Lé Prînce Charles est souvent montré comme un homme r’chîngni et gâté. Nou raconte d’s histouaithes tchi disent qué châque jour nou bouort sept oeux pouor san dêjeuner à seul fîn qu’i’ piêsse trouver iun tch’est tchuit à san goût. Nou lî êtreint sa pâte-à-dents sus sa brînge à dents. Et sa serviette dé bain est pliée au d’ssus d’eune tchaîse d’eune manniéthe partitchuliéthe pouor quand i’ s’lève du bain rouoya.
I’ garde eune ênorme êtchipe privée – des s'grétaithes, s'grétaithes assistants, officièrs d’médias, quat’ valets, deux maît’s dé tabl’ye, des gardgiens d’maîson, deux chefs, des cacheurs, dgiêx gardîngnièrs, toute eune armée d’concièrges, d’s hommes à tout faithe, des nettisseurs et des sèrvantes. Nou-s'attende qu'i' faichent bein tout lus travas. Quand SAR (S’n Altesse Rouoyale) considéthe qu’il’ ont bein fait lus d’vièrs, il les louange dans un mémorandum rouoya, mais s’il’ ont fait des mêprînses, i’ sont app’lés dans san bureau pouor êt’ lichonnés. Lé Prînce peut dév’nîn si court d’pé qu’nou l'èrconnaît d’aver des tchîntes dé coléthe, d’fliantchi d’tchi et d’hueurler d’èrgolinne.
L’homme privé et publyi
Charles est originna, et i’ l’admets. I’ pâle ès bouais et ès pliantes. I’ veurt prêsèrver l’s annimaux sauvages, mais il est entchéthinné pouor cachi, tither et pêtchi. Il s’habil'ye pouor l’souper, même s’il est pouor mangi tout seu. Il est du haut monde. Des poètes, d’s artistes, d’s auteurs, des présentateurs, des politiciens, d’s acteurs et des chanteurs sont atchilyis à mangi siez li. Arrivés à Highgrove, san siez-li, Sanm’di l’arlévée en bouôn temps pouor un grand Martini, l’s învités sont distraits dans du grand luxe. I’ sont renvyés siez ieux d’vant l’dînner Dînmanche, auprès aver ‘té condits l’tou d’san bieau gardîn.
Au mains deux fais par an, lé Prînce atchil'ye extravagamment à Sandringham étout, iun des palais d’la Reine. Y’a des dînnièrs en pique-nique sus la grève, d’s expeditions ès églyises du vaîsinné, et des soupers prodigues auve du mangi organnique dé Highgrove. La convèrsâtion est vive, mais l’héthitchi du trône dait couoyi ses patholes, viyant qu’i’ connaît hardi bein qué chein qu’i’ dit en privé peut êt’ èrpété en publyi.
Lé rouai dé l’av’nîn qu’ nou n’vait pon est un homme dé grand humeur, tch’est hardi souongneux dé l’êtat d’la nâtion Britannique et tch’est dêvoué à ses deux êfants, Dgilliaume et Haro. Il est fo d’amour d’sa “chiéthe bouonnefemme” – ch’est comme chenna qu’i’ pâle d’Camilla en publyi.
Eune vie dé d’vé
Charles et Camilla font les d’vièrs rouoyaux ensembl’ye, dans l’Rouoyaume Unni et ailleurs. Il aîgue à pus d'500 êvénements publyis par an. I’ fait des visites ès hôpitchieaux, ès groupes dé jannèche, ès artistes, ès charités et ès conféthences conmèrciales. Il est hôte ès réceptions pouor des grôsse-têtes d’hors-pays. I’ viage partout souvent, comme ambassadeu du Rouoyaume Unni, pouor èrprésenter lé conmèrce et l’îndustrie. I’ travâle dû pouor haûchi la compréhension entre les difféthentes èrligions. Il est étout Président des Charités du Prînce, tchi sont actis dans la promotion d’l'educâtion, du conmèrce, d’l'envithonnement, des arts et d’s opporteunités pouor les jannes gens. Lé groupe tcheûte pus d'£110 millions par an.
Camilla partage la pâssion d’Charles pouor la chasse et s’n întéthet dans la consèrvâtion des villes et du pays. La seule chose qu’ou laîsse à Charles est lé ski. Oulle aime mus rester siez ieux quand i’ fait sa visite annuelle à Klosters en Suisse.
Tous excepté l’empliai du copé
D’pis qu’i’ s’mathyit pouor la deuxième fais, l’Prînce Charles a tout chein qu’i’ veurt excepté comme Diana (tchi fut tuée dans un accident d’vaituthe en 1997) soulait app’ler l’empliai au copé. Même sans aver ‘té sus l’trône, il a travailli dû pouor ag’ver tant. Il est gêné d'l’êtat du pays qu’il aime, et i’ d’vînt frustré auve les gouvèrnéments tchi font presqué rein pouor sorter les problièmes dé tchi qu’il a tant d’sentiment.
Lé Prînce dé Galles a eune mannifactuthe d’mangi, L’s Originnaux du Duché. Au c’menchement i’ produisit des galettes, mais au jour d’aniet il a agrandi pouor dév’nîn ieune des mus connues et pus rêussies des mèrques organniques Britanniques, auve pus d'200 produits, înclius du mangi, des bouaissons, et des produits pouor les g’veux et l’corps.
Charles, bein-întentionné, dêvoué au travas, consèrvateux et d’la vielle faichon continnue à faithe san d’vé comme i' l' comprends. Mais i’ n’est pus tout seu. Iun d’ches jours i’ s’sa Rouai, et sa chiéthe Camilla va êt’ SAR la Prîncêsse Consorte.
Viyiz étout: