|
Le solèi veint de se couochir J'allons aver un' belle sérèe; L'air semblle dêja se fraichir J'airons une forte rousèe. Les herondes sont anichies Et l'ouais'lin tranquillement dort: Es cahuches les cauq'-souories Alertes font un' guerre à mort. Si nou n'craint pon d'être à tâtons Et de s'promner le long des ruettes Ch'est la le temps pour les garçons De s'rencontrer ôv les fillettes. Du verpeu parmi les fossés Se montre la lanterne pale; Le gris crapaud qu'aime le frais Dans le meme temps se dêhale. L'une auprès l'autre chaque êtelle Se montrant cmence à pétillir; Pour me la veue parait si belle Qu'à la guetter j'pouvais villir Qu'est qu'est pus be que les Tres Rouais, Que l'Queriot et la Pouochiniere, Les cmins d'Saint Jacques et parfais L's êtelles filant d'la lumiere. I' n'y-a pas une aube de vent, Comme est que tout parait tranquille; Le calme d'un itè moment Du brit de la vie en vaut mille. P.L. 6/7/1872 |
Viyiz étout: