Moussieu l'Editeu,
Après la triste nouvelle que j'apprint l'autre matin, y faut avoué que je n'tais pas hardi dans les sentiments d'vos êcrithe comme de couôtume. Mais, après tout, y faut faithe san d'vé dans autchune circonstance, et don j'ai print couothage.
Quand, l'autre matin, dans les onze heuthes et d'mie, la femme au Bram accouothit ichin et annoncit la mort du Rouai, la Merrienne, tch'y tait en train d'netti sa tchuîsine, ne voulit pas l'craithe.
"Ch'n'est pas pôssiblye," ou s'fit, "et tu dév'thais savé mûs Jane que de v'nin nos êffrité avec une patheille histouaithe. J'savons ben tch'il avait tait ben mal pour un temps, le pouôre Rouai, mais les docteurs avaient dit tch'y tait mûs, et j'tiomes tous rasseûthés. Ch'n'est pas la véthité, chen qu'tu nos dis, mais tchique rumeur qu'a couothu. R'va-t'en siez té faithe tan travas."
Mais... malheutheusement, Moussieu, ch'tait vrai, et quand vint l'sé, assis aupi du feu, j'nos mîmes à en pâslé. J'n'ai pas d'honte de dithe que par bordée j'avions les lérmes ès yiers, quand pensaîmes à la Reine et l's'autres membres de la famille Royale.
"Si nous avait seu," dit Merrienne, "tch'y tait ben mal, et que n'y'avait pas grande éspethance, le coup n'éthait pas tait si sévèthe, car nous éthait tait prépathés, mais ch'est un tèrriblye choc quand une pérsonne pâsse comme chonna dans la niet."
"Sûs un sens, vèthe, Merrienne," j'l'y dit, "mais sûs un autre y faut considéthé que dans patheils cas n'y'a autchune souffrance, et qu'ch'est une belle mort. Après l'preumié têrriblye choc nou veint à vais qu'la Providence a tait bouonne, et nou dait en être r'connaissants."
"Eh ben, man Ph'lip," ou dit, êssuyant ses yiers avec san mouochet, "j'pense ben qu'tu'as raison, mais le Rouai n'tait pas vyi, et ses docteurs avaient tréjous fait l'monde craithe tch'y r'était prèsque en santé. Chen que j'trouve drôle, ch'est qu'avec toute lûs science, y n'pouvaient pas dêcouvri tch'y tait un homme mouothant."
"Les docteurs, ma Merrienne," j'l'y dit, "font d'lûs mûs, mais n'y'a pas un homme dans l'monde tch'y n'peut pas s'trompé, et y n'faut pas les biaumé. Et ach'teu ch'est d'pensé à la pouôre jeune femme tch'y s'trouve tout soudaiment Reine d'Angliétèrre, à l'âge de vingt-chinq ans. Ch'est une têrriblye résponsabilité sûs ses êpaules."
"Vèthe," ou dit, "et y l'y faudra l'aide de nos prièthes. Par chen qu'nous en ouait, oulle a tréjous tait bouonne fille, et dans sa dêtrésse la Providence ne l'abandonn'na pas. Epis y n'faut pas oublié qu'l'exemplye de san noblye pèthe la souôtiendra, car si jamais un homme a fait san d'vé dans l'monde ch'tait ly. Nou le r'grète, mais seux et certain qu'nou n'a rain à l'y r'prochi. Quant à sa brave femme, oulle a tréjous tait aimée par le riche et l'pauvre. Avec des pathents d'même la Reine Elizabé n'peut pas sinon être bouonne et capablye, et nous est contents d'savé qu'oulle est mathiée à un homme tch'y l'aime de tout san tchoeu."
"Absolûment," je m'fit, "et y'a chonnechin étout Merrienne, que l'Angliéterre a tréjous prospéthé souos une Reine. Sans autchune doute che s'sa la même histouaithe chutte fais. Mais, sais-tu ben qu'nou trouv'tha drôle en qu'menchant de bèthe à la Santé d'la Reine à un dîné et d'chanté God save the Queen, quand nous a tait si longtemps acouôtumés à un rouai."
"Y'étha ben d'autres changements," ou dit, "mais y'a une chose tchi n'change jamais, et ch'est la loyauté des Jèrriais à la Couronne. La Reine, que la Providence la bênisse, peut s'fié que si jamais ou veur de l'aide de notre île ou n'étha pas à d'mandé deux fais."
"Amen à chonna," j'ly dit.
Ph'lip
Les Chroniques de Jersey 9/2/1952
Viyiz étout: