Au mais d'Août 2000, j'fêtons l'chentenaithe d'Sa Majesté la Reine Elizabeth, la Reine Méthe.
Ou fut née lé 4 d'Août, 1900, san nom êtant Elizabeth Angela Marguerite Bowes-Lyon. Ou 'tait la fil'ye du 14e Comte dé Strathmore et Kinghorne, dé tchi la fanmil'ye 'tait d'cendue des rouais d'Êcosse. Sa fanmil'ye d'meuthait au Châté dé Glamis en Êcosse, mais la Reine Méthe pâssit ses preunmières années dans lus maîson à Hertfordshire en Angliétèrre.
Ou savait pâler l'Français avant l'âge dé dgiêx ans, mais san quatorzième annivèrsaithe n'tait pon heutheux: ch'fut lé c'menchement d'la Preunmié Dgèrre Mondiale, et l'Châté dé Glamis d'vînt un hôpita.
San fanmil'ye avait 'té des anmîns auve la Fanmil'ye Rouoyale, et en Janvyi 1923 Elizabeth et l'Duc dé York fut engagis. I' fûtent mathiés lé vîngt-six d'Avri 1923 à l'Abbaye d'Westminster.
Lus vie fut boul'vèrsée par l'Abdicâtion du Rouai Êdouard VIII, lé fréthe du Duc, en Dézembre 1936. Lé Duc dé York d'vînt l'Rouai George VI, et la Duchêsse d'vînt la Reine Elizabeth.
Auprès l'Otchupâtion, lé Rouai George VI, not' Duc, et la Reine vîntent vaie les gens d'Jèrri en Juîn 1945 auprès les longues années souos l's Allémands.
Mais, l'Rouai mouothit lé six d'Févri 1952, et la Reine vît sa fil'ye, la Prîncêsse Elizabeth, dév'nîn la Reine Elizabeth II, not' Duc.
La Reine Méthe vîsitit Jèrri acouo eune fais en 1975. Ouaithe qué jé'n'fûsse qué mousse, j'm'èrsouveins d'l'aver veue pâsser dans sa grande vouaituthe d'vant not' maîson. Tch'est qu'jé vîs? Un grand chapé à travèrs les f'nêt's d'la vouaituthe quand ou pâssit!
Quand lé Président d'L'Assembliée d'Jèrriais, lé Connétabl'ye dé St. Jean, W.J. Tomes, rencontrit la Reine Méthe duthant sa vîsite, i' lyi pâlit en Jèrriais: "Vout' Majesté, d'la part des membres de L'Assembliée d'Jèrriais, j'vos apporte lus meilleurs souhaits sîncéthes."
I'n'y' avait pon bésoin dé traduction car la Reine Méthe asseûthit Moussieu Tomes qu'oulle avait comprîns ses patholes parfaitement. Oulle èrmèrcyit Moussieu Tomes et dît qu'ou 'tait bein contente qu'nou gardait les traditions.
Bouan annivèrsaithe, Vot' Majesté!
Viyiz étout: