Un r'cit du jeu comme il 'tait joué à l'Êcole Wesleyenne dé St. Ouën quand j'tais mousse 'l'y'a souaixante ans. Dans chu temps-là lé nom Jèrriais du jeu 'tait déjà oublié et l'nom Angliais, "Rounders", 'tait fait sèrvi par touos les mousses, mais à St. Ouën l'temps pâssé1 nou disait "Jouer ès Barres". Certains nouos ont dit qué dans lus temps nou disait “Jouer ès Buttes". Dans l'Êst, i' pathaît, nou disait p't-être étout "lé jeu des Rondées" car lé bouonhomme Moussieu Eugène Bouillon2, dé Paspébia, à La Côte, un vièr Jèrriais d'nénante ans, natif dé St. Sauveux, l'appelait par chu nom-là.
Lé jeu peut êt' joué dans un clios ou dans un bel. À l'Êcole Wesleyenne lé bel dé la "grande école " (les touos jannes 'taient dans eune aut' partie d'l'êcole appelée "la p'tite école" et jouaient dans un bel à part) 'tait justément grand assez pour eune gamme dé six ou sept dé châque côté. Lé nombre tchi peut jouer n'est lînmité qué par la grandeu d'l'empliaichement.
Tout ch'tch'i' fallait pour jouer ès barres 'tait eune balle tchi n'tait pon trop duthe et tchi r'bîndait bein. I' n'fallait pon qu'ou fùsse trop duthe pour faithe du ma à un mousse quand nou l'astitchait atout eune balle dé "tennis" 'tait bein conv'nabl'ye.3
Dans l'mitan du bel 'l'y'avait eune "grille" tchi couvrait un êgout tch'allait à la route. Ch'tait là qué l"'sèrvice" sé faisait. Nou-s appelait chutte pliaiche-là “La Butte". Ch'tait la pliaiche la pus împortante du jeu, viyant tch'i' fallait c'menchi à couôrre lé tou des barres dé là, et y finni la ronde eune fais toutes les barres pàssées.
Lé long des muthâles à l'entou du bel nou mèrtchait "les barres”, un rond ou un carré justément grand assez pour qu'eune pèrsonn pûsse sé t'nîn d'but d'ssus. 'L'y'avait du run pour chinq ou siex barres dans l'bel. La preunmiéthe 'tait la pus près d'la butte, et i' fallait couôrre à chette-là preunmiéthement et continnuer la ronde dé toutes les barres, ieune auprès l'autre, jusquà la dreine, et finni à la butte.
Lé groupe dé joueurs sé divise en deux côtés - lé côté d'service et l'côté d'la ronde des barres. Deux des pus grands garçons, acceptés d'accord mutuel comme chefs ou cap'taines, pattaient pour lé privilège dé preunmié chouaix et l'chein tchi gângnait chouaisissait l'miyeu joueux pour san côté, et pis ch'tait l'tou à l'aut' cap'taine à chouaisi. Chouaisis iun d'châque côté à la fais, les deux côtés finnissaient à bein près égaux. Eune fais les côtés chouaîsis, les deux cap'taines pattent pour dêtèrminner tchi côté tchi s'en va faithe lé tou l'preunmyi. Lé chein tchi gângne à patter fait san chouaix - d'habitude i' chouaisit d'faithe lé tou, et l'aut' côté fait l'sèrvice.
Lé côté tchi s'en va faithe lé tou des barres sé range, châtchun côte à côte en draite lîngne, d'un côté d'la butte, en fache des barres, à trais ou quat' pids d'la butte. Lé preunmyi d'l'aut' côté chouaîsi pour faithe lé sèrvice sé mâte sus la butte même, fache à la rangie et balle en main. Les aut' membres du côté tchi fait l'sèrvice lus mettent en pliaiche individuellement à l'entou du bel, à bein près à maintchi c'mîn entre la butte et châque barre, prêts à r'chéver la balle dé la butte ou d'iun ou l'aut' dé lus côté en autchun temps.
Il faut décider, d'accord dé parti, lé "hors du ji" du tèrrain ou bel ou empliaichement, et si la balle est pitchie hors du ji, par accident ou autrément ou par autcheune pèrsonne, oulle est hors du ji, et la pèrsonne est “horte" s'oulle est du côté tchi couort lé tou des barres et qu'oulle a tapé la balle hors du ji quand ou li'a 'té sèrvie d'la butte. Si la balle est pitchie hors du ji par iun du côté d'sèrvice la gamme arrête jusqu'à qu'la balle sait ramâssée, et tout l'monde restent sus les barres jusqu'à qu'la balle sait r'sèrvie.
Lé "sèrvice" est l'action dé pitchi ou env'yer la balle dé la butte au preunmyi d'la rangie tchi s'en va faithe la ronde ou l'tou des barres. Ch'tî-là la tape atout sa main dans la direction en d'vant d'li - la direction des barres. Il êprouve à la faithe aller aussi liain qu'possibl'ye sans l'env'yer hors du ji. En même temps, il êprouve à la faithe aller bas assez pour qu'ou n'piêsse êt' attrapée en vol à la main aîsiement. S'oulle est attrapée en vol dévant touchi à terre par lé chein tchi fait l'sèrvice, ou par autchun membre du côté d'sèrvice, lé chein tchi l'a tapée est "hors" et i' tchitte lé jeu jusqu'à qu'san côté sait tout "hors" et qu'nou change dé côtés. S'i' manque la balle quand ou li'est sèrvie, ou s'i' la tape, i' faut couôrre dans autchun des deux cas, à la preunmié barre - et i' n'peut pon ét' mîns hors dévant y'arriver, ni êt' empêchi d'y couôrre.
Faithe “lé tou des barres" veurt dithe qu'auprès aver tapé la balle tchi li'est sèrvie d'la butte, lé chein tchest à couôrre fait l'tou dé barre en barre et finnit à la butte, èrprannant pliaiche comme lé drein d'la rangie arrêtant pour lé sèrvice s'il a la chance dé finni la ronde sans êt' astitchi par la balle en c'min.
Eune fais la balle sèrvie et tapée par lé chein tchi c'menche lé tou des barres, oulle est ramâssée par autchun membre du côté d'sèrvice. S'il y'a autchun joueux à couôrre entre les barres il êprouve à l'astitchi atout la balle dé là iou tch'il est d'but. I' n'peut pon couôrre ou bouogi d'pliaiche atout la balle en main - la règl'ye est stricte et autcheune pèrsonne tchi marche ou bouoge dé pliaiche atout la balle en main n'est pon pèrmînse dé s'en sèrvi - i' faut l'env'yer à un autre.
S'il est tapé ou astitchi atout la balle entre les barres, ou entre la dreine barre et la butte, lé couotheux est hors et i' n'peut pon prendre part d'autre dans la gamme dévant qu'tous saient hors et qu'l'y'ait changement d'côtés.
La balle est env'yée d'iun à l'aut' ichîn et là par les cheins du côte d'sèrvice pour êprouver à astitchi les couotheurs d'eune barre à l'autre, et oulle est tréjous renv'yée à la butte pour continnuer l'sèrvice.
I' n'est pon pèrmins d'y'aver deux ou pus d'joueurs sus eune barre en même temps. l' faut qué l'couotheux dgette sa chance pour couôrre sus eune barre tch'est viède. Eune fais arrivé sus la barre i' n'peut pon êt' astitchi atout la balle et mîns hors quandi tch'il est d'ssus, mais viyant qu'deux n'peuvent pon otchuper autcheune barre en même temps, i' sont tous forchis d'couôrre dé barre en barre châque fais qu'un nouvieau couotheux arrive à la preunmiéthe.
Eune fais qu'tchitch'un est astitchi atout la balle, oulle est renv'yée à la butte et sèrvie au préchain d'la rangie d'vant la butte.
Si un couotheux peut couôrre sus eune barre driéthe li tch'est viède il a l'drouait dé l'faithe quand même tch'i' l'ait otchupée d'vant, mais i' faut tch'i' r'pàsse sus ses pas et r'continnue sa ronde lé tou des barres ieune auprès l'aut' jusqu'à la dreinne et finni à la butte.
Lé chein tchi fait l'sèrvice peut astitchi un couotheux entre les barres li-même à la pliaiche dé pâsser la balle à iun d'ses parchonnièrs, pour bein tch'i' garde un pid sus la butte, mais i' n'peut pon bouogi d'sa pliaiche pour lé faithe. Il peut r'chéver la balle d'un parchonnyi d'san côté en autchun temps, et i' peut la pâsser ou l'env'yer à un aut' en autchun temps, mais châque fais qu'ou change dé main v'là tchi donne eune chance ès couotheurs dé couôrre eune barre. Lé chein tchi fait l'sèrvice peut faithe lé malin étout-i' peut faithe la minne dé sèrvi et n'laîssi pon couôrre la balle dé sa main, et si les couotheurs né l'dgettent pon d'assez près et c'menchent à couôrre, il peuvent êt' attrapés entre les barres et astitchis atout la balle.
Quand les couotheurs sont tous hors, les côtés changent dé pliaiches et ch'est l'tou au côté tch'était dsèrvice à faithe la ronde des barres.
Si les joueurs veulent garder compte, 'l'y'a mouoyen dé jouer pour des points - un point étant alloué pour chàque tou des barres fait par châque couotheux sans êt' mîns hors. Pour saver tch'est qu'a gângni il faut aver l'temps pour qué châtchun des deux côtés piêsse aver san tou à couôrre les barres. Comme ch'tait souvent dans l'heuthe du diner qu'nou jouait à l'êcole nou n'avait pon grand temps à pèrdre et nou n's'embétait pon la tête dé compter d'points !
Lé chein tch'est enchèrgi d'faithe lé sèrvice à la butte est eune affaithe d'accord entre les joueurs du côté d'sèrvice. Lé même peut l'faithe tout l'temps ou i' peuvent lé faithe châtchun à tou ou changi d'temps en temps comme il en est accordé parmi ieux.
G. F. Le Feuvre
San Antonio, Texas, U.S.A.
Janvyi, 1959.
Notes dé FLM:
Viyiz: