La journée du 16 dé novembre en fut ieune toute mémorabl'ye pouor lé Rédacteu et sa fanmil'ye - ch'est à dithe li et Mde. Lé Maistre et deux des trais fis, Françouais et Douard. Un traîsième membre d'eune fanmil'ye n'est pon pèrmîns à autchun compte. La visite au Palais d'Buckingham 'tait pouor lé Rédacteu à r'chéver des mains d'Sa Majesté la Reine, nouot' Duc, la décorâtion d'Officier de l'Ordre de l'Empire Britannique (l'O.B.E.).
L' “Investiture” prend eune partie d'la matinnée, pouor eune chentaine dé "récipiendaires" dé difféthentes distînctions. Et y'a les chentaines d'învités spécialement étout, sans doute. La visite et la cérémonie fûdrent des pus întéréssantes, mais - comme tchi dêcrithe lé d'dans du Palais, les richesses et les trésors mèrveilleux, lé luxe et l'êcliat et tout chein tch'en dépend et tch'est si mangnifique? Il faudrait des fieillets comme des fieillets à raconter tout chenna. Tch'i' nouos suffithe dé dithe qué patheille occâsion reste înnoubliabl'ye pouor les cheins tch'ont la chance dé y'aller.
La Reine êchange deux'trais mots auve châtchun tchi va dans sa présence - par exempl'ye, ou fit la r'mèrque au Rédacteu tch'il avait fait un mèrveilleux dictionnaithe dé la langue Nouormande - et l'Rédacteu eut la chance dé lî d'vither, en Angliais et en Jèrriais !
Eh bein, nou-s-a voulu r'corder ch'la en deux'trais lîngnes, car ch'est la toute preunmié fais bein cèrtainement qué patheille distinction ait 'té accordée comme rêcompense pouor et entouor les êtudes avaû l's années dé la vielle langue Nouormande dé Jèrri.
1976
Viyiz étout: