En rueûquant à chésé, jemme sis mins dans l'idée,
Décrithe deux-trais lines pour le qu'menchement d'lanèe,
Et en qu'menchant ma rime j'vos en dithai l'sujet:
Ch'est pour Victoria not' Reine et pour san Jubilet.

I'yiétha chinquante ans le mai d'Juin qui vain
Qu'ou monti sus l'trône, ah! j'mens r'souvains bein;
Y'en avait des hourras et d'la tithie d'cannons,
Des feux d'joie partout et d'illuminations,

Et permettais mé d'vos dithe qué Jèrri n'manqui pas
A célébré l'jour dépis l'haut jusqu'en bas;
Je vinmes touos en avant comme nos pèthes devant nous,
A lus môtré d'laute bor que j'entaimes pas des coucous.

Mais des d'sendans d'Normans et d'là premié trempe
Que quant i' s'y mette shèque i' faut q'tout s'en sente,
Et j'espèthe bein ètout que quand l'grand jour veindra,
J'en son par les derniers à faithe un bel écliat.

Vraiement oul' méthite bein, not' chièthe Oguste Reine;
Que pour près d'chinquante ans, nos gouverne sans jaine;
Et qui prins la paine de v'nin avec le Prince et sans fils,
Nos payé une visite, dans mil huit chents quarante-six.

Allons, Jèrriais, j'espèthe que jé 'son touos d'un accord,
Et pour faithe l'affaithe en style, y mètre touos nos effors,
Que jé 'sai Institut, Monument, Landing Stage ou Boulevard,
Faisons quique chose tréjous, né séyons pas des mouchards

Jé cré qué'l mus d'tout és'sait d'faithe la quillette,
Et ramassai des sous pour ergrès la Collette,
Et pis pus tard, sien cas, quand tout és'sait cllié,
Nou pouorrai erqu'menchi les travaux du châté.

Les cheins qui veullent, peuvent se servi du dergni verset pour erfreint!