Moussieu l'Editeu,
Ch'est avec grand pliaisi que j'vos dis agniet que tout est paisiblye siez nous pour le moment.
La Merrienne a oublié touos ses maux, et hier matin, après que j'avions dêjeuné, ou me d'mandit d'allé avec l'yi dans l'gardin. J'l'y dit que j'n'avais pas l'temps mais oulle insistit, et don j'y fut.
Jamais tu n'craithais, Ph'lip, ou dit, tchesque le biau temps qu'j'avons yeu chais jours a fait à man gardin. Il est vrai qu'la sérclye a cru un mio, mais r'garde chais mérgots-là, et mes rôsiers tchi sont en bouton pour la traisième fais ch't'année.
Quant ès mérgots, Merrienne, j'n'ai qu'à allé au chim'tièthe pour en vais pûs qu'jamais que tu'en as ichin, mais pour tes rôsiers va douochement, car si tu t'en vante dans la pâraisse, hardi d'gens voudront savé si tes louothiers ont bouonne mine étout.
Chonna est du gniolin, ou dit N'y'a pas deux partis à Saint-Ou agniet, car tout est mêlé. E'rgarde par exemplye, à l'Assembliée l'autre sé, quand tout s'pâssit sans un mot d'oppôsition. Même le Sénateur Le Mérquand approuvit de chein tchi fut fait, et quant à mé, j's'y bein contente de vais que la dgainge tch'avait voulu faithe d'la minsèthe au Connêtablye ont décidé d'lûs comporté à l'av'nin, car j'n'aime pas l'bris.
Ma pouore Merrienne, j'l'y dit, j'n'éthais jamais creu qu'tu tais si simplye. Parsque y'a d'biaux mérgots et d'biaux rôsiers dans tan gardin, parsque tout fut trantchille Lundi au sé, parsqu'y fait biau solé et parsque tu n'as pas d'ma autchun bord, tu t'imagine qu'à Saint-Ou le lion et l'agné sont couochis paisiblyement ensemblye, et qu'nou vêrra bétôt le Sénateur Le Mérquand, le Jack Syvret et le George Baudains v'nin d'mandé à Frainque Le Boutillyi s'y peuvent y'aidgi à touôné sa têrre ou à mâté ses patates. Ais don un mio d'bouon-sens, ma vieille.
La Merrienne restit trantchille pour tchiques instants, épis: Vraiment, Ph'lip, ou s'fit, je n'sais pas tchèsque tu'as dans la cabiche agniet. Il est vrai qu'tu'as tréjous tait yun pour prédithe la malfortune, mais à t'nâge tu dév'thais savé mûs ach'teu. J'en ai pâslé à la Louisa, et oulle est de m'n'opinion que tout l'brit est fini, et ou n'est pas bête, ta fille.
Bein seux qu'ou n'est pas bête, j'l'y dit, étant ma fille, mais oulle a la langue trop longue, et ch'n'est pas d'mé qu'oulle a yeu chonna. Mais n'en v'la asséz d's'affaithes de la pâraisse. Dis-mé, as-tu ocquo idée d'allé au show d'la Ville Mêcredi tchi veint?
Damme oui, ou dit. Je n'voudrais pas mantchi chonna. Té tu'as tait bein-près partout, et tu dais avé veu tchiquechose de bé. Crais-tu ocquo que l'championnat des vaques îtha à Saint-Martin ou as-tu veu tchiquechose de miyeu?
Nânin, j'l'y dit, mais j'ai out qu'la vaque fut prinse un mio malade après l'show, et s'ou n'est pas en condition ou pouôrrait tchais de d'sous.
Si un Richardson n'peut pas ram'né une vaque en condition quand ou n'a pas tait trop bein, ou dit, n'y'a pas un homme en Jêrri tchy le f'tha. Mais j'ai oui étout que la célèbre Graceful Lady, tchi dait avé tchinze ans, pouôrrait ocquo être dêshallé. J'voudrais la vais ocquo une fais.
Et mé étout, j'ly dit, car ch'est yunne des grandes vaques que j'ai veu. Ach'teu pour les autres clâsses je n'sais pas pour les jeunes bśux, mais autrement ch'est seux qu'y'étha d'chi bouon partout. Je s'y hardi intérêssi dans les jeunes vaques et même un mio pûs dans les g'niches r'nouv'lées. Dans chais deux clâsses-là les Juges éthont tchiquechose à faithe, et sans autchune doute y n'pliaithont pas à tout l'monde.
Y f'thont d'lûs mûs, ou dit et ch'est tout qu'nou peut d'mandé à un homme.
Ph'lip
1956
Viyiz étout: