J'éthons-t-i' un par nâtionna ès Mielles, à Pliémont, à Nièrmont ou autchun bord en Jèrri? Dans s'n articl'ye dé fond du 19 d'Juîn, la Gâzette du Sé a fait l'clyîn qué j's'sêmes à la rîthelée du monde si j'bâptîsêmes nos pièches protégies auve lé titre dé "par nâtionna".
Pouor dé mé, jé n'sis pon d'avis. Tchi qui en fait fouah si les cheins dé l'Île dé Man peuvent cratchi coumme du vrai d'Chausé d'lus dgiêx-sept Vallées Nâtionnales. Véthe, bouonnes gens, nos anmîns Îlemans d'la Mé d'Irlande ont protégi quâsiment eune douzaine et d'mie d'lus vallées, ou coumme nou l's appelle en Manx, des "glion", et ieux i' n'ont pon dé honte d'les dêcrithe coumme "nâtionnales". Bein seux, les cheins tchi vîsitent l'Île dé Man, tch'est acouo un p'tit pays ouaithe qu'ou sait pus grande qué Jèrri, n'sont dgéthe à espéther vaie des vallées coumme les cheinnes des Hautes Tèrres d'Êcosse ou d'Antrim en Irlande du Nord. Tchi qui s'sait ravi d'trouver des p'tits pars nâtionnaux dans des p'tits pays?
Tch'est qui sembl'ye lé paraggrave pouor les cheins du "contre", ch'est qu'lé mot "par" sembl'ye trop grand pouor nos tchiques vrégies d'tèrrain protégi. Pardîngue! Si la grandeu d'la pièche né conveint pon à l'expression, j'en avons d'aut's en Jèrriais à proposer par d'ssus l'marchi. Si un par nâtionna fait trop d'san jîngouais, pouortchi pon aver un "partchet nâtionna"? Même en Jèrri, j'éthêmes assez d'run pouor eune bouonne pouongnie d'partchets nâtionnaux parfénés par 'chîn et par là dans les Pâraisses.
Mais j'avons d'aut's bouôns mots étout. Tch'est qu'ous en dithêtes d'un betchet nâtionna? Ché s'sait-i' humbl'ye assez pouor satisfaithe les r'frouongnis? Autrément nou pouôrrait bein distîndgi eune baie nâtionnale, des mielles nâtionnales, eune capée nâtionnale ou eune lande nâtionnale, par exempl'ye, coumme les Manx ont fait auve lus vallées nâtionnales.
I' n'faut pon aller en Ville par l'Vièr Châté: chein qu'i' faut faithe ch'est d'accorder la protection envithonnementale d'nos pièches protégies. Lé titre peut v'nîn souotre, d'abord qu'i' y'ait un nom en Jèrriais!
Geraint Jennings
Viyiz étout: