En plusieurs occasions à ches dernyi, quand j'étais dans la campagne à r'chever des arriéthages, etc., pour le compte des Chroniques, j'eus l'opponunité de vaie le biau spectaclye d'une vingtaine de tchans et une quarantaine de ch'vaux à galoper à travers des clios et i' y avait des douzaines d'automobiles de stationnées de bord en autre le long des routes pour les vaie passer.
Je r'connu iun de nos clients dans iune de ches cârosses-là et je m'adressi à li pour li d'mander de tch'est qu'i' s'agissait.
"Oh bon, Caouain, ch'est té? Ouest qu'est tan ch'va?" qu'i m'dit.
"Extchusez-mé," je li raîponni, "mais je n'vos comprends pas ; je n'possède pas de ch'vaux, mé!"
"Mais tu devethais être à ch'va avec ches gens-là un jour comme annièt. Tu n'as rain à faithe au Jeudi."
"Je voudrais bain les joindre," je li dis, "mais comment m'y prendre? Ches dames et messieux-là ne voudraient pas un ouaisé comme mé dans lus compagnie!"
"Ah mon doux, si fait! Au contraithe, rain ne lus f'thait un pus grand pliaisi! Ecoute ichin, connais-tu George Romethi du Mannyi d'Surville? "
"Dame, si je l'connais! ch'est iun d'mes pus grands amins!"
"Eh bain, va l'trouver et i' t'ditha comment faithe."
Et don, je n'perdi pas d'temps mais je m'en fus trouver George dès le lendemain au matin.
I' fut enchanté d'ouï tch'est que j 'proposais d'faithe et me d'mandi tchi ch'va que j'avais idée d'monter.
"Oh, j 'li dis, je criyais p't-être que tu pouorrais m'en prêter iun."
"Ah,' qu'i' s'fit, "je crains que les mains es'saient trop erpétillyis pour té. Je m'en vais te donner l'adresse d'une êtablye ouest qu'tu pouorras en louer iun à un prix d'raison, et che s'sa un ch'va convenablye et sus tchi que tu pouorras aver pliaine confiance. Et i' y a une aut'e chose, tu n'peux pas aller au "Hunt" vêtu comme tu ès. I' t'faut des habits d'occasion! J'm'en vais t'en faithe une liste avec l'adresse des êtablissements qui peuvent te fourni tout au complièt.
D'abord i' t'faut une pathe de braies d'selle, un veste d'couleur et une naithe câsaque à longues pannées. Et pis i' t'faudra une bianche cravate avec une êpile en fé de ch'va, et comme chapé, un "bowler " du dernyi modèle. Tout chenna tu peut aver à autchune des grandes boutiques.
En outre, i' t'faudra des hautes bottes et une pathe d'êpeçons, un fouèt d'selle et pis, ça y est!"
Je prins note de tout chenna et cache me v'là hors à faithe mes empliètes.
Je n'pus pas sinon m'aperchever des r'gards d'êtonnement sus les faches des gens d'la boutique quand je lus fis part de ch'que j'avais besoin mais ils 'taient bain obligis de m'servi et ch'tait raique quand tout fut patchi et que j'tais en train d'emporter man ballot que l'affaithe s'embrouollyi un mio.
Iun des assistants dit comme chenna, " Extchusez, mais ch'est la couôtume ichin pour des gens qui n'sont pas de nos clients habituels, de payi comptant."
"Oh! " je li dis, "je n'ai pas d'change sus mé pour le moment. Mettez chenna bas.' '
"Et à tchi nom, si vos pliaît? "
"Les Chroniques," je li raîponni, "Rutland House, Charing Cross." Et j'fili avec man patchèt.
I voulithent me faithe ertouâner mais je n'entendais pas de ch'tte ouotheille-là. Quand l'compte veindra ch'est au Chef de s'dêpiaûtchi avec ieux du mus qu'i' pouorra.
Je m'attends bain que les Auditeurs aithont tchique-chose à dithe.
Enfin, quand Jeudi arrivi, je m'décidi de faithe une petite surprinse à nos gens.
Je m'enfrumi dans la mansarde et je m'installi dans man nouvel uniforme.
Quand tout fut prêt et que j'ouvri la porte, Marie Hibou, qui ramontait les d'grèts à chu moment-là en s'viyant en fache d'un êtrangi, se mins à faithe des brèts et dêgringoli en bas pour se mettre à l'abri dans la boutique et souos la protection du Chef.
Je la suivi avec autant de dignité que pôssiblye et j'entri dans l'bureau.
Le Chef ne me r'connu pas ninnetou li et en me saluant d'une manièthe bain respectueuse, se fit comme chenna, "Moussieur désire? "
Et pis i' me r'connu.
" Seigneur de grâce! qu'i' s'êcriyi, " ch'est l'maudit Caouain! "
Mess Simon, li, eut une' telle surprinse, ou'i' s'êvanni raide et s'amouocheli sous l'conteux.
Marie s'mins à m'contemplier et i' m'semblyi que jamais ou' n'm'avait r'gardé avec tant d'admithation.
Mais l'Chef prins la chose au sérieux, li.
"Tch'est qu'tout chennechin veurt dithe?" qu'i' s'fit. " Tchi sorte d'farce est qu'tu ès à nos jouer?"
"I' n'y a pas d'farce du tout," j'li raîponni, je m'en vais au "Hunt," et j'attends man j'va à toutes minutes"
Justement comme je disais ch'la, nous entendi un ch'va qui piétinait dans la rue et en même temps nou frappi à la porte du bureau.
Man bidet 'tait arrivé.
Sa mîne ne m'pliaisait pas du tout.
Il avait un r'gard farouche. La coue li touânait comme un moulin-à-vent et ses ouotheilles étaient renvertchies en driéthe d'une manièthe qui n'inspithait pas grand' confiance.
Je c'menchi à r'gretter rn'n entreprinse.
Mais i' n'y avait pas moyen, je n'pouvais pas haller à r'tchullons.
Je d'mandi deuxtrais tchestions au domestique qui m'l'avait amené et i' m'dit que j 'n'avais rain à craindre, qu'il 'tait doux comme un agnié et qu'autchune dame pouvait l'monter.
Par chu temps-là, la présence d'un ch'va d'selle à la porte des Chroniques avait êvillyi la tchuthiosité de touos les vaisins et i' y avait pus de deux chents personnes de dêhallés dans Charing Cross, et même nos imprimeurs avait tchitté lus travas et étaient groupés à faithe des riselées à m'n êgard.
Mais je n'laissi pas rain de ch'la me dêrangi. J'adopti l'air d'un homme qu'est accouôtumé d'aller à ch'va touos les jours et faisant un signe à l'homme qu'avait amené man coursier de m'baîlli un coup d'main, je m'embertchi sus la selle et me v'là parti.
Mais les imbéciles qu'étaient attroupés dans les envithons, se minrent à faithe des hourras et à tapper dans lus mains avec le rêsultat que man bidèt fut prins d'peux et s'mâti sus ses gambes de driéthe et fit tout d'sortes d'gymnastiques, si bain que ch'tait un mithaclye que je n'fus pas tchulbutté dans la route.
Je r'pathi de l'maîtrîsi et de l'avitrer amont la Parade. Je passîmes le Cenotaphe sans accident mais quand j'vinmes endret l'auberge à Bill Louothains le maudit bidèt arrêti tout court et r'fusi d'aller pus liain. J'avais biau le quétillyi et li baîlli des coups d'êpeçon i' n'en faisait note. Comme d'habitude une foule de tchuthieurs c'menchi à s'atchumuler et les uns et les autres me lanchaient des avis, quand Bill Louothains li-même vint à man s'cours.
Il est iun des cache-tchans du "Hunt," et i' m'dit comm chenna, "Es-tu d'avec nous aniet? "
"Eh bain, ch'tait là m'n intention," j'li raîponni, "mais je sis quâsi d'idée d'abandonner la partie."
"Pas du tout!" qu'i' s'fit, "tu n'as rain à craindre, tu vai, ch'est ichin généralement le point d'départ et tan ch'va y est accouôtumé qu'i' s'attend à la compagnie d'autres chevaux. Ch'est pour chenna qu'i' n'veurt pas procéder tout seu. Je m'en vais ramasser l'mein et j'allons faithe route ensemblye."
V'là tchi m'rasseuthi un mio et tchiques minutes opprès l'étions touos les deux en c'min pour La Haule à travers de la grève.
I' y avait dêjà une trentaine de dames et d'messieux d'arrivés sus lus ch'vaux et je m'aperchu tout-de-suite que m'n appathition causi une certaine sensation. I' r'connaissaient bain le ch'va, mais l'individu qui l'montait lus était absolument inconnu.
Man bidet fut s'rangi à côté d'iun d'ses compagnons d'la même êtablye, qu'était monté par une demouaiselle qui m'pliaisait assez bain, et comptant que ch'tait à mé de dithe tchiquechose, je li dit comme chenna "I fait bé annièt."
Ou me j'ti un r'gard des pus fiêtrissants et en m'disant d'un ton hautain, "I beg your pardon!" ou touâni san ch'va d'bord et s'en fut joindre une groupe de ses camarades.
'Ah!" j'dis à mé-même, "Caouain ch'n'est pas ichin un entourage pour un ouaisé comme té! "
A chu moment, Jack Spearman, qu'est souai-disant le trésôri, et qui m'dgettait dépis tchique temps s'en vint à mé et me d'mandi "Are you a member? I don't seem to have seen you before! "
"Je r'présente la Presse," je li raîponni.
I voulu c'menchi a protester mais les tchans se minrent à heurler. La chasse était c'menchie, et cache nos v'là aller patte-à-coue amont les côtils à Jack Chevalyi.
V'là tchi fut superbe à c'menchi mais quand j'vinmes dans l'Coin dans les terres à san frèthe Ph'lippe et que j'viyais les ch'vaux sauter par sus les fossés, je fus prins d'peux et laissant couôre les brides je gaffi la crine de man bidet avec une main et avec l'autre j'empoigni le pommet d'la selle et j'frumi l's yiers quand j'vinmes à la prumié banque.
Je senti le ch'va se l'ver en l'air et pis erdescendre de l'autre bord du fossé avec un satchèt qui faîlli me dislotchi l'co.
Mais à ma grande surprinse je resti sus san dos malgré que j'avais perdu un êtriyi et man "bowler" était hors se jutchi sus une touffe de ronches.
Un bouan Samaritain qu'avait veu man prédicament, arrêti man ch'va, ramassi man chapé et me r'mins en traîn de continuer ma course. Mais par chu temps-là la pus grande partie des ch'vaux étaient à perte d'veue mais l'mein pathaissait connaître san c'min et i' suivi l'parcours iou que les autres avaient passé. I' m'promeni à travers les clios dans l's envithons de l'Arsenal de St. Pierre jusqu'auprès de l'Eglyse et pis par la C'mune et l'Saut Faluet dans la direction de l'Aerodrome.
La chasse s'était arrêtée ichin et j'eus la chance de les rattraper.
J'arrivi là sans accident mais avec les sécouades que j'avais ieu, j'étais pus mort qu'en vie.
Mais j'étais dèterminé de n'pas céder et d'faithe toute la course en entchi.
Opprès tchiques minutes de r'pos les tchans furent erlmins sus la piste et je fûmes condits à travers des mielles pour fini à l'Hotel du Golfe à La Mouaie.
Par chu temps le brit s'était rêpandu que l'Caouain faisait patrie d'là cavalcade et j'eus une reception des pus chaleureuses à m'n arrivée.
La maîtresse du "Hunt " insisti que je li fusse présenté et ch'tait des félicitations de touos côtés.
Quand la charmante demouaiselle qui m'avait touâné l'dos à La Haule, dêcouvri tch'est qu'j'étais, et qu'ou vit tout l'train qu'nou faisait à m'n êgard, ou d'mandi d'être introduite, et d'la manièthe la pus aimablye, me supplyi de la pardonner pour san manque de respé, et ou m'asseuthi qu'oulle espéthait me rencontrer à toutes les préchaines sorties du " Hunt."
Dépis chu jour-là je n'ai fait que d'penser en lyi et j'n'attends que l'moment que nos Etats adoptent la louai sus l'divorce, car Marie Hibou es'sa la prumièthe à y passer.
Man costume êlégant fut admithé par tout l'monde et deustrais dames insistithent de prendre ma photographie, mais illes aithaient voulu que je r'montisse à ch'va, mais chenn était impôssiblye, j'étais trop êcorchi, ch'est pourtchi j'eus man portrait prins sus terre et tenant man ch'va par la bride.
Quand tout chenna fut fini je pliaichi man bidet entre les mains d'un cavalyi qu'en avait loué iun de la même êtablye et qu'eut la complaisance de le r'emmener en ville, car comme je vos ai dit, j'en avais ieu assez.
Je brûlais d'envie d'entrer dans l'hôtel car j'avais une mortelle sai et je savais que j 'y trouvethais tchiques connaissances qui n'manquethaient pas de m'convier et qui me r'portethaient siez-nous dans lus môto.
La barre était pliaine et je r'connu un nombre de mes amins. I' y avait George Romethi, Jack Spearman, Jack Dallain, Reg. Baudains, Frainque Trachy et plusieurs autres et de touos côtés ch'tait, " Hallô Caouain! Tch'est qu'tu t'en vas prendre? "
Ch'tait une honneur pour mé d'aver une patheille réception et un geste qui r'chu ma pus profonde appréciation et de tchi que j'prins le pus complièt avantage.
Je n'sis pas à même de raconter chein qui s'arrivi en suite. Ma mémouaithe me fait défaut. Tout chein que j'sais est qu'un amin charitablye - je n'ai jamais peu dêcouvri tch'est que ch'tait - me r'porti siez-nous. Le lendemain au matin j'eus à enduther les insultes de Marie Hibou qui m'dit que ch'tait grand damage que je n'm'étais, pas rompu l'co.
Mais touos ses protêts ne m'dêrangent pas. Je sis dêterminé d'y r'aller dès qu'mes êcorcheuthes erséthont dgéthies.
Lé Caouain
Viyiz étout: