Quand, au mais d'juilet préchain, nou f'tha la beinv'nue a sa Majesté nouot' Duchêsse, la reine Élizabé II, accompangnie du Prince Philippe, Duc d'Édimbourg, les vrais Jèrriais, l's "originaires", pouôrront tout fiabliément penser qué lus drouait d'atchilyi chutte reine date des vièrs temps d'la couronne dé Nouormandie et d'Angliétèrre quand l'pays d's Angliais 'tait eune dépendance dé l'autre.

Et don, nous, les membres d'L'Assembliée d'Jèrriais, au preunmié rang dans nouot' Jèrri dé chutte race fiéthe dé Contchérants, j'pouvons penser qu' j'avons acouo pus drouait d'l'atchilyi du moment qu' j'èrprésentons les traditions tchi fûdrent emportées en Angliétèrre par l'anchêtre illustre dé la reine - Dgilliaume lé Contchérant - et ses gens. Ch'est en tchi, en saluant nouot' Souvéraine, j'voulons penser en lyi comme étant pus à nous qu'à d'autres, car, sans autchun doute, jé sommes auve les autres Iles dé la Manche les pus vielles possessions d'la Couronne.

M.G. Lucas
Bulletîn d'Quart d'An d'l'Assembliée d'Jèrriais