Alfred Messervy êcrivait des poésies. Ses noms-d'plieunme 'taient A.M.S.V., Ph'lip Penfaicq et A.M.

I' fut né à La Trinneté et d'vînt navidgant. I c'menchit sa cârriéthe en mé coumme contrémaître sus un baté Belge, lé Brabant. Pus tard i' donnit chu nom-là à sa maîson à La Trinneté dé iou qu'nou-s-a la Rue d'Brabant au jour d'aniet.

I' d'vînt cap'taine du Rescue, et avait des dons pouor les caltchuls et înventit un calendriyi pèrpétuel, proposit un système décimal en Jèrri, et êtablyit un almonnas d'rentes.

Auve sa preunmié femme, il avait chîn fis et eune fil'ye, et s'èrmathyit pus tard.

I' fut êlu coumme Connêtabl'ye d'La Trinneté en 1877, et pis coumme Juge en 1884. I' d'vînt Lieut'nant-Bailli d'vant sa r'traite d'la politique.

I' mouothit à sa maîson Strathmore dans St. Mark's Road à eune heuthe et d'mie, lé deux d'Avri 1912.

I' publyit en 1900 un "Recueil de dictons, bon mots, proverbes, étc en patois Jersiais" et eune deuxième édition pus tard.

Il êcrivit d'aut's publyicâtions en Angliais et en Français étout:

• £.s.d. versus £=Florins=Parts or How to change our present complicated Monetary System, to a System of Decimal Coinage within 48 hours and without changing one single coin (1900)

• Tables facilitant les calculs nécessités dans l'arpentage et partage d'héritages, tels qu'ils se pratiquent dans cette Île (1888)

• Tables facilitant les calculs des rentes tant foncières qu'assignables (1879, 1895)

• Table de conversion etc., etc., etc., (Multum in Parvo) (1899)

Dictons, Bon Mots, Proverbes, etc. en Patois

Viyiz étout:

• Dictons Jersiais

• Dictons, Bon Mots, Proverbes, etc. en Patois

• Allais cherchi des voies!

• Avous counnu l'Anmein Phlip?

• Notre Nouviau Surveillant

• Lé Ramouneux dans l'salon

• Les Paîssons à Mousieu

• Les bouans viers temps

• Eune farce

• Mathièthe d'êlection

   

• Un Acrostiche