J'vîsitis l'exhibition entouor lé surréalisme à la Gal'lie Tate Modern à Londres juste avant Noué 2001, et né v'chîn tchiqu's'eunes d'mes pensées.
La vîsion d'l'houmme cachi par lé d'si est centrale pouor les surréalistes. Ch'est l'înmaginnâtion d'un monde dans tchi qu'l'amour idéal - unnique est mutuel - trouv'thait sa pliaiche.
Lé surréalisme c'menchit coumme un mouvement littéthaithe mais bétôt i' d'vînt eune grande înfluence dans l's arts visuels étout.
Pour les surréalistes, l'unnion sexuelle 'tait bein pus qu'un acte physique. Ch'tait l'expression du d'si d'pâsser les lînmites dans “sé-même” et d'êt' lié à “l'aut'” - ch'est lé d'si cacheux tchi reste tréjous un mystéthe.
Les surréalistes aimaient mêler les machinnes et l'anatonmie à seule fîn d'rêalîser des moteurs dé d'si”.
La psycho-analyse avait dêcouvèrt (ou înventé) eune mécanique d'l'esprit - et si l's idées, les rêves, les d'sirs s'grets et les pons'rêsses des femmes et d's hoummes 'taient les reues, l'grêlîn et les vis d'la pèrsonnalité, pouortchi pas y construithe du nouvé?
Les théories d'Freud entouor la rivalité entré les fis et lus péthes attriotchîtent les surréalistes - tchi n'avaient pon en tout cas d'bouonnes èrlations auve lus pathents.
L'înmportance d'ombres dans les portraits des surréalistes souôlîngne la difféthence - mais la coexistence étout - d'la rêv'thie et d'la rêalité. même si l'saolé lit, y'a d's ombres - y'a d's ombres pa'ce qu'lé solé lit. D'même, quand j'sommes rêvilyis, j'avons des rêves - j'avons des rêves pa'ce qué j'sommes rêvilyis. I' faut aver la lueu d'la rêalité pouor illeunminner nos rêves.
Les statues sont d's ombres en pièrre. La marbe est l'êtoffe des rêves.
Y'a des pipes tchi mènent nos rêves coumme du litchide liain d'ichîn vèrs eune aut' pliaiche.
Eune d'mié-muthâl'lie d'photos par Claude Cahun, ieune des “soeurs surréalistes” tchi d'meuthaient en Jèrri avant, duthant et auprès l'Otchupâtion, mouontre san travas d'èrprésentâtion d'lyi-même - des portraits d'sé-même doubliée, auve mitheux, en vîsagiéthe, auve tête râsée, habilyie pouor lé thiâtre, dêdgisée en houmme. “Souos chutte vîsagiéthe acouo eune vîsagiéthe” - Claude Cahun.
La Mona Lisa transformée en houmme par Marcel Duchamp (auve l'ajouôtage d'eune moustache et barbe dé biche à eune èrproduction du pus fanmeux portrait du monde) a nom L.H.O.O.Q. (“oulle a caud au tchu”).
Duchamp dît qué la Mona Lisa est en véthité un houmme dêdgisé en femme et ché n'fut qu'deux-trais mèrques dé créyon pouor pouver dêvouailer l'houmme driéthe la fanmeuse fache.
Et né v'là la fanmeuse Vênus dé Milo transformée en tithettes - san g'nou, san ventre, s'n estonma, ses seins et san front sont dév'nus des titheurs auve des buts d'pé d'annima coumme pouongnies. Ah voudrait-n-on saver tch'est qu'i' y'avait d'dans!
Les surréalistes lus întérêssaient dans l'automatisme. L's auteurs c'menchîtent auve l'êcrithie automatique - êcrithe sans aver d's idées et laîssi les patholes v'nîn coumme i' v'naient. Et pis l's artistes prîndrent la même couôteunme dé dessinner et d'laîssi l's înmages v'nîn.
I' jouaient la gamme dé “Cadâvre extchis” étout - ch'est eune sorte éd “Conséquenches” quand un artiste quémenche un portrait à haut d'un but d'papi. I' plyie l'papi et l'pâsse à l'préchain artiste tchi continue l'portrait, et pis chenna continnue...
La mémouaithe 'tait înmportante ès surréalistes étout - sustout pouor d's èrlation sexuelles. Il' èrprésentaient la mémouaithe dé touche înmprînmée: les mèrques faites par les artistes sus l'papi, sus l'cannevas, sont les mémouaithes dé touches - touches dé corps dé femme.
Y'avait d'êchanges entré l's artistes et l's auteurs surréalistes. Les artistes illustraient les livres ès poètes - et i' châraient lus amouotheurs et amouotheuses étout.
Paul Eluard êcrivit: “La tèrre est bliue coumme eune orange” - mais la pus încriyabl'ye expéthience 'tait d'êt dans eune salle auve les deux icônes les pus fanmeurs des objets surréalistes:
Lé honmard-téléphône dé 1936 dé Dali est bein connu étout. La pliastique mannifactuthée du téléphône d'veint l'êtchivalent du vanné du honmard. La commeunnicâtion est copée - nos caqu;téthies sont muchies souos les louêmes et nos d'sirs chuchotés sont mastchis par les murmuthes d'la mé.
En faîthant sèrvi chu honmard-téléphône, j'soummes-t-i' à mangi lé honmard ou à pâler des biaux-biaux à eune amouotheuse ou à un amouotheux? Tchi sait?
La tâsse auve du pé sus
- et -
lé honmard-téléphône
J'sis à pâler entouor “Objet (L'Dêjeûner en pé”) 1936 dé Meret Oppenheim (1913-1985) et lé Honmard-Téléphône 1936 dé Salvador Dali.
Meret Oppenheim couvrit eune tâsse, eune souôtâsse et eune tchulyi auve du pé - spectatchulaithe en conception, la pièche à Meret Oppenheim est domestique, exotique, dé touos les jours, et janmais veu, à êt' d'sithée et compliètement innutile. Nou-s'înmaginne l'action dé l'ver la tâsse à sa bouoche pouor en baithe eune gorgie - et né v'là l'sexe orale sus la tabl'ye d'la grand' tchuîsinne! Mangnifique. Ou r'présente la sexualisâtion d'la vie ordinnaithe et lé d'si muchi dans nos siez-nous. Ch'est en mangeant et en ayant l'sexe qué j'èrsoummes d's annimaux.
Mais chutte sexualité mène dans des cas à l'obsession - coumme siez Hans Bellmer et sa poupette à quat' gambes. Ch'est la femme coumme êpeûthas - et nou peut vaie d's exempl'yes dé parties d'femmes auve des dents.
Les coutchieaux et l'sang - la balle d'yi copé dans l'fanmeux film dé Bunuel. Si j'soummes d's annimaux en faîthant l'amour, j'soummes-t-i' étout d's însectes? D's însectes dé tchi les feunmelles dêvouothent les mâles auprès la fèrtilisâtion?
Les surréalistes 'taient întérêssis étout dans l's êcrituthes du Martchis d'Sade et illustrîtent des livres (en s'gret à chu temps-là) tchi lus appréchent d'la pornographie.
I' criyaient, les surréalistes, qué l'Martchis 'tait l'preunmyi à êcrithe entouor la tchestchion du d'si sexuel et la pèrvèrsion d'eune manniéthe philosophique. Et i' criyaient en pus qué touos les livres surréalistes 'taient érotiques en tout cas.
En Tchécoslovaquie étout, les surréalistes 'taient au travas. Jindrich Styrský publyit d's illustrâtion érotiques pouor des livres. Des cliutages dé photographes et des dessîns mouontrîtent qué Prague 'tait l'deuxième centre du surréalisme auprès Paris - mais auve eune concentrâtion spécialement érotique. L's Artistes Styrský et Toyen travaillaient sus un magasîn Erotická Revue.
Mais y'avait d'aut's femmes à faithe du mangnifique travas stînmulant dans l'surréalisme excepté Toyen, la Tchèque, et Meret Oppenheim.
Frida Kahlo, la Mexitchainne, 'tait bein appréciée par les surréalistes ouaithe qu'ou né s'considéthait pon coumme surréaliste, lyi.
Dorothea Tanning fît des supèrbes pièches, et en partitchulyi un sofa à s'faithe l'amour.
Et n'en v'là-t-i' du d'si d'samathé!
Geraint Jennings
Dézembre 2001
Viyiz étout: