J'sommes assembliés dans chutte mangnifique Abbaye à seule fîn d'plieuther et d'èrmèrcier. Ch'est-i' la bouonne pliaiche pour faithe d'ité. Eune pliaiche où'est l'histouaithe dé not' nâtion et l'histouaithe d'la femme qué j'sommes à r'quémander à san Péthe Céleste sont nouées ensembl'ye.
Ch'fut ichîn qu'Lîzabé Bowes-Lyon fut mathiée et d'vînt Duchêsse dé York; ch'fut ichîn qu'ou fut couronnée Reine; ch'fut ichîn, coumme Reine Méthe, qu'ou r'gardit la Couronnâtion d'sa fil'ye même. Ch'est bein don qu'chutte pliaiche-chîn tchi 'tait au tchoeu d'sa vie est achteu la pliaiche où'est qué j'mèrtchons son pâssage.
D'pis l'temps qu'ou nos laîssit, y'a dgiêx jours, y'a 'té d's hommages innombrabl'yes et un tas d'expressions d'affection et d'respé - et auve ches-chîn les cheins des gens tch'ont fait la tcheue et pâssé pâtiemment d'vant san côffre en hounneu.
Coumme tchi explyitchi l'grand nombre dé gens? Pas sîmpliément par la londgeu d'sa vie, qu'nou-s'a veu bein vêtchue. Ch'est qu'ou s'donnait si aîsiment et si ouvèrtement. Et comme dît Eliot oulle avait “la douoche présence d'un bein châré.”
Coumme lé solé, ou nos baignait d'eune caude lueu. Et achteu qu'est l'couochant et la fraîcheu du sé, un p'tit mio d'sa chaleu qu'ou chârait auve nous rentre à lyi.
Si y'a un vèrset d'l'Êcrituthe tchi la dêcrit l'mus, ch'est p't-êt' la description d'eune femme dé grâce dans l'dèrnié chapître du livre des Provèrbes tchi dit:
“Oulle est habilyie d'la forche et d'l'hounneu et ou rit du temps à v'nîn.”
La forche, l'hounneu et l'ri - trais grand dons qué j'louangeons et célébrons aniet.
La forche d'la Reine Méthe, coumme îndividu, 'tait mus exprînmée par la qualité r'mèrquabl'ye d'ses rencontres auve les gens - s'n abilité dé transformer même les pus brièves rencontres en un êvenément spécial et pèrsonnel. Coumme san huitième Archêvêque dé Cantorbéry, j'la connaîssais bein, chutte forche-là.
Et v'là tchi nos explyique pouortchi qué d'pis un d'mié-siècl'ye jé l'connaîssêmes et comprannêmes coumme “la Reine Méthe”. Ch'est là un titre dé tchi l'înmportance n'est pon san status officiel mais pustôt s'n expression dg'ieune des pus fondamentales èrlâtions - la cheinne d'êt' tout sîmpliément eune Méthe, eune Mémèe, la Reine Méthe.
Pouor sa fanmil'ye, chutte forche matèrnelle - donnée l'travèrs des généthâtions ès êfants, p'tits-êfants et p'tits-p'tits-êfants - a 'té un présent précieux et eune bénédiction. La pèrte d'eune itelle forche est bein lamentée aniet. Et coumme i' plieuthent, j'disons à la Reine et au Prînce Ph'lippe; à Charles, Anne, André, Êdouard, Dâvi et Sarah coumme ses p'tits-êfants; et à touos lus êfants; ous êtes dans nos pensées et bèrchis dans nos priéthes et dans les cheinnes dé millions innombrabl'yes lé tou du monde.
La toute preunmié lettre qué Lîzabé êcrivit quand ou d'vînt la Reine duthant les êvenéments pénibl'yes dé 1936 fut adréchie à iun d'mes prédecesseurs coumme Archêvêque dé Cantorbéry. Ou donne acouo un apèrchu sus la r'ssource dé sa forche. Oulle êcrivit: “Jé n'peurs dgéthe craithe qué j'avons 'té app'lés à chutte ênorme tâche... et la chose tchuthieuse en est qu'jé n'sommes pon êpeûthés.” Coumme san caractéthe 'tait ouvèrt ès gens, ou 'tait calme et couothageuse. Ou mouontrit san couothage duthant la dgèrre et sa vie d'veuve, et mouontrait chu couothage jusqu'à la fîn.
La forche, l'hounneu et, véthe, lé ri.
J'sommes vénus ichîn à seule fîn d'plieuther mais pouor donner nos èrmèrcîments étout, pouor célébrer chutte pèrsonne et chutte vie - touos les deux remplyies d'un riche sens dé fanne et d'jouaie et d'la mûsique du ri. Auve chenna ou possédait eune înmense vitalité tchi n'la laîssit janmais. S'n âge 'tait patchi mais pas sèrré. Ou 'tait tréjous janne dans san tchoeu, et les jannes gens l'èrconnaîssaient.
Bein seu, l'ri du livre des Provèrbes est pus profond qu'eune bouonne farche ou eune rêponse rîsibl'ye. “Ou rit du temps à v'nîn”: chu ri-chîn nos mouontre eune attitude d'espé et confianche fache à l'adversité et les calenges împrévîsibl'yes dé la vie.
Ou la connaîssait bein, chu ri-là, étout lyi. Il avait ses réchinnes dans sa fouai profonde et sîmpl'ye qué chutte vie dait êt' vêtchue dans sa plieine mésuthe coumme un prépathâtis pouor la vie tch'est à v'nîn.
San d'cès fut vraînment eune mort dé Pâques - pliaichie entre lé Vendrédi B'nêt et Pâques. Viyant la promêsse dé Pâques, j'allons lyi donner san r'pos auve la connaîssance qu'un espé d'même appartcheint à touos les cheins tch'ont la fouai dans lé Chein tch'est la Résurrection et la Vie.
La forche, l'hounneu, lé ri - trais qualités spéciales tch'avaient lus réchinnes dans sa fouai Chrêtchienne. Des qualités tchi habilyaient sa vie si richement. Des qualités qu'j'allons nous étout - par la grâce dé Dgieu - r'mett' aupres san décès, dans nos vies et dans la vie d'not' nâtion et not' monde. Piêsse chenna êt' eune partie dé s'n héthitage, eune partie d'not' èrmèrcîment.
Et chennechîn pouor finni: car lé livre des Provèrbes a acouo à dithe entouor eune femme dé grâce; des mots qué j'nos ramémouaithons achteu coumme j'èrquémandons à san Péthe Céleste sa sèrvante fidèle Lîzabé - Reine, Reine Méthe, Reine Mémèe - bein aimée et hardi mantchie.
I' dit tout sîmpliément d'eune femme dé grâce: “Bein des fil'yes ont fait divèrsément bein, mais té tu'as fait bein mus.”
Vèrsion Jèrriaise Avri 2002
Viyiz étout: