Lé ciel en d'ssus d'nous et not' vièr anmin l'malzard,
Les nuages et la plyie et même les brises étou,
La "lanterne d'la paraisse" et les p'tites êtailes sus l'tard;
Véthitablyement y'a d'la bieauté dans tout!

Et ch'est pour touos nous qué ches belles choses ont 'té faites,
Pour lé pauvre comme pour lé riche - médgian ou moussieu;
Dévrai, mes bouonnes gens, la natuthe est compliète,
Mais ch'est à nous d'réaliser qué ch'est l'don d'not' Bouon Dgieu.

Lé riche s'enivre d'jouaie en contempliant toutes ses richesses.
Tout san bieau meublye d'tchêne et chent mille argent'ties;
I' n'pense jamais qué ses gofèches et précieuses fréminnes.
Et tout san bein né l'mèn'nont dgéthe au Paradis.

Pour lé pauvre ch'est difféthent, la natuthe entchiéthe lî suffit;
Sus les falaises et dans les clios - au pauvre tchi forteune!
D'èrtou siez li tchi belles pensées li'otchupent l'esprit
A l'hus d'sa cauminne eune séthée trantchile au cliai d'la leune!

Qué ch'sait jour ou niet tout est cèrtainement mèrveilleux;
Calme ou rude, eune arsion d'chaleu ou qu'la fraid vos pique,
N'împorte! la bieauté est visiblye à tout obsèrvateur,
Et l'naturaliste sait qué tout est mangnifique.

Mais v'là tchi vos aid'da p'têtre si j'mé passe pour artiste,
En vos peignant tchiques illustrations au sujet;
Par exemplye, bouonnes gens, av'ous jamais veu un bouais
Un bieau grand haut bouais? Et bein, dites-mé tch'est qu'y'a d'pus bé!

Pensons au tchêne preumiéthement, lé tchêne si majestueux,
Et pis ès belles rangies d'fos des deux cotés d'la cache,
Les chât'gniers, lé peuplyi ou l'blianc-bouais, lé tilleul ou l'orme,
Tous châtchun aussi bieaux comme la pus belle des belles faches.

Parmi les ouaisieaux la Création est vraiment supèrbe;
R'gardez seulement la rouoge-gorge - un doux p'tit anima,
Si apprivouaisi et si d'licat, mais, tchi chef-d'oeuvre!
Dévrai, innouothant est l'homme tchi n'vait rein d'tout chenna!

Tchi musique tchi pouorrait compathaître à la vouaix d'eune grive
Ou à un mêle sus la branque à sinne dé jeu?
Lé violon n'est rein, toute musique est artificielle
A compathaître à un ouaisé - la musique du Bouon Dgieu.

La pus faillie p'tite sèrclye dans l'fossé est remplyie d'bieauté;
La rose, si fraîche et si cliaithe, est la reine par excellence,
Mais des vièrs garçons,du bliu coucou, offuche du meurdron,
Toute pliante sans exception a l'honneu d'être dé conséquence.

Les milles êtailes là-haut - tchi fliotchet d'bieaux p'tits lampions!
La leune et sans pilote sé sîllant à travèrs lé ciel;
La Canitchule, la Pouochinniéthe et les Trais Rouais, -
Les leumiéthes du Royaume pour touos les corps mortels.

La Tchéthue et les Jeumieaux, les C'mins d'St. Jacques étou
Auve eune lueu pus grande et blianche qu'autcheune artificielle;
Vênus, Mars et Jupiter et toutes les autres plianètes,
A Noë ou la St. Jean tch'est qu'y'a d'pus naturel?

Assis dans eune falaise à la fîn d'eune belle journée
Sus eune tête dé rotchi, extasié du soleit couochant!
Qué ch'est pliaisant d'bouon matîn à la fraîcheu du jour
A pativouother dans la rôsée au soleit l'vant!

Tchi couleurs extchises, mes anmîns, nos sont èrprésentées
Dans un arc-en-ciel à toutes saisons et en autchun temps!
Et quand i' fait d'l'ôrage et qu'les êparts dé feu s'entre-suivent
N'ayiz pon d'peux; faut admither ch'la - n'vos touonnez pon les sens.

Finnalement, la trantchilité d'la mé douoche et r'lisante,
Atou p'têtre eune vaile ou deux ou un navithe au yain!
Sans préjudice à la mé rude - j'aime tant à la vaie
Fliantchi sa breue à l'abandon et battre san pliein!

Pour la paix et la bieauté èrgardez à l'entou d'vous,
Es cieux, sus la tèrre et dans l's ieaux - en d'ssus et en d'ssous;
Sus la grève, dans les vallettes, côtis et ruettes; dans l'ciel.
La natuthe pour mé! La natuthe et ses mèrvelles!

FLM