Chièr Moussieu lé Redacteu,
VENDREDI au sé j'ai passé eune raide bouonne sethée à la Salle Publique dé Saint Martin à la réunion dé l'annuel gènérale dé L'Assembliée d'Jèrriais.
Bein seux, y'avait bein des èrmèrciments à touos les siens tch'ont travailli si dû duthent l'année et y'avait le rapport de la ségrétaithe tchi nos rappeli des bouones sethées que j'avons ieu.
Duthant l'hivé y'a ieu un concert organisé par Mme Margaret Perrée et son committée sociale, j'avons étout joué à 'lotto' et mème eune 'beetle drive'. Les membres dê L'Assem'bliée d'Gèrnésiais sont v'nus en Jèrri, et j'avons visité nos couôsins Normands. Au mais d'juilet y'a ieu un r'pas à la broche és Mielles dê Morville à St Ouen. Finallement y'a ieu eune grande avanche quand l'Assembliée ont prins eune pliache à la Foire de Jèrri qu'à'té bein supportée et avec hardi d'intéthèt.
Apres qu' les officiers futes êlus, auvec le Sieu Brian Gilbert êlu couomme président pour une autre terme, y'ieut un p'tit concert et une sethée d'chants que tout e'monde aimitent bein. Des chansons couomme 'Mon Bieau P'tit Jèrri', 'Ma Normandie' et 'J'ai Perdu ma Femme' suivi par un buoun soupé fit eune sethée bein amusante.
Si ou's avez envie de joindre l'Assembliée, ou mème si ous êtes membres dêjà mais n'allez pas bein souvent, j'sis seûse qué ous ésthez bein érchus. Pour mé j'sis desollée d'avait manchi tants dé rendezvous dûthant l'année passé; ch't'année j'em vais faithe un grand éffort d'aller à touos les réunions.
LA FILLE
Viyiz étout: