Moussieu l'Editeu,
Je n'sais pas tchèsque la Merrienne a yeu chutte semaine, mais d'vant assêsé ou n'm'avait pas r'prochi une seule fais quand je r'venai à la fin d'l'arlevée après avé 'tait à un show d'bêtes. Je criyais bein quand-même qu'oulle y veindrait et je n'me trompais pas, car après l'tais agniet oulle a qu'menchi.
“Eh bein,” oulle a dit, “ne v'là trais jours que tu'as 'tait hors, sans pâslé du temps pérdu la s'maine passée. J'éspèthe que tu'ès satisfait, et qu'ach'teu tu pouôrras te r'mettre à faithe un coup d'travas.”
“Arrête un mio bouonnefemme,” j'l'y dit. “Y'a ocquo l'show à Saint-Sauveux démain, et y faut que j'y'aille, car j'ai ouï que y'étha tchiques bouonnes vaques. N'ou m'a même dit que j'pouôrrais en vais yunne tchi châquetha la sienne au Sieur Perchard, de Saint-Martin.”
“Oh,” ou s'est faite, “et est-che-là la miyeuthe que tu'as veu? Veur-tu m'dithe qu'autchun d'mes couôsins Richardson n'a pas montré aussi bé?”
“Nou vêrra la s'maine tchi veint en Ville,” j'ai dit, “mais j'en doute. Ch'n'est pas parsque les Richardsons sont tes pathens, et même ach'teu je n'sais pas comment tch'y sont seux d'avé d'miyeu bêtes que d'autres. Avec chonna, le Douglas, à Saint-Ou, en a yunne dans s'n'êtablye que j'ne s'sais pas mârri d'avé ichin. Ou fit l'championnat des Trais Pâraisses, et ch'tait tchiquechose, mais y faut adméttre qu'ou n'avait pas tchèsqu'ils ont dans l'ouest, mais je n'trouve pas tch'ils ont aussi bouon comme j'ai veu.”
“Ch'est la saison,” oulle a dit. “Y n'y'a pas d'herbe. Les bêtes sont là, et tu les vêrras au r'nouvé, n'te gène pas.”
“Et sans doute, vieille duthe-tête,” j'ai dit, “tu voudrais m'dithe que dans l'Est y'a yeu d'l'herbe jusqu'au g'nou. Va d'mandé au Bill Perchard si ch'est vrai.”
La bouonnefemme n'a pas print là-d'sûs, mais s'est minse à pâslé du temps. “Ch'est bein bon,” ou s'est faite, “de s'gèné des bêtes tchi n'ont pas d'herbe, mais as-tu considéthé que si n'veint pas d'iau dans p'tit d'temps tu n'pouôrras pas t'lavé, et mé, je n'pouôrrai pas lavé la vaissélle?”
“Quant à chonna,” j'ai dit, “v'là tchi ne f'tha pas grand ma. Trop d'lavage gâte la pé, et pour une assiétte, pour bein que y'aie tchiquechose à mangi d'sûs, le réstant n'me gène pas. Après tout, Merrienne, les villais sont bein pièthes que nous, car y n'ont d'iau que quatre heuthes par jour.”
“Ch'est d'lûs faute,” oulle a dit. “Dans les viers temps y'avait des pompes partout la Ville, et y n'mantchait pas d'iau, mais ach'teu ch'est les Waterworks, et ch'est bein pûs facile de touôné un tap que d'se faithe sérvi d'une pompe. Ch'est des piércheux, les Villais, et v'là tchi lûs sert bein. J'm'en vais faithe une tâsse de tais tandis qu'y'a ocquo d'iau dans l'pîs. En veur-tu?”
J'éthais préfethé un vêrre de bièthe, Moussieu, ou deux d'goûts de tchiquechose un mio pûs fort, mais je n'gâgnais rain d'en paslé. Quand j'eûmes bu, la Merrienne a d'mandé tchèsqu'y s'en allait gâgnit l'êléction en Angliétêrre.
“J'n'y comprends pas grand-chose,” ou s'est faite, “mais les gâzettes en sont plienes et j'pense bein qu'ch'est assez important. Y'étha-t'y un change, crais-tu?”
“Pas si l's'êlécteurs ont un mio d'avis,” j'y'ai dit. “Ou n'dév'thait pas changi un bouon gouvernement, mais jamais nou n'sait, car en Angliétêrre ch'n'est pas comme ichin. Nous, quand j'avons un bouon Connêtablye ou Député, j'prenons bouon soin de l'gardé tandis tch'y veur continué à nous sérvi. Ch'est la couôtume dans nos pâraisses de campagne, et je n'crais pas qu'nou vêrra hardi d'changements dans un an d'ichin, quand y'étha d's'êlections partout l'Ile.”
“Et dans la Ville,” oulle a d'mandé, “tchèsqu'y s'arriv'tha-là?”
“Oh, damme,” j'y'ai dit, “dans la Ville ch'n'est pas la même chose du-tout, car à qu'menchi une bouonne maintchi des êlécteurs ne votent pas, n'y ayant autchun intéthét, épis un Député n'peut jamais être seux tch'y ne s'sa pas fichi à la porte à la fin d'ses trais ans, comme le pouôre Swinnerton à la draine êléction. Entre nous, j'comprends que l'Mike Le Cornu, tch'y n'est pas un mauvais balloque quand nou veint à l'connaître, pouôrrait s'porté candidat dans l'numétho trais. J'l'ai veu et j'y'ai pâslé, et ch'est un bouon Jêrriais, mais comme touos l's'autres de la clâsse ouvrièthe, y n'a p't'être pas l'moyen, car de nos jours un membre d's'Etats est forchi de donné hardi d'san temps sans autchun paiement. Sans doute le temps veindra que che s'sa comme en Angliétêrre, ouèsque les membres sont bein péyis, mais comme les choses sont ach'teu, un homme tch'y n'a pas assez d'moyen n'peut pas aspithé ès Etats. En Jêrri, ch'est chonna qu'nous appèle la Démocracie.”
Ph'lip
1959
Viyiz étout: