Lé Palais d'Buckingham annoncit aniet qu'la Prîncêsse Margaret mouothit à matîn. Oulle avait septante-tch'ieune ans. S'lon lé palais, la Prîncêsse Margaret mouothit paisibliément dans san sommé à 6h et d'mie dans l'Hopitâ du Rouai Êdouard Sept. Oulle avait ieu un co d'sang hièr l'arlévée, et des problièmes du tchoeu dêv'loppit duthant la niet. La Prîncêsse avait ieu au mains deux cos d'sang dèrniéthement.
L'rapport dit étout qu'ses deux êfants, Lord Linley et la Danme Sarah Chatto, 'taient à côté d'san liet.
Un tas d'tributs ont 'té env'yés au Palais. Lé porte-pathole d'gâzettes dé d'vant, Dickie Arbiter, dit qu'il espéthait qu'i' n'es'sait pon longtemps d'vant qu'la Prîncêsse Margaret 'tait ramémouaithée pour tout l'bouôn travas qu'oulle avait fait dans sa vie.
S'n anmîn et danme d'honneu dé d'vant, la Danme Glenconner pâlait d'san couothage et vèrtu duthant sa maladie - oulle avait même badinné quand i' lus rêunîtent la s'maine pâssée. L'Archêvêque d'Cantorbéry, lé Docteu George Carey, dit qu'la Prîncêsse Margaret jouit un rôle împortant dans la vie d'la nâtion, même en d'pit d'la tristesse d'sa vie.
Chutte traduction d'l'annonce d'la mort d'la Prîncêsse Margaret, soeu d'la Reine, not' Duc, fut liue sus BBC Radio Jèrri, Sanm'di lé 9 d'Févri 2002.
La Prîncêsse n'avait fait qu'eune vîsite officielle en Jèrri, ouaithe qu'oulle eûsse vîsité d'manniéthe privée pus qu'eune fais.
Viyiz étout: