L'avanchement d'la tchestchion d'not' Gal'lie Nâtionnale m'a ramémouaithé eune explyicâtion qu'j'avais ouï y'a bein d's années pouor explyitchi lé couôtage des portraits.
Ch'est en tchi nou dit qu'l'art est coumme un tapis et nou-s'a à payi par l'pid cârré ou l'mètre cârré (s'lon san chouaix). Un portrait bein chi dait êt' don hardi grand. V'là tch'explyique pouortchi l'pliafond d'la Chapelle Sistinne au Vatican est hardi fanmeux et précieux - ch'n'est pon qu'Michélange 'tait un génie. Nou-fait, ch'est qu'i' y'a un tas d'pliafond d'peint dans chutte chapelle-là.
Mais, qu'nou-s'objectit, les portraits d'Monet et d'Renoir et d's aut's Împressionnistes sont hardi fanmeurs et vâliabl'yes, ieux, et i' sont bannis bein rédguliéthement à la vendue pouor des prix tchi bûchent des r'cords. Et ches portraits-là n'sont pon ênormes, i' sont pus à co p'tits.
Tout chennechîn fut explyitchi ainchîn: les portraits Împressionnistes ont nom Împressionniste car i' sont en véthité bein, bein grands mais i' donnent l'împression tout coumme d'êt' cruchots. Ch'est chenna l'talent des peintres Împressionnistes.
Mais, qu'nou r'objectit, prannez par exempl'ye la Mona Lisa dé Léonard dé Vîntchi. Quand nou vîsite lé Louvre à Paris ch'est mithacl'ye s'nou peut mênagi d'vaie chu portrait fanmeux. L'avant à chu p'tit portrait sus la muthâle y'a tréjous un fièr fliotchet d'monde dans la vouaie tchi blioquent la veue. La Mona Lisa est ofûche lé pus fanmeux portrait du monde et ch'est bein seux hors dé prix et d'eune valeu încomprannabl'ye. Coumme tchi don qu'chu portrait sembl'ye si p'tit?
Assa, qu'nou-s'explyique, ch'est en tchi la Mona Lisa est rêellement bein p'tite, mais oulle est, viy'-ous, divèrsément êpaîsse!
Ch'est à espéther qu'les caltchuls êcononmiques pouor vaie si j'pouvons affaûrder eune Gal'lie Nâtionnale dé Jèrri n'ont pon 'té faits d'même. Ché s'sait damage si touos les portraits d'nos artistes, dé Bliampid, d'Ouless, d'Lé Cap'lain et d'aut's, restent muchis pouor achteu en storre. Les cheins tch'ont vîsité des p'tites gal'lies nâtionnales dans d'aut's pays, coumme par exempl'ye la Gal'lie Nâtionnale d'la Lettonnie, éthont veu qu'eune gal'lie d'même peut exhiber la tchultuthe vîsuelle d'un pays sans aver à convèrti un palais et bâti des pyramides et stoffer les salles dé cârrossées d'vîsiteurs coumme nou l'vait au Louvre.
La tchultuthe vîsuelle dé Jèrri méthite eune gal'lie nâtionnale car oulle est bein vâliabl'ye. Not' tchultuthe est p'tite mais oulle est, viy'-ous, divèrsément êpaîsse!
Geraint Jennings
Viyiz étout: