J'aime à vée la mé trembllante
Toute bllue souos un biau solèi;
Et la lune fine erlisante
S'y mirer quand i' fait gnièt.

J'aime à vée dans un gardin
Des flleurs de toutes couleurs:
Et le ser et le matin
A sentir lus bouann's odeurs.

J'aime à oui dans nos vallons
Le bouoillon'ment des russiaux;
Et les cris et les chansons
Des criquets et des ouaisiaux.

J'aime à vée à la St.-Jean
Dans les fossés l'verpeu r'lire;
Et à Noué je trouve bein bouan
De bere, de s'cauffer et d'rire.

J'aime à vée les c'mins d' St.-Jacques
Et les êtéles pétilli;
Et les brebis et les vaques
Ruminer à lus laîsi.

J'aime à vée de p'tits bicheaux
Jouer ensemblle autou d'lus mère.
Et de p'tits cats et d's agneaux,
Faire des tours à lus magnère.

J'aime a vée la calinette
Et les bouais couv-er'ts de fiell';
Et à oui chanter l'alouette
Volant entre terre et ciell.

J'aime bein à oui le twi-twi,
Et à vée voler l's hérondes;
Les ains cherchant pour du mi,
Les bibets faisant lus rondes.

J'aime à vée de grands camps d'fain
S'couochi souos l'bras des faucheurs,
Et des camps de biau jaune grain
Guerbès par les avouoteurs.

J'aime à vée les papillons
Voltilli de flleurs en flleurs;
Et une bande de jeunes garçons
En marche atou des couleurs.

J'aime à oui chanter la grive
Juquie tout haut sus un bouais;
Et à vèe un biau navire
Filant d'vant un vent bein frais.

J'aime bein une poule à pouochins,
Une cannotte atou ses p'tits;
Et à vée couore les lapins
A bannon dans les côtis.

J'aime à oui un bouan sermon
Qu'est des deux pus court que long,
Qui donne un p'tit d'rêvillon,
Et qu'a des êpices au fond.

J'aime à vée un ouvriyi
Qui semblle jouer en travas,
Machon, causeux, querpenqui,
Couvreux, forgeux, homme de bras,

J'aime grouaisilles et gradilles,
Verjus meux de toute couleur;
Jannes femmes et jannes filles
Qui se montrent d'bouanne humeur.

J'aime à vée un janne garçon
Prompt et hardi comme un page:
Une fille comme rose en bouton
Belle, bouanne, avnante et sage.

J'aime le podin à Noué,
Et au Mardi-gras des crêpes;
A Pâques i m' faut du simné;
J'aime à fêter toutes les fêtes.

J'aime à vée tout à l'entou
De grands pommiers chergis d'pommes;
J'aime bein à sentir etou
Le cidre quand nou l'entonne.

J'aime à vée l's aviers danser
Et jouer à toute sortes d'gamme;
Chanter, rire, couore et sauter,
Enfin avai tout pllein d'fanne.

J'aime à vée les p'tits rêtiaux,
Vermignons et cardronnettes,
Bouvreurs, d'mouaiselles, linots,
Mêilles, rouoges-gorges, alouettes.

J'aime à vée une grand' quérue,
Halaie par un bouan attlage,
Touanner la terre chein d'sous d'sus
Tout le long d'un biau riage.

J'aime la pllie quand i fait sèc;
Quand j'ai sé j'aime bein à bère;
Parfais j'aime bein le solèi,
Et quiq' fais la gnièt toute nère.

J'aime bein les gens comme i' faut,
Les bouans compagnons à tablle
Qui lèvent le coute en haut
Et se moquent du connêtablle.

J'aime à oui un biau paleux,
Savant et prompt à la r'pllique,
Comme ètou un bouan chanteux,
Et toute sorte de musique.

J'aime oprès solèi couochant,
A m'trouver en compagnie
Auv' ma manche et le bras d'dans
Autou de ma bouanne amie.

Il y-a bein d'autes choses que j'aime,
Mais s'i fallait tout vouos dire,
Je crains bein que pour ma peine
A mes despens ous n'friez qu'rire.

UN ST.-LOUORENCHAIS.