L'aut'e Samedi l'arlevée Maît'e Cliément d'Caen nos payi une visite à la boutique.

Il 'tait tout radieux et pathaissait être dans une diverse jouaie.

Je fûmes bain surprins de l'vaie comme chenna, car généralement, ch'est un vier roupilleux, et jusqu'acheteu toutes les feis qu'i' nos rendait visite ch'était pour se pliaindre entouor tchiquechose qui n'allait pas à san goût ou entouor tchiqu'uns qui l'avaient offensé.

Mais chu jour-là, il 'tait tout-à-fait transformé.

Che n'tait pas du tout l'même homme.

“J'avons gâgni!” i' s'êcriyi, dès qu'i' fut entré.

Une exclamation comme chenna nos fit penser qu'i' s'agissait p't-être d'une êlection, mais je n'avions pas oui pâler qu'i' y eusse autchune chose en allant dans sa pâraisse, ch'est pourtchi je li d'mandîmes, “Gâgni tchi, Maît'e Cliém?”

“Mais ou n'avez pas oui, don, tch'est que certains d'nos fermiers voulaient introduithe dans les réglyements du Herd Book? I' voulaient nos contraindre à tatouer nos viaux dès qu'ils arrivent au monde!”

“Et pour tchi raison, Maît'e Cliém?”

“Eh bain,” i' nos raîponni, “i' veulent prétendre que v'là tchi les empêch'hait de perdre lus identité. Dès qu'un viau es'sait né, i' faudrait en averti le Secrétaithe immédiatement, et il envièthait un fonctionnaithe siez-vous avec les ôtils nécessaithes pour mettre un numétho dans l'outheille du malheutheux viau, un numétho qui soi-disant restethait mertchi là jusqu'à sa mort. Dieu merci, qu'i' s'est trouvé assez d'fermiers au meetin' qu'ont ieu l'bouan sens de voter contre tout chu niollin-là! Est-che que la Société d'Agritchultuthe ne nouos a pas fait dêpenser dêjà assez d'sous sans qu'nous ait à brûler oquo treis ou quatre chents louis par an pour les caprices d'une poignie d'êchervelés?”

“Mais, Mess de Caen,” je hasardîmes, “i' nous semblye que ches messieux-là son poussés par des sentîments dignes des pus grands êloges. Chu procédé-là es'sait une garantie contre la fraûde. De che que j'en comprenons, i' n'y aithait pas deux numéthos d'une sorte, une bête une feis mertchie, es'sait seuthe que sa généalogie ne pouorrait pas être perdue ou êchangie. Les erreurs et les mêprinses d'viendraient impôssiblyes nos bêtes aithaient la certitude qu'i' n'avaient pas 'té joués.”

“Bah, bah!” s'fit l'bouonhomme, “tout chenna est un tas d'niollin! Jusqu'acheteu nou s'est bain graie souos l'vier régime et ch'n'est pas la peine de l'changi. Toutes ches théories-là et les expériments qu'ches gens-là voudraient introduithe sont ni pus ni mains que des atteintes à not'e liberté. Je veurs rester maître siez-nous, sapresti et faithe comme bouan m'semblye avec man bestias. J'ai iune des miyeu vaques de Jerri dans m'n êtablye. Oulle a gâgni une masse de sweepstakes et d'prumiers prix, et les Améthichains vainnent la vaie toutes les feis qu'i' vainnent en Jerri. Iun d'ieux me d'mandi d'la m'ner au “Blonde's Gamboge You'll Never Do” et qu'i' m'acat'tait sa g'niche s'oulle en avait iune. Eh bain, ch'est à mé de vaie qu'oulle ait une geniche!

Si par chance qu'ou m'baillait un boeu, je m'en vais-t-i laissi ch't Améthitchain-là être désappointé et mé, mantchi à faithe un coup? Supposons ettou que ch'en s'sait iune, une geniche, toute d'une couleur, avec la langue et la coue naithe, et qu'au but de deustrais s'maines que j'vaindrais à la perdre, chute maudite tatouothie-là m'empèch'hait d'la rempliaichi!

Est-che raisonnablye chenna?

Une bouanne geniche en vaut bain une autre, et si man customer est satisfait et qu'les papiers sont en réglye, chenna ne r'garde personne!”

“Eh bain, Maît'e Cliém, je n'y connaissons pas grand chose, mais j'avions tréjous comprins que par les réglyements, dès qu'une vaque vêlait, i' fallait que l'propriêtaithe fîsse venin un membre de la Sociêté pour vaie la vaque et l'viau et signer un certificat dêtaillant la description du nouviau-né.”

“Vaithe,” se fit l'vier de Caen, “nous est supposés de faithe chenna, mais nou n'veurt pas dêrangi ses vaisins à chu point-là. Oquothe au but d'tout nou dait aver un mio d'confiance les uns dans l's autres et signer un malheutheux certificat sans aller senti dans l's êtablyes à ses vaisins! Ch'est pour chenna que j'n'ai jamais peu m'arrangi avec Laiesse Ernon. Il est en faveur du tatouage li, et il est iun de ches ultra-conscientieux-là qui jamais ne sign'naient un papi devant que d'aver examiné l'viau. Des vaisins comme chenna ne m'servent d'rain, à mé!”

Je vîmes bain que ch'tait inutile d'ardjumenter pus longtemps avec le bouonhomme.

Il est trop vyi acheteu pour changi ses principes êlastiques et je n'voudrais pas l'offenser pour autchune chose.

En châtchant d'main avec li je li souhaitîmes une bouanne année et tout d'succès avec ses bêtes.