St. Anthony's School,
Bussere, near Wau,
Bahr el Ghazal,
SUDAN.
13th July, 1947.
Man chier Ph'lip,
Exchusez-mé que j'vos appelle par vot' nom comme chonna, j'sais ben que chonna a l'air un mio affrontée quand j'n'vos connais pas, mais y'a si longtemps que j'liait vos articlyes dans l'Morning News qu'y m'semblye que j'sommes des viers amins, et naturellement, Merrienne étout.
J'craie ben qu'ou serait ben mêrrie si ou verrait chutte lettre ichin et que j'n'l'avais pas mentionnée. J'la trouve ben rêsiblye, chutte fille-là et, pardonnez-mé, especialement, quand ou qu'menche à vous d'commandé et à vous faithe aidji dans la maison. chonna m'piaît hardi.
Et ach'teu j'm'en vais vos dithe chique mots d'la vie que man buonhomme et mé mènent ichin. J'sommes tout à fait dans l'mitan d'l'Afrique parmi les nègres, presque su l'Equator, et j'vos assuthe, Ph'lip, que j'trouve chonna ben drôle d'vais chu monde-là avec rin que lus "birthday suits." J'n'peu pas m'y'accouôtomé du tout. Y'a toutes sortes d'animaux ichin - des crocodiles, des leopards, des giraffes, des elephants, des monkeys, et des tchîeuvres "en veur-tu en v'là." J'avons des vaques étout pour not' lait, mais ches puôres bêtes m'font pitchi: y'n'ont presque pas d'piéchot. Vraiment, j'n'sais pas d'iou qu'le lait veint quand j'pense à nos belles p'tites "Jerseys" et que j'n'vai que ches laids bêtes-là, chonna m'fait d'la peine. Enfin, ch'est mû q'rin et le lait n'est pas trop mauvais, mais il est d'la couleuthe du lait d'biche. A q'menchi chonna m'tuônait l'cheu un mio, mais ach'teu j'm'sis habituée.
Avant que j'finis chu gniolin ichin, j'voudrais r'mercié Merrienne et vous ben des fais pour tout l'piaisi que vous nous avez donné avec vos articycles. Man biau-pèthe nous l'envie toutes les s'maines.
A q'menchi man buonhomme n'y comprenait ni bouffe ni baffe, parsque chu puôre bourfye - ch'n'est pas d'sa faute - mais ch'est un villais. Ach'teu d'pis que j'y'apprins l'Jerriais il est ordjilleux comme tout d'l'savé.
J'n'sais pas trop ben comment épelé chutte langue'chin, mais j'ai fai d'man mû.
Mes compyiments à vot' missis.
Olive Amy
Jersey Morning News 2/8/1947
Viyiz étout: