Dans la Gal'lie Nationale à Londres y'a l'portrait qu'j'aime lé mus. Ch'est l'Allégorie d'l'Amour et du Temps par Angnolo Bronzino, un portrait tchi fut fait au seizième siècl'ye et un exempl'ye du Manniéthisme.
Dans l'portrait nou vait Vênus et Cupidon à lus embraichi, auve tchiques caractéthes driéthe ieux tchi r'présentent p't-êt' la Jalousie, la Folyie, l'Temps, l'Pliaisi, et la Tromp'thie.
I' sembl'ye qu'Vênus, déesse d'amour, en embraichant Cupidon, dgieu d'amour, est à lî voler ieune d'ses èrchelles. Ch'n'est pon cliai s'ou s'en va l'pitchi auve sén èrchelle à li.
Ch'est un portrait bein complyitchi, remplyi d'symbolisme bein obstchur, mais chein tchi nos tape ès ièrs, ch'est la sexualité et sensualité d'la composition.
Y'a même d'tchi pèrvèrs entouor chu portrait viyant qu'dans les mythes des Romains, Vênus 'tait la méthe à Cupidon - et ch'est bein liain d'êt' un baiser matèrnel à bouoches ouvèrtes et langues tchi lus touchent. Cupidon tcheint un sein à sa méthe dans eune main et i' tcheint sa tête dans l'aut'. Lé bouton à Vênus sé mouontre entre les dés à Cupidon.
Cupidon est un janne garçon agenouoilli sus un rouoge couôssi et tchi sembl'ye présenter ses fêsses au dgetteux. La pé des deux dgieux est blianche coumme du marbe et est contrastée sus du bliu.
S'nou r'garde l'anatomie, nou r'mèrque d'tchi êtrange: lus corps sont tordus d'eune manniéthe extrême et împossibl'ye. I' s'sait împôssibl'ye pouor les dgieux d'embraichi coumme chenna - par exempl'ye, Cupidon dait aver un bein long co pouor pouver les lèvres à sa méthe.
La Tromp'thie sembl'ye aver deux mains gauches, étout.
Pouor les couleurs, Cupidon a d's ailes dé vèrt, blianc et bliu. Sa câsse d'èrchelles est vèrte auve dé l'or et eune vèrte strape auve un grand rouoge jouéyau qu'nou vait dans l'creux d'san dos.
La Tromp'thie est un êtrange caractéthe. Oulle est à maintchi muchie driéthe la Folyie et sa partie dé haut est d'eune belle janne fil'ye tch'est à offri un paûmé d'myi dans sa main. Oulle est habilyie en vèrt auve du jaune et du pourpre. Ou porte eune couronne dé pèrles dans ses g'veux. Mais l'pus surprannant ch'est qu'sa partie d'bas est la cheinne d'un monstre: tchique dragon êcaleux, ou lêzarde, auve les gambes d'un lion. Oulle à des grîns sus ses grandes pattes en d'ssous d'san fro, et eune longue coue dé tchi ou tcheint la pitcheûse au but dans s'n aut' main.
Lé myi et la pitcheûse - né v'là l'symbolisme d'la tromp'thie: les bieaux mots tchi sont suivis par la cruauté et lé d'sappointement. Et tchi pus est, n'oubliez pon qu'oulle est muchie driéthe la Folyie.
La Folyie est un p'tit garçon, chein qu'les Italiens appellent un “putto”, auve des p'tites clioches l'tou d'sa g'vil'ye dé gauche. Il avanche vèrs Vênus et Cupidon auve des pouongnies d'roses à lus fliantchi sus - et un souôri ès lèvres.
Driéthe Cupidon, y'a l'caractéthe d'la Jalousie - ou p't-êt' ch'est lé M'sespé - tchi tcheint sa tête en criant.
Mais tch'est qu'est l'caractéthe dans la carre du haut à drouaite? Nou dit qué ch'est p't-êt' lé Pliaîsi.
Oulle est à aîdgi l'Temps à tcheindre la bliue taile du fond. Ou porte eune grappe dé vèrjus sus sa tête - mais ou n'sembl'ye pon à y prendre du pliaîsi.
Et y'a eune tchestchion entouor la taile. L'Temps et l'Pliaîsi, sont-i' à couvri ou dêvouailer l's amouotheurs? Ch'n'est pon cliai. La bliue taile pouôrrait r'présenter l'ciel.
L'atmosphéthe sembl'ye un mio fraid auve la pé pustôt pâle et l'bliu au fond - mais l'rouoge du couôssi, du jouéyau à Cupidon, des lèvres et joues d's amouotheurs et des roses, fait viagi l's ièrs par l'portrait. Et y'a un tas d'détails à dêcouvri dans chu portrait étout. Y'a deux colombes à bas à gauche, et à drouaite trais vîsagiéthes - ieune d'un vièr houmme barbu. L'Temps a d's ailes et un hôlouoge à sablion sus sans dos.
Dans ses mains, Vênus tcheint l'èrchelle qu'oulle a volé à Cupidon - et eune poumme d'or. Ch'est la poumme d'or qu'oulle èrchut dé Paris quand ou lî promînt Hélène dé Trouaie.
L'împôssibl'ye, ch'est qu'Vênus n'éthait pon peu voler l'èrchelle à Cupidon dans chutte position-là. La câsse à èrchelles à Cupidon est trop liain d'lyi pouor qu'ou piêsse prendre l'èrchelle coumme chenna.
Y'a au mains eune partie dé chu portrait tch'est bein connue - l'pid à Cupidon fut fait sèrvi pouor l'annimâtion au c'menchement dé Monty Python!
Geraint Jennings
Dézembre 2001
Viyiz étout: