 du lait Jèrriais
|
Mon pèthe ma souvent dit que dans des situations d'même, le lorry tchi collecter passer une démi'heuthe pus bonne heuthe, et l'lait tchi n'tait pas prêt 'tait laîssi sus la ferme, et l'fèrmyi en faithait au beurre.
Dans ch'est temps là, i'avait une lait'tie à Don Street, iou qu'anniet, n'ou trouve Westaway Chambers. La lait'tie s' app'ler La Jersey Co-operative Dairy, et la pûspart des châres appartenaient ès fèrmiers; sa fonction principâle 'tait l'beurre.
I'avait étout une trentaine de lait'ties privées tchi s'otchupaient seulement a ramasser l'lait des fermes et l'vendre directement au publyi: lus surpus aller à Don Street.
Au c'menchement d'la deuxième dgèrre, Les Etats prîntent chèrge de Don Street et la situation resti d'méme jusqu'à chînquante deux, quand l'Comité d' Agricultuthe anonci que l's Etats s'en allaient abondanner lus contrôle à la fîn de chînquante quatre.
Les Etats avaient déja mînt une louai en pièche pour autoriser les fèrmiers de former un comité, connu comme une Board, auve le pouver d'acater et d'marchander autchun produit d'fèrme; la louai s'applyitchait à toute la production spècifier.
Les Comités du Royal Jersey et d'la Farmers' Union perdîtent pas d'temps a nommer un comité de douze de lus membres, pour prepather des plians pour prendre chèrge de tout l'lait de l'Ile. Aprês bein des délibéthâtions, la décision d'èrquemander la formation d'la Jersey Milk Marketing Board et d'prendre la vielle lait'tie à Don Street à louage fut prînse. Mînt à la vouaix, les presque mille producteux d'lait donnîtent lus support par une grand majorité. I préféthaient chenna pûtôt que d'être dans les mains de lait'ties privées comme d'vant l'Otchupâtion.
Le preunmyi d'Janvi en chînquante chînq, la Board c'menchi ses fonctions. Le défunt Sieur Cyril Le Vesconte fut êlu président, auve le Sieur Henry Perrée, tchi d'vint Juge, General Manager, et l'sieur Karl Jensen en chèrge d'la machinn'nie, pus tard i' d'vint General Manager.
Les lait'ties privées continuitent à collecter l'lait des fermes et a fourni l'publyi; i' d'livraient lus surpus à Don Street iou tchi 'tait convèrti en crême ou beurre par la Board.
Les lait'ties payaient la Board pour le lait tchi l'avaient vendu, et la Board, après avait garder pour ses dêpens, payer les producteux pour le lait vendu au publyi et pour l'èrtou du surpus convèrti en produits. Pour créer des fonds pour l'aveni, les producteux contribuaient un sou de pot.
Bein vite, i'fut realisé tchi avait un bouon marchi ichin, et en Angliétèrre, pour d'la crême Jèrriaise en tinnes. I'fut decidé de construithe un nouveau bâtisse à Don Street et d'l'êchiper auve des nouvelles machinnes. La décision fut tout à fait justifée, car duthant la preunmié année trais quart d'un million d'tinnes futent vendues à un prix tchi donné un miyeu èrtou qu'le beurre.
Enfîn, i' fallait trouver les sou pour financer les entreprînses, pas seulement la crême mais la lait'tie d'originne et sa machinn'nie tch'avait 'té acatée vers la fîn de chînquante chînq; le sou du pot contribuer par les producteux n'tait pas assez. Souos les circonstances, la Board emprunti vîngt chînq mille louis des producteux a une intêthet de chînq du chent, et remboursabl'ye dans l'couothant de dgiez ans, en soixante six. L'emprunt fut èrpayit en soixante trais.
En chînquante neuf, pour gangni de l'éxpethience à courre une lait'tie tchi vendait au publyi, la Board acâti la Victoria Co-operative Dairy, située dans Victoria Street iou qu'anniet n'ou trouve la campagnie app'lée 'Lifestyles' .
Par chu temps ichin, le nombre de lait'ties privées avait d'scendu à quatre. Lus machinn'nie avait besoin d'être rempliaichie, mais i' n'taient pas prêts à y depenser les sou, car pour faithe des êconomies dans l'industrie, la Board avait dêja annoncer ses intentions de bâti une nouvelle lait'tie, grande assez por èrchever et distribuer tout l'lait de l'Ile, et y convèrti l'surpus.
En soixante trais, dgiez vrègies d'terre futent acatées à Five Oaks pour bâti la lait'tie tch'est la anniet. Le manager, Karl Jensen, entreprînt la grande responsabilité pour le bâtisse et la machinn'nie. La lait'tie ouvrit dans l'mais d'Mar en soixante six et ou la'tait hardi admithée par bein d's'experts dans l'commerce du lait.
Dans l'entre temps, les lait'ties privées décidîtent de vendre. La Board s'attendait que les Etats éthaient aidgi à l's acater, aussi bein comme faithe une contribution envèrs la nouvelle lait'tie, mais i' n' taient pas du tout de ch't'idée la.
Quand la board 'tait à faithe des arrangements pour emprunter du secteur privé, les Etats n'taient même pas prêts à rester caution. Tchi bonheu que l'attitude a changyi dans les dèrnier années. La creation d'la Board mînt les producteux de lait en chèrge de lus affaithes auve l'avantage de pâler d'une seule vouaix. Sans la Board j'me d'mande si i éthait une industrie à lait en Jèrri anniêt.
Percy L'Masuthi
Viyiz étout:
