Les Pages Jèrriaises

Jouer à doque


 

Jouer à doque
 

Nou m'ttait eune grôsse pièrre, et pis eune pétite pièrre par dessus. Ch'tait là l'doque.

Nou pouvait y jouer trais, quatre, six, etc., auprès, comme d'amors, aver halé ès noeuds. Nou pitchait san galot d'la barre (eune mèrque dans l'bel, etc.).

Y'en avait tréjous iun tchi restait doque, à r'mettre la pièrre quand oulle 'tait adèrchie.

Tchiquefais lé doque (la p'tite pièrre) 'tait env'yé un raide but et pis lé chein tch'était doque criait huit, douze, etc. (engambées). Lé pranneux y'arrivait, ou pas, dans l'nombre d'engambées criées. S'i' mantchait il 'tait doque.

Châtchun avait san galot d'grève - bein précieux à garder.


Lé Bulletîn d'Quart d'An dé L'Assembliée d'Jèrriais, La St. Miché et Noué 1966

 

 

Eune suggestchion dé règl'yes d'achteu :

Nou peut jouer à doque sus la bliête ou sus la grève (sus l'sablion chenna marche bein et y'a eune chance d'aver des galots d'amain).

La grôsse pièrre est pliaichie auve lé doque sus. Si les pièrres sont dé difféthentes couleurs, chenna aîgue la mith'thie.

La barre peut êt' mèrtchie à chîn mètres (ou chîn pas) du doque. Nou prend san tou à pitchi san galot. Si l'galot s'bûche, lé pranneux rempliaiche lé chein tch'est doque (ch'est pouor dêcouothagi les cheins tchi veulent êt' trop violent dans la gamme).

Si l'chein tch'est doque considéthe qué l'pranneux a pitchi san galot trop liain, i' peut crier un nombre (d'engambées). Si l'pranneux n'peut pon arriver à san galot dans l'nombres d'engambées criées, il est doque (ch'est pouor dêcouothagi étout les cheins tchi pouôrraient pitchi auve trop d'forche).

 

 

Viyiz:

 

Les Pages Jèrriaises