à Portinfé,
Saint Ou.
Moussieu l'Editeu,
Nos v'là à la Pentecôte et, comme tréjous, quand j'nos trouvons là, i' semblye que personne en Angliéterre veurt mangi d'nos patates. J'ai veu chonna toute ma vie, et j'n'ai jamais comprint la raison. Touos l's ans les fermiers peuvent s'attendre que l'prix d'val'la, et que ch'est une chance si jamais i' ramonte. Faut espéther que chutte fais nou r'vêrra les patates à un prix raisonablye, autrément che s'sa d'tchi triste dans la Campagne. Il est vrai que dans la Ville les boutitchiers sont seux d'une bouonne saison, mais tchesque chonna nos vaut? La Ville pour dithe vrai, n'se fiche pas mal si les fermiers se trouvent souos l'fou: tout ch'qu'ou veur ch'est des visiteurs en mâsse, et sans autchune doute i' s'en vont en vaie ch't'été pûs qu'jamais. Aussi bein être franc et admettre que ch'est l'Tourisme qu'est la preunmièthe considéthâtion agniet, et pas l'agritchultuthe. Hélas, comme tout change!
Y'a une chose que la Merrienne trouve drôle, et ch'est d'vaie la maladie dans les patates à mié-mai. Mais comme j'li dis, tout a 'té eûssi ch't'année, et même dans les familles i' s'arrive des choses que nou n'viyait pas dans une saison ordinaithe. Sûs chu point-là nou m'a asseuthé que dans une bouonne demié-douzaine d'instances ichîn dans l'Ouest, des mousses ont 'té nés presque un mais d'vant lûs temps. La Merrienne ne trouve pas chonna drôle, car ou dit qu'ch'est assez commun dans tchiques pâraisses. Ch'n'est pas la saison, ou dit, mais tchiquechose d'autre, en un mot ch'est la natuthe humaine tchi n'change pas. Criy-ous qu'oulle a raison?
Comme ou pouvez craithe, Moussieu, j'fus au grand "show" à Springfield, et j'rencontris là hardi d'mes amîns que j'n'avais pas veu pour tchique temps. J'avais promînt à la Merrienne que je r'veindrais sobre comme un Juge, mais ou m'nommit pûs d'un Juge qu'oulle avait connu tch'avait 'té porté au liet pûs d'une fais, et dit que si je r'venais dans ch't'êtat-là, je m'en r'pentithais. Comme chonna, Moussieu, j'fus précautieux, mais v'là tchi m'faisait ma d'aver à r'fûser l'hospitalité que j'rencontrais de touos les côtés.
Y'avait de raides bouonnes clâsses au "show", et y'en avait d'faillies. Par exemplye, i' n'y avait que trais vielles vaques, et j'ai veu d'miyeu clâsses de g'niches r'nouv'lées. Mais les jeunes vaques, les g'niches de deux ans et les vieaux d'un an étaient d'raide belles clâsses, les jeunes vaques en partitchulyi. Dans les boeux y'en avait d'bouons, et si j'avais 'té juge, i' n'éthaient pas tréjous fini dans l'même ordre, mais ch'n'est pas pour dithe que l'sien tchi fit l'championnat n'le méthitait pas.
Lé Francis Le Ruez, du "Homestead", avait la miyeu g'niche de deux ans, et fit l'championnat des jeunes. I' m'dit que ch'tait la preunmiée fais dans sa vie tch'il avait fait un preunmié prix à "Springfield". San pèthe, et ses frèthes, lé Laurence et l'John, oui, mais li - jamais. Nou n'pouvait sinon l'féliciter. Lé championnat des vaques allit, pas pour la preunmiée fais, au Sieur Hickey, mais pûs tard i' fut battu par la vaque au Joe Bliampid, dé Saint Cliément. Quand oulle entrit dans l'"ring" la preunmiée fais, j'la trouvais une vaque bein ordinaithe, mais dans l'couothant d'un couplye d'heuthes oulle avait si amendé que nou-s-avait d'la peine à craithe que ch'tait la même vaque, et, pâslant par expéthience, Moussieu, chonna peut s'arriver étout dans d'autres membres du sexe féminin!
Ou battit la charmante petite vaque de la Trin'té dans une clâsse que j'ai tréjous trouvé riditchule. Ch'est pour une coupe pour la miyeu bête sûs l'têrrain - ch'est-à-dithe que y'a des vaques et des boeux - et quant à mé j'voudrais saver ouesqu'est l'homme tchi peut jugi entre un raide bouon boeu et une raide bouonne vaque. Pûs souvent les juges décident en faveur du sexe féminin, et j'pense bein que ch'n'est que natuthel, mais j'n'ai jamais veu un mio d'bouon sens dans chutte clâsse-là. Aussi bein aver à jugi une clâsse de chameaux mêlés avec des éléphants!
Nou-s-entend des nouvelles de partout quand nou va à un "show" d'l'Ile. Par exemplye, nou m'dit qu'à Sainte Mathie, ouesque nou criyait qu'les deux Chantgniers y r'veindraient sans opposition, un Sieur Bathette, tch'est v'nu d'un autre pâraisse, s'met candidat, et que y'étha trais candidats pour les deux vacances. Si ch'est vrai, le Sieur Gueno de l'auberge, étha sans doute un bouon jour, mais quand-même, i' n'peut pas s'attendre de faithe aussi bein comme lé jeune Percy L'Gresley, y'a bein d's années, quand i' présentit au Sieur Carabin un compte montant à pûs d'chent louis. J'en sis seux, car je l'vis, et, comme se faisait l'pouôre Carabin, en m'le montrant tchiques jours après s'n êlection: "Criy'ous qu'mes supporteurs pouvaient aver bu trente-siez douzaines de Bass dans l'couothant d'un jour?"
À Saint Louothains ch'est pour le préchain mais, et personne ne pathait saver tchesqu'i' s'en va s'arriver. J'si ocquo de l'opinion que l'Chantgni Louothains y veindra, mais pour s'en faithe seux i' dev'thait s'mettre à travaillyi la pâraisse. Dans toute l'Ile les êlecteurs aiment un candidat tchi prend la peine d'aller les vaie et d'lûs d'mander pour lûs vouaix.
J'entendis pâsler étout d'une êlection pour Officyi d'Connétablye à la Trin'té l'autre sé tchi fut gagnie parsque, presque à la dreine minute, i' vînt quatre femmes tchi donnitent lûs vouaix à un certain candidat. J'ai dans l'idée que l'Charles Godeaux, tch'est pûs intérêssi dans la polique que jamais, pouôrrait vos en dithe pûs long. Chein que j'si content d'entendre ch'est que l'Charles Cabot est mûs tchi n'avait 'té, et j'espèthe hardi que chonna continuétha, car la pâraisse pouôrrait aver grand besoin d'li. Et, pâslant d'malades, j'eus grand r'gret de n'vaie pas man vier amîn, Ph'lip Mouothant, à "Springfield". San fis, lé jeune Ph'lip, mé dit tch'il avait yeu une tchulbute siez-li, mais tch'i' r'séthait bétôt par les qu'mins. I' semblye qu'un "show" d'l'Ile n'est pas la même chose sans li. Mais lé Fred de Gruchy, dé Rosé, 'tait ocquo là solide comme un rotchi. I' n'a pas changi du tout dans les derniers djais ans, et avec un mio d'chance pouôrrait être ocquo là à djais ans d'ichin.
En finissant, Moussieu, i' faut que j'vos diche que la Merrienne est futhieuse parsque l'docteu tchi vint pour l'examiner l'autre séthée, li a envié un compte pour douze ch'lîns et d'mi. J'li dis qu'après tout ou d'vait s'y attendre, m'ayant fait téléphoner pour li.
"Ch'est d'ta faute," j'li dis. "Tu éthais deu le laissi t'examiner."
Mais ou n'm'êcoutit pas.
"Douze ch'lîns et d'mi pour r'fûser d'expôser ma personne," ou s'fit. "Et bein, tch'i' sufflye pour ses sous!"
Ph'lip
Evening Post 20/5/1961
Viyiz étout: