélà au solé. Quand j'tchittis l'Michigan y'a eune dgiexaine, avait un pid d'êpaisseu d'né sus tèrre et la tempéthatuthe 'tait bein en d'ssous d'zéro Fahrenheit, tchi veurt dithe pus d'trente-deux dégrés souos l'temps tchi gèle. Mais j'ai veu acouo pus d'fraid qu'ch'là. Eune fais, au Cannada, j'eus l's ouies gl'ées à quarante dégrés en d'ssous d'zéro.

En v'nant ichîn dans l'avion, i' n'y'avait pon fort dé nuages et j'viyais assez d'la tèrre en d'ssous (j'tions à vingt-­chîn mille pids en l'air) pour m'appèrchéver qué quand j'tions en d'ssus dé l'Etat dé Kentucky la né dispathaissait dé dssus la tèrre, mais j'viyais les riviéthes g'l'ées. Eune fais en d'ssus d'l'Etat dé Georgia tout 'tait net et cliai et l'solé r'lîsait, et auprès un arrêt à l'aéroport d'Atlanta nou sentait dêjà la grand' chaleu. J'voudrais pouver vouos env'yer un mio d'la chaleu qué j'avons ichîn en Floride en Jèrri, car j'crai bein tch'i' fait fraid là-bas. Il y faîsait fraid ch't êté quand j'y'étais, sans pâler d'l'hivé tch'est par les c'mîns à ch't heu.

Fraid ou pon, j'voudrais bein y'étre ches jours, en Jèrri quand ch'né s'sait qu' pour aller au sèrvice dé Noué d'L'Assembliée d'Jèrriais à la Chapelle d'Ebenhêzer. J'n'ai janmais ieu la chance dé prendre part dans chu sèrvice-là, car j'sis tréjous dans les pays cauds dans les temps d'Noué. Eune aut' occâsion qué j'manque dé vaie, étout, est L'Eisteddfod. J'm'èrsouveins du temps tch'i' y'avait au mains trais ou quat' piéches dé thiatre en Jèrriais pour La Séthée Jèrriaise, et tch'i' fallait qué ch'fûsse des parouaîssiens d'la pâraisse tchi donnait la piéche pour jouer d'dans. Ches dreines années pathaît-i', i' n'y'a qu'eune piéche ou deux au grand pus d'présentées, et quand i' n'y'en a qu' ieune oulle est seûthe dé gângni l'preunmié prix. Ch'n'est don pon fort dé compétition, et ch'est sîngne qué, comme y'a longtemps qu' nou l'a veu v'nîn, l'ûsage dé la langue Jèrriaise en pèrd bein rapidement et y'a la trajédie d'envisagi qu' auprès la généthâtion d'nôuos êfants d'à ch't heu, oulle étha probabliément dispathu.

Et j'aimethais bein r'aller ès partis d'Noué et danser la quadril'ye comme nou faîsait quand j'tais janne. J'pense bein qu'oulle est presqu'oubliée par les Jèrriais d'nouos jours, la quadril'ye, et les jannes d'à ch't heu n'l'ont pon connue. Dans les touos vièrs temps l's anciens l'appelaient tchiquefais La­ Contrédanse. Eune aut' vielle danse 'tait L'Cotillon. Eune aut' 'tait La Ronde, et l's anciens criyaient qué les chorchièrs dansaient "Les Rondes du dgiâbl'ye" quand i' célébraient lus sabbat l'vendrédi la niet ! Et y'avait la danse du Rigodon. Ch'est à bein près seux qu' ches vielles danses là sont oubliées à ch'theu. Pus tard, justément d'vant la preunmié grand' dgèrre, quand les jannes avaient c'menchi à pâler souvent en Angliais, nou pâlait d'ches vielles danses-là comme étant des "Square dances", et y'en avait ieune tch'était appelée "Lancers". Nou-s-aimait les êlégantes danses étout - comme la Valse. Pour la mûsique, y'avait tréjous tchitch'un tchi jouait l'accordéon, et tchiquefais l'violon.

Ch'tait sustout dans les temps d'Noué et des séthées d'Nièr Beurre qué nou-s­avait la chance dé danser y'a huiptante ans, car nouos anchètres travaillaient dû toute l'année et en temps ôrdinnaithe il éthaient dit: "Toute chutte valséthie-là n'amène pon l'pain à la bouoche!"

Ch'est vrai, quand nou veint à penser, tch'i' n'fallait pon grand' chose pour divèrti les gens dans chu temps-là, et comme disaient acouo l's anciens: "Il est bouan dé s'divèrti, mais pon sorti touos les sièrs dé siez sé!" Sans doute, nou n'avait autcheune envie dé sorti touos les sièrs. Eune séthée pâssée trantchil'yement au pid du feu à ouï Papa raconter d'ses aventuthes en mé quand i' navidgeait 'tait un mangnifique divèrtissement. Et i' connaîssait la vie à la Côte viyant qu' san navithe allait à Paspédgia et tch'il avait ieu deux fréthes là en même temps tch'i' navidgeait. Et pis hardi des fèrmiers tchi v'naient à la forge y'avaient pâssé tchiques années, à La Côte, et duthant les séthées d'hivé quand Papa et man P'pée battaient les fièrs dé tchéthues, i' v'naient pâsser la séthée et aidgi à frapper. Ch'tait un divèrtissement pour ieux, et la convèrsâtion 'tait souvent entouôrre La Côte.

J'ai cèrtainement ieu la chance dé pâsser des séthées d'même dans ma jannèche et d'apprandre et absorber un mio d'l'îndustrie, d'la sagesse, du prîncipe dé couoyer, d'la valeu des sou, d'la trantchilité d'la vie et du contentement d'san sort tch'étaient l'êvangile dé nouos anciens. La vie boulevèrsée d'nouos jours auve touos ses divèrtissements modèrnes, né vaut danme pon chette-­là du temps jadis!

 

George d'La Forge

 

Viyiz étout:

 

Les Pages Jèrriaises