Lé calme y règne, dans man côti,
Tout seu nou-s'y'est tréjous à s'n aise,
Ouaithe qu' isolé n'y'a dgéthe d'ennion
Dans ma bouaîs'sie tout à banon.

Avaû un drédillet à gauche
Ou à drouaite, comme i' vouos pliaitha,
Pâssez par-'chîn, né faites pon d'brit,
Pouor vaie la bieauté d'man côti.

En pliein êté remplyi d'vèrduthe,
Et à la tchête un tapis d'fielles,
Dé toutes les sortes dé belles p'tites flieurs
Et l'chant d's ouaîthieaux touos bein heûtheurs.

Bieaux grands hauts bouais tout à l'entou
Et un fieillage dé toutes couleurs,
La musique du canné dans l'fond
Tchi russelle douochement tout du long.

Des peupliers, pus hauts qu' touos l's aut's,
Des tchênes en mâsse et des tchênelles,
Deux'trais chât'gnièrs, des ormes, et pis
Un bieau grand fau - rouai d'la bouaîs'sie.

Tchiques pétits frênes, deux'trais êpîngnes,
Des ronches tout pliein et du dgèrrue,
D'la mousse 'chîn et là souos les pids,
Feûgiéthe et geon à tête flieuthie.

Mais au r'nouvé quand y'a l'pus d'chouaix -
Les g'zettes, les bliuets, les pipots,
Quand l'bliu coucou est dêhalé
Et les mèrgots - ch'est ch'la tch'est bé!

Et pis pus tard du rouoge coucou
(Chein qu' nou-s-appelle des vièrs garçons),
Du potithon, pis du chuchet
Tout teurt sus l'mort-bouais endgèrrué.

Des p'tites feûgu'tholes et du frêgon,
Du paîvre à j'vaux - y'en a tréjous,
Quand veint lé s'tembre la vèrge d'or,
Jalousie, menthe - tchi bel êffort!

Y'a du cresson et d'la sûthe-ieaux,
D'la chue, du han et du gliajeu,
D'lôsyi, du saulx et du jontchet
À la braichie avaû l'canné.

Dans ma bouaîs'sie j'sis bein èrchu,
Ch'est si pliaîthant d'ouï la musique -
Tout l'ouaîthelîn chante à forte vouaix
A londgeu d'jours parmi les bouais.

Lé cri d'la pie m'est familyi,
La teurtérelle, tchiquefais l'coucou,
Les geais étout à bieau plieunmage,
Et d'autres ouaîthieaux tchi sont en viage.

J'connais l'bouvtheu et la rouoge-gorge,
Et touos les mêles m'sûffl'yent beinv'nue,
La grive, lé vèrdreu et l'mouosson.
Et l'rossîngno (tch'est un pînchon),

Tchiques bieaux jaûnouais et des souciques,
Et pis l'tui-tui dans l'mais d'avri,
L'êtournieau, l'craquelîn et l'gliaineux,
Des d'mouaîselles et des p'tits mêssieux.

I' y'a étout lé rouoge linnot,
Lé pique-en-bouais et l'vèrmîngnon,
Lé p'tit raîté - eune vraie dgilouette -
Et la mîngnonne dé cardrinnette.

N'oublions pon les papillotes,
Atout lus ailes si couleuthées -
N'y'éthait d'bieauté dans man côti
Sans papillotes à voltilyi.

Par haut, par bas, n'împorte iou
(Y'a bein des c'mîns dans ma bouaîs'sie),
En toutes saisons, d'amont, d'ava,
La paix, l'èrpos sont tréjous là.

La bieauté qué j'aimons touos nous.
Trajet d'chutte vie bénin et doux.
Mèrveil'yes dé la Natuthe et pis -
Mais, v'n-ouos-en tous vaie ma bouaîs'sie!

FLM