Moussieu l'Editeu,
J'avons yeu un mio d'chaud à la fin. Mêcredi, yun d'mes vaisins eut la bonté de m'porté man preumié viage en ville, et hier (Jeudi) y m'mint ocquo pûs dans sa dette, car m'ayant prêté une couplye d'frouques pour tchiques jours, y vint ocquo avec san lorry m'en r'porté une trentaine de bathis. Nou trouve ocquo hardi d'bouon monde à Saint-Ou.
Mais quand je r'vint Jeudi au sé, tout joyeux d'avé fait tant d'sous, et avec une poutchie d'chucrins dans ma pouchette pour la bouonnefemme, j'trouvit bein vite que chein tchi l'interêssait ch'tait la Coronâtion, et pas les patates.
"Ecoute, Ph'lip," ou dit, quand j'voulit la r'prochi un mio, "les patates je l's'avons tréjous avec nous, mais la Coronâtion ch'est tchiquechose que j'ne r'vêrrons pas. Ch'est yun des pûs grands êvènements que l'monde aie jamais veu. Je s'y bein contente que tu'as fait si bein sûs l'bridge chutte semaine, car ach'teu j'pouôrrons péyi nos dettes, mais faut oublié tout chonna pour une fais et pâslé d'chutte chièthe petite Reine tch'y s'en va être couronnée Mardi. A qu'menchi, y faut prié pour du biau teamps."
"Ah damme, vèthe," j'l'y dit, "car si v'nait une achie d'orâge, ou même tchiques broussées v'la tchi gât'tait tout, pas seulement pour la Reine, mais pour les millions tch'y s'sont là pour des heuthes pour vais la procéssion passé. Nou n'voudrait pas vais des parapluies et des mackintosh partout."
"Bein seux," ou s'fit, "mais ach'teu la tchéstchon est tchèsque j'allons faithe, té et mé. Si y'avait des décorâtions ichin à Saint-Ou nous îthait les vais, mais j'comprends que même la salle parouaissiale ne s'sa pas illuminée. Ch'estentchi, y faudra allé en ville."
"Véthe assez," j'l'y dit, "mais tchèsque nou vêrra là? Ch'n'est pas la peine d'allé s'trainé si lien si n'y'a rain à vais."
"N'té gène pas," ou dit. "La Liza, tch'y fut en ville hier m'asseuthe que les décorâtions dans l'centre d'la ville sont magnifiques, et que quand veindra l'sé y'étha d's'illuminâtions comme nou n'a jamais veu. Y'étha une bande, ou même deux, épis après l'tais y'étha une grande cavalcade tchi parcouoth'tha les routes d'un bout d'la ville à l'autre."
"Ah," je m'fit, "ch'est dêjà tchiquechose, mais tchi sorte de cavalcade? Y'éthait-t'y des bidets et des vétuthes comme aut'fais?"
La missis dit qu'ou n'savait mais qu'bein seux la cavalcade vaudrait la peine de vais parsque Saint-Ou tait pour y prendre part. "Si nos garçons s'y mettent," oulle ajouôtit, "tu peux t'fié que ch'ne s'sa pas d'la p'tite bièthe."
"Et est-che tout?" j'l'y d'mandit.
"Grand doux nanin," ou dit. "Y'a autre chose; y'a des fireworks quand y f'tha niet, et v'la tchi t'ftha pliaisi, car tu'as tréjous aimé les fireworks."
"Damme, vèthe," j'l'y dit. "Te r'souveins-tu d'la bordée, après la Bataille de Flieurs tch'y mintes feu au haut du Mont-ès-Pendus? Ah, que ch'tait biau."
"P't'être bein," ou dit, "mais si l'vent n'avait pas tait contraithe, la ville éthait peut ête dêtruite. Enfin, n'y'a autchun dangi d'chonna chutte fais car ch'est sûs l'but d'la cauchie tch'y s'en vont l's'allumé, et la Liza m'dit tch'ils éthont couôté un tas d'sous. Quand nou veint à y pensé, tu sais, Ph'lip. ch'est dêpensé d'la monnaie un mio bêtement, car quand ch'est fini n'y'a rain à montré pour."
"Oh, ma pouôre Merrienne," j'l'y dit, "nous a veu chonna en Jèrri d'vant. Pense don un mio à chein tchi s'pâsse dans l's'Etats tchiquefais quand il est tchestchon de gaspillyi des sous. Les fireworks, au mains vos font du pliaisi, mais nou n'peut pas dithe chonna des bêtises que l's'Etats s'amusent à faithe. Mais, êcoute, quand j'éthons veu tout, y faudra bein r'venin siez-nous, et je n'm'en vais pas marchi d'la Ville au Portinfé pour pliathe à personne."
"J'prendrons un taxi pour une fais," ou dit. "Après chein qu'j'avons fait sûs l'bridge chais deux jours j'pouvons bein y'affôrdé."
Ph'lip
Les Chroniques de Jersey 30/5/1953
Viyiz étout: